Kon ang mga Tawo Wala sa Balay
1. Unsa ang kasagarang problema sa dihang mamalaybalay ta?
1 Sa daghang dapit, halos dili na nimo maabtan ang mga tawo sa balay. Niining ‘makuyaw nga mga panahon,’ daghan ang napugos sa pagtrabahog daghang oras aron matagan-an ang pangunang mga kinahanglanon. (2 Tim. 3:1) Ang uban mahimong wala sa ilaha kay namalit o naglulinghayaw. Sa unsang paagi atong masangyawan ang maong mga tawo sa maayong balita?
2. Sa unsang paagi atong matino nga masangyawan gayod ang mga tawong wala sa balay?
2 Paghupot ug Maayong mga Rekord: Ang unang lakang mao ang pagrekord niadtong mga balay nga walay tawo. Hinungdanon kaayo kini kon kanunay ninyong masangyawan ang inyong teritoryo. Imo bang ginarekord ang ngalan sa kalye, ang imong ngalan, ug ang petsa? Mahimong maggahin kag luna nga sulatan sa dugang nga mga impormasyon kon ikaw o ang laing magmamantala moduaw pag-usab niadtong mga balay nga walay tawo. Inigkahuman ug sangyaw, ayawg kalimot sa paghatag sa maong rekord ngadto sa igsoon nga naggunit sa teritoryo, gawas kon mosugot siya nga ikaw na lay moduaw pag-usab niadtong mga balay nga walay tawo. Paggamit ug laing papel nga sulatan sa bisan unsang interes nga imong nakaplagan niadtong imong balikduawon.
3. Unsa ang pipila ka sugyot aron makontak ang mga tawong wala sa balay?
3 Balik sa Laing Panahon: Lagmit ang pipila nga wala sa balay gikan sa Lunes hangtod sa Biyernes mahimong anaa ra sa balay sa magabii o sa Sabado ug Dominggo. Mahikay ba nimo ang imong eskedyul aron makabalik ka sa mas nahiangay nga panahon? (1 Cor. 10:24) Kon dili, mahimong ihatag nimo ang mga rekord sa mga balay nga walay tawo ngadto sa usa ka magmamantala nga makabalik sa laing panahon. Dugang pa, mahimo mong sulatan kadtong mga wala sa balay o sulayan nga makontak sila sa telepono. Ang mga magmamantala nga dili kaayo makapakigbahin sa balay-balay nga pagsangyaw tungod sa mga suliran sa panglawas malipay gayod sa pag-abag kanimo niining bahina.
4. Unsay nag-ilustrar sa kahinungdanon sa pagbalik sa mga tawong wala sa balay?
4 Ang usa ka kahimtang nag-ilustrar sa kahinungdanon sa pagkontak sa mga tawong wala sa balay. Human sa tulo ka tuig nga pagbalikbalik sa mga magmamantala, nakontak ra gayod ang tagbalay. Sulod nianang yugtoa, ang tagbalay nag-atang-atang diay nga may mga Saksi nga moagi sa ilaha aron mapadayon ang iyang pagtuon sa Bibliya nga iya nang nasugdan sa wala pa siya mobalhin nianang dapita.
5. Kanus-a ikaingon nga natapos na ang teritoryo?
5 Taposa ang Teritoryo: Kanus-a ikaingon nga natapos na ang teritoryo? Sa katibuk-an, kini maoy human mahimo ang tanang paningkamot sa pagkontak sa tanang tawo sa matag balay. Lagmit nahiangay ang pagbilin ug usa ka tract o daandaang magasin nga dili makita sa mga lumalabay diha sa mga balay nga walay tawo, ilabina sa mga teritoryo nga talagsa rang masangyawan. Ang teritoryo kinahanglan matapos sulod sa upat ka bulan. Dayon ipahibalo kini sa alagad sa teritoryo aron iyang mabag-o ang iyang rekord.
6. Nganong kinahanglan kitang maningkamot nga masangyawan sa maayong balita ang tanan diha sa atong teritoryo?
6 Buot nato nga daghan gayong mga tawo kutob sa mahimo ang makabaton ug kahigayonan nga makakat-on sa pagtawag sa ngalan ni Jehova ug maluwas. (Roma 10:13, 14) Kini naglakip mga tawong wala sa ilang mga balay sa dihang mamalaybalay ta. Sama kang apostol Pablo, himoang tumong nga “bug-os magpamatuod sa maayong balita bahin sa dili-takos nga kalulot sa Diyos.”—Buh. 20:24.