Nganong Magsige Man Kita ug Balik?
1 Nakasukna ka na ba nianang pangutanaha sa imong kaugalingon, tingali sa nagapangandam ka sa paggawas sa kanataran? Sublisubli natong gitrabaho ang atong teritoryo, tuigtuig. Daghang tagbalay nakaila na kanato ug nagadumili sa pagpaminaw kanato. Ang pipila pintok nga nag-ingon kanatong dili na mobalik. Pipila na lamang ang tingali mosanong nga mauyonon. Busa haom ang pangutana: “Nganong magsige man kita ug balik?” Tagda ang mosunod nga mga katarongan.
2 Una sa tanan, kita gisugo sa pagpadayon sa pagsangyaw sa mensahe sa Gingharian hangtod ang kataposan moabot. (Mat. 24:14; 28:19, 20) Ang propetang si Isaias nangutana kon hangtod kanus-a siya magpadayon sa iyang buluhatong pagsangyaw. Ang tubag nga iyang nadawat gitala sa Isaias 6:11. Walay duhaduha niana—siya giingnan nga magsige ug balik dala ang mensahe sa Diyos. Susama karong adlawa, bisan tuod sila modumili sa pagpaminaw, gidahom ni Jehova nga kita mopadayon sa pagduaw sa mga tawo sa atong teritoryo. (Ezeq. 3:10, 11) Usa kini ka sagradong responsabilidad nga gipiyal kanato.—1 Cor. 9:17.
3 Laing rason alang kanato nga magsige ug balik mao nga maghatag kini kanatog kahigayonan nga ipakita ang ka lalom sa atong debosyon kang Jehova. (1 Juan 5:3) Gawas pa, kon atong palandongon kon unsay anaa sa unahan alang sa katawhan, unsaon nato pagpugong ang atong kaugalingon sa pagpaningkamot nga pasidan-an ang atong mga silingan? (2 Tim. 4:2; Sant. 2:8) Ang atong pagkamatinumanon sa pagtuman sa atong asaynment magtaganag sublisubling kahigayonan alang kanila sa pagsanong sa mensahe sa Diyos, aron sila dili makaingon nga sila wala mapasidan-i.—Ezeq. 5:13.
4 Dugang pa, wala gayod kita masayod kon kanus-a mabag-o ang kasingkasing sa pipila ka tawo. Mahimong maaghat kini pinaagi sa kausaban sa ilang mga sirkumstansiya, usa ka trahedya sa ilang pamilya, o sa kahimtang sa kalibotan nga makapabalaka kanila. Dugang pa, ang butang nga atong gisulti mahimong magtukbil ug maayong pagsanong. (Eccl. 9:11; 1 Cor. 7:31) Usab, ang mga tawo molangyaw. Mahimong makakaplag kitag bag-ong mga pumoluyo sa atong teritoryo nga mosanong sa maayong balita.
5 Magsige ba kita ug balik? Oo! Ang Kasulatan naghatag kanatog igo-igong panukmod nga magsigeg balik. Sa dihang matapos na ang buluhatong pagsangyaw, si Jehova magpanalangin kanato sa atong mapinadayonong paningkamot diha sa ministeryo, ug siya magpanalangin niadtong kinsa naminaw kanato.—1 Tim. 4:16.