Nganong Padayong Mosangyaw?

¹ Dugay na bang gihimo ang buluhatong pagsangyaw sa Gingharian diha sa inyong komunidad? (Mat. 24:14) Kon mao, mahimong bation mo nga ang teritoryo sa kongregasyon igo nang nakobrehan. Karon sa dihang mosangyaw ka, tingali kadaghanan sa mga tawo nga imong mahibalag maorag walay interes sa mensahe sa Gingharian. Bisan pa niana, matikdi kon unsay giila bahin sa matuod nga mga tinun-an ni Jesus sa panid 141 sa librong Tagna ni Isaias II: “Sa pipila ka dapit, ang mga resulta sa ilang ministeryo daw way-bili kon itandi sa kadako sa trabaho ug kabudlay nga gigamit. Bisan pa niana, sila nag-antos.” Apan nganong padayong mosangyaw?

² Hinumdomi si Jeremias: Ang atong maunongong paglahutay diha sa buluhatong pagsangyaw dili angayng magdepende kon mamati ba ang mga tawo kanato o dili. Si Jeremias nagsangyaw sa 40 ka tuig sa mao rang teritoryo bisag diyutay ra kaayo ang namati kaniya ug daghan ang misupak sa iyang mensahe. Nganong milahutay man si Jeremias? Tungod kay gituman niya ang buluhaton nga gisugo sa Diyos nga iyang buhaton ug ang iyang kahibalo kon unsay mahitabo sa umaabot nagtukmod kaniya nga mopadayon sa pagsulting maisogon.​—Jer. 1:17; 20:9.

³ Susama ang atong kahimtang. Si Jesus “nagsugo kanamo nga magwali ngadto sa katawhan ug maghatag ug bug-os nga pamatuod nga kini Siya mao ang gitudlo sa Diyos nga mahimong maghuhukom sa mga buhi ug sa mga patay.” (Buh. 10:42) Ang atong dala nga mensahe maoy butang diin nahasandig ang kinabuhi ug kamatayon niadtong magpatalinghog niini. Ang mga tawo pagahukman pinasukad sa ilang sanong sa maayong balita. Tungod niana, ang atong kaakohan mao ang pagbuhat gayod kon unsay gisugo kanatong buhaton. Bisan kon dili maminaw ang mga tawo, kini maghatag kanatog kahigayonan nga ikapasundayag ang kalalom sa atong gugma alang kanila ug sa atong debosyon kang Jehova pinaagi sa padayong pagbuhat sa kinahanglan natong buhaton. Apan may dugang pa.

⁴ Kita Nakabenepisyo: Ang pagbuhat sa kabubut-on sa Diyos, bisag unsa pay sanong diha sa teritoryo, maghatag kanatog pangsulod nga kalinaw, katagbawan, ug kalipay, nga dili makaplagan diha sa bisan unsang laing paagi. (Sal. 40:8) Ang atong kinabuhi makahupot ug tinuod nga kahulogan ug katuyoan. Kon mas pa kitang makig-ambit diha sa ministeryo, mas pang masentro ang atong mga kasingkasing ug hunahuna sa paglaom ug kangaya nga magkinabuhi sa bag-ong kalibotan sa Diyos. Ang paghupot sa hunahuna niining Kasulatanhong mga saad mopalambo sa atong espirituwalidad ug mopalig-on sa atong relasyon kang Jehova.

⁵ Bisan tuod dili nato makita dihadiha ang mga resulta sa atong pagsangyaw nga kalihokan, ang binhi sa kamatuoran mahimong natisok sa kasingkasing sa indibiduwal nga motubo sa angayng panahon ni Jehova. (Juan 6:44; 1 Cor. 3:6) Walay nahibalo kanato kon unsa ka daghan pa ang mangabot aron mokat-on bahin sa Gingharian pinaagi sa mga panlimbasog sa katawhan ni Jehova, sa lokal man o sa tibuok kalibotan.

⁶ Nga mas dinalian kay sukad masukad, angay natong sundon ang instruksiyon ni Jesus: “Magpadayon sa pagtan-aw, magpadayon sa pagtukaw, kay wala kamo mahibalo kon kanus-a ang tinudlong panahon. Apan ang ginasulti ko kaninyo ginasulti ko sa tanan, Magpadayon sa pagbantay.” (Mar. 13:​33, 37) Busa, kitang tanan unta magpadayon sa pagmantala sa maayong balita sa Gingharian, nga maglipay sa kasingkasing ni Jehova samtang makig-ambit kita sa pagbalaan sa iyang dako ug balaan nga ngalan.