Makabenepisyo Ka ba sa Pagbatog Personal nga Teritoryo?
1. Unsay personal nga teritoryo?
1 Unsay personal nga teritoryo? Kini mabatonan sa mga kongregasyon nga daghag teritoryo. Kini maoy kaugalingon nimong teritoryo, tingali duol sa imong gipuy-an. Ang librong Organisado, panid 103, nagpatin-aw: “Tungod sa pagbaton ug personal nga teritoryo nga duol ra, ikaw epektibong makagamit sa panahong imong gigahin sa pag-alagad sa kanataran. Lain pa, basin buot nimong modapit ug laing magmamantala nga mouban kanimo sa pagsangyaw diha sa imong personal nga teritoryo.”
2. Sa unsang paagi makatabang ang personal nga teritoryo sa ginurupong pagsangyaw?
2 Makatabang sa Ginurupong Pagsangyaw: Kon ang imong personal nga teritoryo duol sa imong gitrabahoan, makasangyaw ka sa tingpahulay sa udto o sa dili pa mouli sa balay, tingali uban sa laing magmamantala nga nagtrabaho sa duol. Kon kini duol sa imong gipuy-an, sayon alang kanimo ug sa imong pamilya nga mosangyaw sa gabii. Siyempre, kon walay gihikayng tigom alang sa pagsangyaw, haom ang pag-ampo alang sa giya ni Jehova una pa mosangyaw. (Filip. 4:6) Dugang pa, angay nimong balansehon ang panahong gugolon sa pagsangyaw sa personal nga teritoryo ug sa ginurupong pagsangyaw sa kongregasyon. Ilabina sa hinapos sa semana, dihang daghan ang manangyaw, maayo nga mouban sa inyong grupo.
3. Unsa ang mga benepisyo sa pagbatog personal nga teritoryo?
3 Mga Benepisyo: Kon duna kay personal nga teritoryo, may masangyawan ka dihang itugot sa imong eskedyul. Mas daghang oras ang imong magugol sa pagsangyaw ug gamay rang oras sa biyahe. Tungod niana, ang uban naka-oksilyare o regular payunir. Sanglit ang mga tagbalay nga nagpakitag interes naa ra sa duol, mas sayon ang pagbalikduaw ug pagdumalag pagtuon sa Bibliya. Nasayran sa daghan nga ang pagsangyaw diha sa personal nga teritoryo nakatabang nila nga makaila sa mga tagbalay ug mabatonan ang ilang pagsalig, ilabina kon ang teritoryo makobrehag pila ka beses una ibalik aron ang uban makahangyo niini. Ang pagkobreg personal nga teritoryo makatabang ba kanimo ug sa imong pamilya aron mas bug-os pang matuman ang inyong ministeryo?—2 Tim. 4:5.