Nganong Kanunay man Kitang Mobalik?
1. Unsang pangutana ang motungha bahin sa atong buluhatong pagsangyaw?
1 Diha sa daghang dapit, kanunay natong makobrehan ang atong teritoryo. Mobalik ra gihapon kita sa samang mga balay, bisan pag giingnan na tingali kita sa tagbalay nga dili siya interesado. Nganong balikan gihapon nato ang mga tawo nga wala magpakitag interes kaniadto?
2. Unsa ang pangunang rason kon nganong molahutay kita sa ministeryo?
2 Gugma Alang Kang Jehova ug sa mga Tawo: Ang pangunang rason kon nganong molahutay kita sa ministeryo mao ang atong gugma alang kang Jehova. Ang atong kasingkasing mopalihok kanato sa pagpakigsulti gihapon sa uban bahin sa atong dakong Diyos. (Luc. 6:45) Ang atong gugma alang kang Jehova modasig kanato sa pagtuman sa iyang mga sugo ug sa pagtabang sa uban sa pagbuhat usab niana. (Prov. 27:11; 1 Juan 5:3) Ang atong pagkamalahutayon ug pagkamatinumanon niining buluhatona wala magdepende sa sanong sa mga tawo. Bisan pag gilutos ang mga Kristohanon sa unang siglo, sila “wala mohunong” sa pagsangyaw. (Buh. 5:42) Kon dili mamati ang mga tawo, kita magpabiling malig-on ug magpasundayag sa atong tiunay nga gugma ug debosyon kang Jehova imbes nga kini magpaluya kanato.
3. Sa unsang paagi ang gugma alang sa mga tawo motabang kanato sa pagpadayon sa pagsangyaw?
3 Kita molahutay usab tungod sa atong gugma sa mga tawo. (Luc. 10:27) Si Jehova dili gustong adunay malaglag. (2 Ped. 3:9) Bisan diha sa teritoryo nga kanunayng masangyawan, kita makakaplag gihapon ug mga tawo nga gustong moalagad kang Jehova. Pananglitan, sa Guadeloupe, diin 1 sa matag 56 ka tawo maoy Saksi ni Jehova, 214 ang nabawtismohan sa miaging tuig. Duolan sa 20,000 ang mitambong sa Memoryal, mga 1 sa matag 22 ka tawo sa Guadeloupe!
4. Sa unsang mga paagi mausab ang mga teritoryo?
4 Mga Kausaban Diha sa Teritoryo: Ang mga molupyo sa atong teritoryo mag-usab-usab kanunay. Sa sunod higayon nga moduaw kita sa usa ka balay diin wala kita makaestorya ug tawong interesado kaniadto, basin may laing membro sa pamilya nga wala pa gayod makadungog sa atong mensahe ang moabli sa pultahan ug maminaw. O basin makahimamat kitag bag-ong mga nanimuyo didto nga interesado. Ang mga anak sa dili-interesadong mga ginikanan lagmit nanagko na ug mibiya na sa ilang panimalay. Tingali andam silang maminaw sa mensahe sa Gingharian.
5. Nganong lagmit ganahan nang maminaw ang mga tawo kanato?
5 Dugang pa, ang mga tawo mausab. Si apostol Pablo maoy “usa ka tigpasipala ug maglulutos ug tawong bagis” kaniadto. (1 Tim. 1:13) Sa susama, daghang nag-alagad kang Jehova karon dili interesado sa kamatuoran kanhi. Mahimong misupak pa gani ang uban sa maayong balita. Samtang nagakausab ang mga kahimtang sa kalibotan, ang ubang mga magsusupak o kadtong mga dili interesado kaniadto basin magpatalinghog na. Ang uban lagmit ganahan nang maminaw kanato human sila makaagom ug trahedya, sama sa kamatayon sa usa ka membro sa pamilya, pagkawala sa trabaho, problema sa panalapi, o balatian.
6. Nganong kinahanglan kitang mopadayon sa pagsangyaw nga madasigon?
6 Kining sistemaha sa mga butang hapit nang matapos, apan ang atong pagsangyaw ug pagpanudlo nagkakusog. (Isa. 60:22) Busa, mopadayon kita sa pagsangyaw nga madasigon ug maningkamot nga magmapositibo kanunay. Ang sunod nga tawo nga atong ikaestorya basin maminaw. Magpadayon lang kita sa pagsulti! ‘Kay sa pagbuhat niini atong maluwas ang atong kaugalingon ug kadtong mamati kanato.’—1 Tim. 4:16.