Tumana sa Bug-os ang Inyong Ministeryo
1 Si Jesus miingon sa iyang mga tinun-an: “Busa panlakaw kamo ug himoa ninyong mga tinun-an . . . , nga magatudlo kanila sa pagtuman sa tanan nga akong gisugo kaninyo.” (Mat. 28:19, 20) Ang tiunay nga mga tinun-an ni Jesus karong adlawa madasigong nagasanong niining nagaluwas-kinabuhing buluhaton. Ang ilang makapalig-on-pagtuong panig-ingnan nagadasig kanatong tanan nga tumanon sa bug-os ang atong ministeryo.—2 Tim. 4:5; Heb. 13:7.
2 Bisan pa niana, sa pipila ka teritoryo daghan ang wala sa balay sa atong pagduaw. Dugang pa, ang pipila ka mga kongregasyon adunay dako nga asaynment sa territoryo. Kini nagapalisod sa regular nga pagkobre sa teritoryo, bug-os nga pag-atiman sa interes, o pagbalik aron makaplagan kadtong mga wala sa balay. Unsa ang imong mahimo aron bug-os matuman ang imong ministeryo? Nasulayan na ba nimong ipunting ang imong paninguha sa mas mabungahon nga mga dapit sa imong teritoryo? Sulayi kini sa paghimo sa makadaghan sa usa ka tuig, samtang ginatino nga makobrehan ang tanang giasayn nga teritoryo sa labing kubos kausa sa usa ka tuig.
TUKMA NGA PAGGAMIT SA MGA HOUSE-TO-HOUSE RECORD
3 Importante nga kita magahupot ug maayong house-to-house record ug dayon tukmang gamiton kini. Unsaon nato pagtuman sa bug-os ang atong ministeryo kon dili kita magabalikduaw sa mga balay nga walay tawo? Ikaingon ba nato nga atong gikobrehan sa bug-os ang atong teritoryo kon napakyas kita sa pagbalikduaw sa mga interesadong tao ug sa pagsulay sa pagsugod ug mga pagtuon uban kanila? Kini nagapasiugda sa panginahanglan sa tukmang paggamit sa house-to-house record. Mas maayo nga magahupot ug duha ka talaan, ang usa para sa interes nga nakaplagan ug ang usa para sa mga adres sa mga balay nga walay tawo.
4 Ang pipila ka magmamantala nakakaplag niini nga praktikal ang pagduaw pag-usab sa mga wala-sa-balay una pa mogikan sa teritoryo. Ang pagbalik mga usa ka oras o duha pagkatapos sa unang pagduaw magaresulta sa pagkakaplag ug tawo sa balay ug sa pagpahimutang ug basahon o pagsugod ug pagtuon sa Bibliya.
5 Ang mga magmamantala nga dili dayon makabalik mahimong mohatag sa talaan sa mga wala-sa-balay sa ilang mga konduktor sa pagtuon aron ikahatag kini sa ubang mga magmamantala. Ang uban magatinguha tingali nga himoon ang pagduaw samtang nagapaingon o gikan sa tunghaan, sa trabaho, o sa pag-shopping.
6 Ang mga tawo sa teritoryo diin kita naasayn nanginahanglan pa gihapon nga mahatagan sa higayon nga ‘motawag sa ngalan ni Jehova.’ (Roma 10:11-13) Himoon nato ang kutob sa atong maarangan ug gamiton ang matag higayon sa pagtuman sa atong ministeryo sa bug-os.