Nganong Huptan ang Rekord sa mga Wala-sa-Balay?
1 Usa ka Saksing magtiayon migula sa pag-alagad sa kanataran sayo sa adlaw. Sa ulahi nianang samang adlaw, sila mibalik aron pagduaw sa ilang mga wala-sa-balay nianang teritoryoha. Usa ka lalaki nagpadayon kanila ug naminaw pag-ayo. Siya mikuha sa librong Mabuhing Walay Kataposan ug nangutana kon mobalik ba ang mga Saksi. Wala pa gayod siya makapakigsulti sa mga Saksi ni Jehova kaniadto ug may daghang pangutana nga buot niyang matubag; ang usa ka pagtuon sa Bibliya nasugdan. Kining magtiayona nalipay kaayo nga nakakaplag nianang samag-karnerong indibiduwal. Buot ba nimong makabaton ug kasinatian nga sama niana? Ang paghupot ug maayong rekord sa mga wala-sa-balay ug mobalik dayon magpaposible kanimo sa pagbuhat niana.
2 Kita subsob nga giawhag sa paghupot ug tukmang rekord sa mga wala-sa-balay ug pagduaw pag-usab kanila sa labing madali. Ingon sa gipakita sa kasinatian sa itaas, ang laing duaw sa samang adlaw mahimong makapatunghag ekselenteng mga resulta. Bisan ug tumong nato nga makobrehan ang natudlong teritoryo, tingali dili kita ingon ka kugihan sa paghupot ug rekord niadtong wala sa balay. Ang pipila moingon: ‘Kami nagakobre sa among teritoryo sa matag duha o tulo ka semana; dili kinahanglang maghupot nianang maong rekord kay total mobalik ra man gihapon kami sa di-madugay.’ Apan kana nagahatag kanatog ilabinang katarongan nga maghupot ug usa ka rekord. Kon diin kanunayng gikobrehan ang teritoryo, ang pagpaloap sa mga wala-sa-balay makapaarang kanato nga mahimong mas bug-os sa pagpangita sa mga takos. Sa unsang paagi?
3 Sa pipila ka dapit, daghang residente wala sa balay kon maadlaw. Busa, sa aktuwal, makahimo kitag dugang mabatonan nga teritoryo pinaagig pagpunting ug dugang sa atong mga wala-sa-balay. Bisan kon ang teritoryo talagsa rang nakobrehan, atong mapauswag ang mga resulta kon gihimo ang panikaysikay sa pag-abot sa tanan una pa markahan ang teritoryo nga nakobrehan na.
4 Ang pagduaw sa mga wala-sa-balay sagad mahikay sa laing adlaw, gipalabi sulod sa usa ka semana. Daghan ang nakakaplag nga mas maayong mobalik sa usa ka adlaw ug sa laing panahon kay sa niadtong gihimo ang unang duaw. Mahimong pilion nimong gamiton ang pila ka panahon sa Sabado o Dominggo sa pagpaloap sa mga wala-sa-balay nga nalista sa tungatunga sa semana. Ingon nga laing posibilidad, daghang kongregasyon ang nakakaplag nga ang paghimo nianang mga duawa diha sa sayong mga oras sa kagabhion maoy mabungahon. Mahimong makaplagan nila ang labaw sa katunga sa mga residente nga anaa sa balay.
5 Kinahanglang ilista nimo sa separadong rekord ang mga balikduaw. Kon dili ka makabalik niadtong wala sa balay, ang imong rekord sa mga wala-sa-balay angayng ihatag sa igsoong lalaki nga nagadumala sa grupo, nga magamit sa sunod nga grupo nga moadto nianang teritoryoha.
6 Ang paghatag ug mas suod nga pagtagad niining bahina sa atong ministeryo makapauswag sa atong pagkamabungahon ingon man sa atong kalipay. Kini makahatag natog katagbawan nga maangkon tungod sa pagkasayod nga kita bug-os nga nagapangita ug nagaatiman sa mga karnerohon.—Ezeq. 34:11-14.