Pagtanyag sa Maayong Balita—Diha sa Teritoryong Kanunayng Natrabaho
1 Unsa ka sagad nga ikaw nagatrabaho sa imong teritoryo? Kon kana kanunay nga ginakobrehan, ikaw sa linain napanalanginan. Ngano? Tungod kay ang mga kongregasyon nga kanunayng nagakobre sa ilang teritoryo sagad makatagamtam ug kusog nga pag-uswag. Pananglitan, sa Metro Manila, diin ang kadaghanan sa teritoryo regular nga nakobrehan, aduna na karon ing kapin sa 130 ka kongregasyon.
2 Sa dihang nagtrabaho sa usa ka teritoryong senemanang ginakobrehan, ang usa ka igsoong lalaki nakahibalag sa babaye nga nag-ingon nga wala pa gayod siya makontak sa miagi. Ikag siyang mikuhag literatura ug nalipay nga may usang nakakaplag kaniya. Busa aduna pay mga tawo sa maong teritoryo nga wala pa makahupot ug higayon sa pagpatalinghog sa maayong balita. (Itandi ang 2 Pedro 3:9b.) Ang bug-os nga pagkobre maoy hinungdanon aron kaplagon ang karnerohong mga tawo.—Mat. 10:11.
PAGBUNTOG SA HAGIT
3 Diin ang teritoryo kanunayng natrabaho, hinungdanon nga huptan ang tukmang house-to-house record. Ang mga listahan sa walay-tawo-balay magamit sa paghimong puliki sa mga grupo diha sa kanataran sa dihang ang ubang teritoryo dili mabatonan. Nganong dili gamiton ang pagsangyaw sa mga yugtong gabii aron sulayang aboton kadtong dili makaplagan sa balay sa maadlaw?
4 Kon sa ubay-ubay nga panahon makobrehan mo ang imong teritoryo samtang nagagamit sa usa ka Ulohan nga Mahisgotan, maayo nga lainlainon ang imong introduksiyon. Imong makaplagan ang tukmang mga pasiuna sa mga panid 9-15 sa librong Nangatarongan.
5 Ang laing paagi nga lainlainon ang imong pasiuna mao ang pagtanyag ug usa ka tract. Isumpay ang ulohan sa ‘tract’ ngadto sa Ulohan nga Mahisgotan. Usab, gamita ang kinabag-ohang mga hitabo nga ginabalita, nagapatunghag mga pangutana bahin niini aron halingon ang panghunahuna sa tagbalay ug makahimog pasukaranan alang sa panaghisgot.
PAGSANGYAW NGADTO SA TANAN
6 Nagagugol ka ba ug mga 50 porsiyento sa imong panahon sa pag-alagad diha sa paghimog mga balikduaw ug pagdumalag mga pagtuon sa Bibliya? Kon huptan mo ang separadong rekord niadtong nagapakitag interes, ikaw makaarang sa pagbalikduaw gilayon sa tanan nga nakadawat ug literatura.
7 Kita makaarang sa pag-abot gani sa dugang pang mga tawo kon kita alisto sa tanan tang kahigayonan sa paghatag pamatuod. Pananglitan, samtang nagakobre sa atong teritoryo, sagad atong makita ang mga tawo nga nagabiya na sa ilang mga balay o mga apartment. Diin angay, nganong dili sa minubo nga paagi itanyag ang mga magasin o usa ka tract?
8 Bisan kon ang teritoryo ginatrabaho sa kada semana, lagmit adunay mabuot-kasingkasing nga mga tawo kinsa wala pa makaplagi. Ug bisan tuod nakasangyaw ka na sa samang ganghaan sa miagi, mahimong laing tawo na ang imong mahibalag niining panahona. Busa, sama sa mga apostol, tugoting magpamatuod kita sa bug-os diha sa atong natudlong teritoryo.—Buh. 8:14, 25; 20:20, 21.