Walay Hunong sa Pagpahayag sa Maayong Balita
1 Ang unang mga Kristohanon naghimo sa ilang ministeryo nga seryoso kaayo. Si Lucas mitaho: “Matag adlaw diha sa templo ug sa balay ug balay sila nagpadayong walay hunong sa pagpanudlo ug sa pagpahayag sa maayong balita bahin sa Kristo, si Jesus.” (Buh. 5:42) Walay unsa man, dili gani ang pagpanglutos, ang nakapugong kanila! (Buh. 8:4) Sila nagsulti ngadto sa uban bahin sa kamatuoran sa matag adlaw.
2 Komosta man kita? Suknaa ang imong kaugalingon: ‘Gibati ko ba ang pagkadinalian sa mga panahon? Mahilig ba ako nga padayong imantala ang maayong balita nga walay hunong?’
3 Modernong-Adlawng mga Sulundan sa Pagsangyaw nga Walay Hunong: Usa ka igsoong babaye, biktima sa polio, gibutang sa usa ka iron lung. Wala siya makaadto sa Kingdom Hall o makatambog asembliya. Apan, sulod sa iyang 37-ka-tuig nga pagkapinugngan, iyang natabangan ang 17 ka tawo sa pagkat-on sa kamatuoran! Giunsa niya paghimo kadto? Bisan tuod dili makahimo sa pagpamalaybalay, iyang nakaplagan ang usa ka paagi sa matag adlaw sa pagpamatuod sa di-pormal nga paagi ngadto kanilang may kontak kaniya.
4 Ang atong mga igsoon sa Bosnia nakaagom gayod sa gubat ug kawalad-on. Bisan pa niana, sila sa regular padayong nagasangyaw ngadto sa uban. Sa Sarajevo ang mga magmamantala nag-aberids ug 20 oras matag bulan sa pagsangyaw, ug sila nagadumala sa aberids nga duha ka pagtuon sa Bibliya matag usa.
5 Ang mga batan-on usab nagapakitag kasibot alang sa ministeryo. Usa ka pamilya sa mga Saksi sa Rwanda gibutang sa usa ka lawak diin ang mga sundalo nangandam sa pagpatay kanila. Ang pamilya nangayog pagtugot nga mag-ampo una. Kini gitugot, ug ang batan-ong anak babaye, si Deborah, miampo sa makusog: “Jehova, ning semanaha si Papa ug ako nakapahimutang ug lima ka magasin. Unsaon namo pagbalik sa maong mga tawo aron sa pagtudlo kanila sa kamatuoran ug pagtabang kanila nga makabaton ug kinabuhi?” Tungod sa iyang lig-ong pagtuo ug gugma sa ministeryo, ang tibuok pamilya naluwas.
6 Karong adlawa, gikinahanglan tang bantayan ang mga kahigayonan sa pagpanaksi ug sa pagpangita kanilang “sa husto nahimutang alang sa kinabuhing walay-kataposan.” (Buh. 13:48) Depende sa lokal nga mga kahimtang, ang mga ansiyano sa kongregasyon magahikay ug grupong pagsangyaw sa mabuntag, mahapon, o magabii. Ang mga artikulo sa Atong Ministeryo sa Gingharian, sirkitong mga asembliya, ug distritong mga kombensiyon nagatanyag ug tukma-sa-panahong mga sugyot ug pagdasig sa pakig-ambit diha sa lainlaing mga bahin sa pagsangyaw sa Gingharian. Dugang niini, ang mga magtatan-aw sa sirkito ug distrito nagabansay sa mga magmamantala diha sa pagsangyaw sa kadalanan, nagapakita kon unsaon sa pagkobre ang teritoryong negosyohanan, ug nagapunting sa ubang mga paagi sa pagpamatuod sa bisan haing dapit nga anaay mga tawo. Kining tanan nagapasiugda: Walay hunong sa pagpahayag sa maayong balita!
7 Ang mga apostol ni Jesus maisogong mipahayag: “Dili kami makahunong sa pagsulti sa mga butang nga among nakita ug nadungog.” Giunsa man nila sa paglahutay bisan pa sa mga kababagan? Sila mihangyo kang Jehova nga tabangan sila, ug “silang tanan gayod napuno sa balaang espiritu ug nanagsulti sa pulong sa Diyos uban ang kaisog.” (Buh. 4:20, 29, 31) Kon gitinguha gayod natong ipahayag ang maayong balita nga walay hunong ug kon manikaysikay kita sa pagbuhat niana bisan sa matag adlaw nga paagi, si Jehova motabang kanato.