Padayon sa Pagsangyaw!
1 Maoy kabubut-on sa Diyos nga ang “tanang matang sa mga tawo maluwas ug makadangat sa tukmang kahibalo sa kamatuoran.” (1 Tim. 2:4) Tungod niini nga katarongan, siya naghatag kanatog asaynment sa pagsangyaw sa maayong balita. (Mat. 24:14) Kon atong pabilhan kon nganong kita kinahanglang magpadayon sa pagsangyaw, ang bisan unsang pagpaluya o lagmit nga kabalaka nga atong masagubang dili makababag kanato.
2 Nganong Mopadayon? Adunay daghang kabalaka sa kalibotan nga magpalimot sa mga tawo o dili motagad kon unsay atong isulti kanila. Busa kinahanglang padayon natong pahinumdoman sila sa mensahe sa Diyos sa kaluwasan. (Mat. 24:38, 39) Dugang pa, ang mga panghitabo sa kinabuhi sa mga tawo kanunayng nag-usab-usab. Bisan gani ang mga kahimtang sa kalibotan mahimong kalit kaayo nga mausab. (1 Cor. 7:31) Ugma, sunod semana, o sunod bulan, ang mga tawo nga atong masangyawan hayan magsagubang ug bag-ong mga suliran o mga kabalaka nga ugdang nga magpatagad kanila sa maayong balita nga atong ihatod kanila. Dili ka ba magmapasalamaton nga ang Saksi nga naghatod kanimo sa kamatuoran mapinadayonon?
3 Aron Sundogon ang Kaluoy sa Diyos: Si Jehova mapailobong nagtugot sa paglugway ug panahon sa dili pa ipahamtang ang paghukom sa mga daotan. Pinaagi kanato siya padayong nangamuyo sa matarong-ug-kasingkasing nga mga tawo nga modangop kaniya ug maluwas. (2 Ped. 3:9) Kita mahimong sad-an sa dugo kon wala nato imantala ang maluluy-ong mensahe sa Diyos ngadto sa mga tawo ug pasidan-an sila bahin sa umaabot nga pagpahamtang sa paghukom sa Diyos sa tanang wala mobiya sa ilang daotang mga dalan. (Ezeq. 33:1-11) Bisan pag ang atong pagsangyaw dili kanunay maayo ang pagdawat, dili gayod kita kinahanglang maglangaylangay sa bug-os nga panikaysikay sa pagtabang sa sinserong mga tawo nga pabilhan ang dakong kaluoy sa Diyos.—Buh. 20:26, 27; Roma 12:11.
4 Aron Ipasundayag ang Atong Gugma: Si Jehova nga Diyos, pinaagi ni Jesu-Kristo, ang nagsugo nga ang maayong balita isangyaw sa tibuok yuta. (Mat. 28:19, 20) Bisan kon ang mga tawo modumili sa pagpaminaw, kita adunay kahigayonan nga ipakita ang atong gugma ug debosyon ngadto sa Diyos pinaagi sa pagpadayon sa pagbuhat kon unsay husto.—1 Juan 5:3.
5 Hinaot nga kita magmadeterminado sa pagpadayon sa pagsangyaw! Masiboton natong buhaton ang ingon samtang kini maoy panahon pa sa “adlaw sa kaluwasan” nga iya ni Jehova.—2 Cor. 6:2.