Pagtanyag sa Maayong Balita—Diha sa Siging Natrabahong Teritoryo
1 Ang pagsangyaw diha sa siging natrabahong teritoryo maoy usa ka hagit. Sa unsang paagi mahuptan mong presko ug makapadani ang mensahe? Unsa man gayoy himoon ngadto sa uban nga mihukom nga sa tino sila dili interesado? Unsa may atong ikasulti ngadto kanilang moingon nga kita siging nagaduaw?
MAGMAPOSITIBO
2 Ang teritoryo nga sa kasagaran siging ginakobrehan nagapatunghag mas maayong mga resulta kay sa atong panagsang ginaduaw. Mao nga una atong gikinahanglang buntogon ang bisan unsang negatibong panghunahuna maylabot sa sagad nga pagduaw sa mao rang mga ganghaan. Ang mga tawo kinahanglang mahatagan ug higayon sa pagpatalinghog sa mensahe. Maoy usa ka sayop sa pagkanayon nga si Jehova mihukom na ingong di-angay niadtong wala mosanong bisan pa sa siging mga pagduaw.
3 Ang pagpakitag empatiya ilabinang hinungdanon diha sa siging gitrabahong teritoryo. Tungod kay nakabaton sa tinong mensahe nga mag-apektar sa mga tawo diha sa ilang lokal nga kasilinganan lagmit gayod nga magpatunghag positibong sanong diha sa pipila nga sa ubang paagi dili maminaw. Ikaw ba nahibalo sa kinabag-ohang mga hitabo, ug ikaw ba andam sa pagpakita kon sa unsang paagi ang Bibliya makatabang sa mga tawo sa pagsagubang sa mga suliran nga ilang giatubang?
LAINLAINA ANG PAAGI
4 Lainlaina ang imong paagi sa sagad nakobrehang teritoryo. Usa ka panahon basin gamiton mo ang usa ka ‘tract’ diha sa imong introduksiyon. Sa laing okasyon ang usa sa kapin sa 40 ka pasiuna nga anaa sa mga panid 9-15 sa librong Nangatarongan hayan mapasibo sa pagbuntog sa lokal nga mga gikabalak-an. Buot mo gani nga mohisgot sa kataposan mong pagduaw, nga sa ingon nagapagamay niini ingong usa ka pagsupak. Ang usa ka makahuloganong komento sa tagbalay sa ulahing panahon nga ikaw miduaw magamit man sa pagpadayon sa panaghisgot.
5 Isipa ang mga tawo sama sa pag-isip ni Jehova, ug padayong magpakitag kabalaka alang kanilang misulti kanato nga sila dili interesado. Si Jehova mihimog sublisubling mga pag-agda ngadto sa iyang kanhing katawhan bisan pa sa ilang pagkadimatinagdanon. (2 Cron. 36:15; Jer. 7:13) Daghan kinsa sa usa ka higayon mibati nga sila dili interesado sa pagkakaron sila ato nang mga igsoon. Bisan pa ang hilabihang mga magsusupak nahaylo man sa pagdangop sa kamatuoran. Kini sila mapasalamaton nga may tawo nga mapailobong nagpadayon sa pagduaw kanila dala ang maayong balita.
HUPTING MAAYONG MGA TALAAN
6 Importante nga huptan ang maayong ‘house-to-house records.’ Ang pagduaw pagbalik niadtong wala sa balay magpaseguro sa bug-os nga pagkobre sa teritoryo ug magpauswag sa oras tali sa atong mga pagduaw. Ang pipila mibaylo sa wala-sa-balay nga mga rekord gikan sa tunga-semanang pagsangyaw ngadto kanilang mosangyaw sa mga hinapos-semana. Kini nagapalahi sa mga panahon nga ginaduaw ang mga panimalay ug mobulig sa pagkontak niadtong wala dinha sa tinong mga panahon ug mga adlaw sa semana.
7 Si Jehova nahibalo sa dihang gihimo ang igong panlimbasog sa pag-abot sa tanan nga magapatalinghog. Kita masaligon nga ang buluhaton mahuman sulod sa panahon nga gitagal.—Ezeq. 9:11.