Unsaon Nila Pagkadungog?

1. Nganong usahay dili sayon ang buluhatong pagwali, ug nganong angay kitang magpadayon?

¹ Sanglit nagakaduol na ang adlaw ni Jehova, kinahanglan gayod natong tabangan ang daghan pang mga tawo nga makabaton ug tukmang kahibalo sa Diyos ug sa iyang katuyoan. (Juan 17:3; 2 Ped. 3:9, 10) Lagmit may mga higayon nga malisdan kita sa paghimo niini, sanglit daghan ang dili matinagdanon ug mobiaybiay kanato. (2 Ped. 3:3, 4) Bisan pa niana, makaseguro kita nga aduna pay mga tawong interesado sa atong teritoryo. Apan, unsaon man nila pagkadungog kon walay magwali?​—Roma 10:14, 15.

2. Sa unsang paagi makadasig kanato ang kasinatian ni Pablo?

² Mga Pagsupak: Sanglit daghan pa ang andam mamati sa mensahe sa Gingharian, dili gayod kita angayng maluya. Ang Filipos maoy unang siyudad sa Uropa nga giwalihan ni Pablo sa maayong balita. Sa dihang gipasakaan ug bakak nga sumbong si Pablo ug Silas, sila gigarote ug gibalhog sa bilanggoan. (Buh. 16:16-24) Apan bisan pa sa mga kasakit nga naagoman ni Pablo, siya nagmaisogon. Sa dihang siya miduaw sa Tesalonica, ang sunod nga siyudad sa iyang misyonaryong panaw, siya ‘nagmaisogon pinaagi sa Diyos.’ (1 Tes. 2:2) Angay gayod natong sundogon si Pablo, kinsa ‘wala mohunong’ sa pagwali.​—Gal. 6:9.

3. Unsay nakapausab sa pipila nga kanhi dili interesado?

³ Daghan niadtong dili madinawaton sulod sa dugay nang panahon nausab. Ang kalisod, sakit, kamatayon sa usa ka membro sa pamilya, ug ang makuyawng mga panghitabo sa kalibotan lagmit nakapausab sa ilang tinamdan. (1 Cor. 7:31) Ang mga bata pa kaniadto nga may magsusupak nga ginikanan tingali hingkod na karon ug buot maminaw sa atong mensahe. Ang atong padayong pagsangyaw maghatag kanilag kahigayonan sa ‘pagtawag sa ngalan ni Jehova’ samtang aduna pay panahon.​—Roma 10:13.

4. Unsay motukmod kanato sa pagsangyaw nga ‘walay hunong’?

⁴ ‘Walay Hunong’: Sama sa mga apostoles sa unang siglo, ang atong gugma sa Diyos ug sa silingan motukmod kanato sa pagpadayon nga ‘walay hunong’ sa buluhatong pagsangyaw ug paghimog tinun-an. (Buh. 5:42) Daghan karon ang “nagapanghupaw ug nagaagulo tungod sa tanang dulumtanang mga butang” nga nagakahitabo. (Ezeq. 9:4) Sila makabaton gayog paglaom ug kahupayan sa dihang sila makadungog sa maayong balita! Bisan pag ang kadaghanan dili buot mamati, ang Kasulatan nagpasalig kanato nga si Jehova nahimuot gayod sa atong mga paningkamot.​—Heb. 13:15, 16.