“Amo Nang Nakobrehan ang Among Teritoryo sa Makadaghan!”

¹ Gibati na ba nimo sukad nga ang inyong teritoryo makadaghan nang nakobrehan nga wala na ing karnerohong mga tawo nga makaplagan diha niana? Hayan naghunahuna ka: ‘Nahibalo ako kon unsay sanong sa mga tawo. Nganong magsigeg balik kanilang dili interesado?’ Tinuod nga daghang teritoryong makadaghan nang nakobrehan. Apan, kining kamatuorana angayng lantawon nga positibo, dili negatibo. Nganong ingon niana? Matikdi ang upat ka katarongan nga gihatag sa ubos.

² Ang Atong mga Pag-ampo Gitubag: Si Jesus miingon: “Sa pagkatinuod, dako ang alanihon, apan diyutay ang mga mamumuo. Busa pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Luc. 10:2) Sulod sa mga dekada kita nangamuyo kang Jehova alang sa dugang tabang. Sa daghang dapit, kita karon aduna na ing dugang gikinahanglang mga mamumuo, ug ato nang nakobrehan ang teritoryo nga mas subsob. Dili ba angayng ang kamatuoran nga si Jehova nagtubag sa atong mga pag-ampo magpalipay kanato?

³ Ang Pagkamalahutayon Namungag Maayong Bunga: Bisan gani sa sagad-nakobrehang mga teritoryo, ang mga tawo misanong sa mensahe sa Gingharian ug nakadangat sa kahibalo sa kamatuoran. Busa, kita angay nga moduaw nga balikbalik nga malaomong makakaplag ug dugang matinud-anog-kasingkasing nga mga tawo. (Isa. 6:​8-​11) Ingon sa gibuhat sa unang mga tinun-an ni Jesus, “adto kanunay” sa mga tawo sa imong natudlong teritoryo, nga manlimbasog sa pagpukaw sa ilang interes sa Gingharian sa Diyos.​—Mat. 10:​6, 7.

⁴ Sa Portugal daghang kongregasyon ang nagkobre sa ilang teritoryo matag semana, apan sila nakakaplag pa gihapon ug karnerohong mga tawo. Usa ka sister sa partikular nagbaton ug positibo kaayong tinamdan. Siya miingon: “Sa dili pa moadto sa pag-alagad matag buntag, ako mag-ampo kang Jehova nga tabangan ako nga makakaplag ug tawong interesado sa pagtuon sa Bibliya.” Usa ka adlaw niana iyang gihikay ang usa ka pagtuon uban sa mga trabahante sa usa ka hairdresser shop. Apan, sa ulahi usa lamang ka tawo ang mitungha alang sa pagtuon. Kanang tawhana miingon: “Ang uban dili interesado, apan ako interesado.” Sulod sa usa ka bulan siya nagdumalag duha ka pagtuon sa Bibliya nga iyang kaugalingon. Wala magdugay human niana siya nabawtismohan, ug siya sa ulahi misulod sa payunir nga pag-alagad!

⁵ Ang Buluhaton Nagmalamposon: Ang maayong balita ginasangyaw, ingon gayod sa gitagna ni Jesus nga mahitabo. (Mat. 24:14) Bisan sa mga dapit nga ang mga tawo ‘dili buot mamati [kanato],’ sila gipahibalo pinaagi sa kalihokang pagsangyaw. Gidahom nato nga ang pipila di-madinawaton o masinupakon pa gani sa kamatuoran. Bisan pa niana, ang maong mga tawo kinahanglang tukmang mapasidan-an bahin sa umaabot nga paghukom gikan kang Jehova.​—Ezeq. 2:​4, 5; 3:​7, 8, 19.

⁶ Wala pa Kita Mahuman: Dili kita ang modesisyon kon kanus-a mohunong sa buluhatong pagsangyaw. Si Jehova tinong nahibalo kon kanus-a kini angayng matapos. Siya nahibalo kon aduna pa bay mga tawo sa atong teritoryo nga mahimong mosanong sa maayong balita. Karon, ang ubang mga tawo moingon nga sila dili interesado, apan ang dagkong mga kausaban sa ilang mga kinabuhi​—pagkanawad-ag trabaho, grabeng sakit, pagkamatay sa usa ka minahal​—tingali maghimo kanila nga mas madinawaton sa laing panahon. Tungod sa pagkamapihigon o tungod sa yanong pagkapuliki kaayo aron maminaw, daghang tawo ang wala gayod sa tinuoray makadungog kon unsay atong ginasangyaw. Ang sublisubling mahigalaong mga pagduaw mahimong mopamatikod kanila ug maminaw.

⁷ Kadtong mga hingkod sa di pa dugayng katuigan ug karon aduna na ing kaugalingong mga pamilya naglantaw sa kinabuhi nga mas seryoso ug nagsuknag mga pangutana nga ang makatubag mao lamang ang Pulong sa Diyos. Gidapit sa batan-ong inahan ang duha ka Saksing babaye ngadto sa iyang balay ug miingon: “Sa gamay pa ako, dili ko gayod masabtan kon nganong abogon sa akong inahan ang mga Saksi ug sultihan sila nga siya dili interesado, nga unta ang gusto lang nilang buhaton mao ang pagpakighisgot sa Bibliya. Nakahukom ako niadto nga sa dihang modako na ako, maminyo, ug makabatog akong kaugalingong balay, hangyoon ko ang mga Saksi ni Jehova sa pagsulod ug ipatin-aw ang Bibliya kanako.” Kana ang iyang gibuhat, nga gikalipay sa mga Saksi nga miduaw kaniya.

⁸ Mahimo Ka Bang Mas Epektibo? Tingali dili kanunay ang mga tawo nga atong giduaw ang daw nagpalisod sa pagkobre sa teritoryo nga subsob. Usahay ang atong kaugalingon. Kita ba mosugod sa pagsulti nga may negatibong mga ideya? Kana makaapektar sa atong tinamdan ug lagmit sa atong tono sa tingog ug ekspresyon sa nawong. Ipakita ang positibong espiritu ug maayong panagway. Sulayi ang bag-ong paagi sa pagduol. Lainlaina ang imong presentasyon, ug paningkamoting pauswagon kana. Tingali mahimo nimong usbon ang imong pangbukas nga pangutana o gamiton ang laing teksto sa panaghisgot. Pangutan-a ang ubang mga igsoong lalaki ug babaye kon unsay ilang nakaplagang malamposon sa pagkobre sa teritoryo. Pakig-ambit diha sa pag-alagad uban sa lainlaing mga magmamantala ug mga payunir, ug matikdi kon unsay naghimo sa ilang ministeryo nga epektibo.

⁹ Ang buluhatong pagsangyaw sa Gingharian giuyonan ug gipanalanginan ni Jehova, ug ang atong pagpakig-ambit niana nagpamatuod sa atong gugma kaniya ug sa atong silingan. (Mat. 22:37-​39) Busa tumanon ta ang atong buluhaton ngadto sa kahumanan niini, nga dili maluya sa pagkobre sa teritoryo nga sublisubli.