Ikaw ba Adunay Personal nga Teritoryo?

1. Unsay personal nga teritoryo?

¹ Ang personal nga teritoryo mao kanang teritoryo nga iasayn kanimo. Kini mahimong dali ra nimong maadtoan ug makasangyaw ka nga mag-inusara o uban sa laing magmamantala. Bisan tuod mapuslanon ang pagpaluyo sa mga kahikayan sa kongregasyon alang sa ginurupo nga pagsangyaw kon posible, ang pagbaton ug personal nga teritoryo nga sangyawan sa ubang mga okasyon makatabang sa paghatag ug bug-os nga pagpamatuod, ilabina diha sa mga kongregasyon nga dako kaayo ang teritoryo.—Buh. 10:42.

2. Unsay pipila ka kaayohan sa pagbaton ug personal nga teritoryo?

² Mga Kaayohan: Nakita sa uban ang dugang nga mga kaayohan sa pagsangyaw diha sa personal nga teritoryo duol sa ilang gitrabahoan panahon sa tingpaniudto o inigkahuman dayon sa trabaho. Ang uban malipay sa pagsangyaw ingong pamilya diha sa ilang kasilinganan sulod sa usa ka oras o kapin pa sa dili pa ang Pagtuon sa Libro sa Kongregasyon. Tungod niana, ang imong mga balikduaw ug mga ginatun-an sa Bibliya anaa ra sa duol, mao nga makadaginot ka ug kusog, panahon, ug salapi. Tungod kay mas daghan ang mahimo sa mas diyutayng panahon, ang pagbaton ug personal nga teritoryo makatabang sa pipila sa pag-oksilyare payunir matag karon ug unya o sa pagregular payunir pa gani. Dugang pa, ang pagsangyaw sa personal nga teritoryo ug pagsinati sa mga tagbalay makatabang kanato aron sila mosalig kanato ug mapasibo ang atong presentasyon ngadto sa ilang mga gikabalak-an, nga maghimo sa atong ministeryo nga mas epektibo.

3. Unsay kasinatian sa usa ka payunir nga adunay personal nga teritoryo?

³ Usa ka payunir nga gidasig sa magtatan-aw sa sirkito sa pagbaton ug personal nga teritoryo miingon: “Akong gisunod kining tambaga ug sa wala madugay ako nasinati ug nahimong mahigalaon kaayo sa mga tagbalay sa akong teritoryo. Akong gipasibo ang mga panahon sa akong pagduaw sumala sa ilang mga kahimtang. Tungod niana, ang akong mga balikduaw midaghan gikan sa 35 ngadto sa kapin sa 80 sa usa ka bulan, ug ako adunay pito ka pagtuon sa Bibliya sa balay.”

4. Sa unsang paagi makabaton ka ug personal nga teritoryo nga sangyawan?

⁴ Kon Unsaon Paghimo Kini: Kon gusto kang mohangyog personal nga teritoryo, pakigsultihi ang alagad sa teritoryo. Ayaw pagpanuko sa pagdapit sa laing magmamantala sa pagsangyaw uban kanimo, ug paghupot ug rekord niadtong mga wala sa balay. Paningkamoting makobrehan ang teritoryo sulod sa upat ka bulan. Kon malisdan ka sa paghimo niana, mahimo nimong hangyoon ang inyong magtatan-aw sa Pagtuon sa Libro sa Kongregasyon o ang uban sa pagtabang. Pagkahuman sa upat ka bulan, mahimo nimong ibalik ang nakobrehan nga teritoryo o makahangyo ka nga kobrehan kini pag-usab. Hinunoa, dili nimo angayng huptan ang samang teritoryo hangtod sa hangtod kondili ibalik kini aron makobrehan usab kini sa uban. Kon ikaw anaa sa kongregasyon nga diyutay rag teritoryo ug dili posible ang pagbaton ug personal nga teritoryo, tingali makahangyo kag usa ka bahin sa teritoryo gikan sa inyong magtatan-aw sa pagtuon sa libro.

5. Unsay gikinahanglan aron matuman ang atong buluhaton nga pagsangyaw?

⁵ Ang atong buluhaton nga pagsangyaw “sa tibuok gipuy-ang yuta” maoy dako nga asaynment. (Mat. 24:14) Kini nagkinahanglag maayong koordinasyon sa paningkamot. Gawas pa sa ginurupong pagsangyaw, ang pagsangyaw sa personal nga teritoryo makatabang kanato sa pag-abot sa daghang tawo kutob sa mahimo uban ang maayong balita.