Pamalaybalay nga Walay Hunong
1 Sa karaang Israel, ang mga halad ginahalad matag adlaw. (Ex. 29:38-42) Karong mga adlawa, kita giawhag sa “pagtanyag sa Diyos ug halad sa pagdayeg, nga mao, ang bunga sa mga ngabil nga nagahimo ug pagpahayag diha sa dayag sa iyang ngalan.” (Heb. 13:15) Kita nagasimba kang Jehova pinaagig pagdayeg kaniya nga walay hunong.—Isa. 43:21; Buh. 5:42.
2 Si Jesu-Kristo mitudlo kanato kon unsaon ta gayod sa paghimog putling pagsimba pinaagig pagtanyag ug mga halad sa pagdayeg. Siya nahibalo nga ang labing epektibong paagi sa pag-abot sa katawhan uban sa maayong balita mao ang pagpakigsulti kanila sa personal diha sa ilang mga balay. (Mat. 10:7, 12) Busa atong makaplagan nga ang mga apostol nagsunod sa iyang dinasig nga pagtultol sa pagsangyaw sa kabalayan.—Buh. 20:20.
3 Kini dili lahi karon. Ingong mga tinun-an ni Jesus, ang matuod nga mga Kristohanon mosunod sa iyang panig-ingnan pinaagig pagsangyaw sa maayong balita sa kabalayan. Bisan tuod kita tamayon tingali ug lutoson tungod niana, mga minilyon ang nakakat-on sa kamatuoran ug ginatos ka libo sa bag-ong mga tinun-an ang nagaduyog sa dakong panon sa matag tuig, nga nagapamatuod nga kini mao ang paagi ni Jehova sa pagpalampos sa iyang kabubut-on. Maoy hinungdan nga kita nagalahutay diha sa atong ministeryo.
4 Mga Kaayohan sa Pamalaybalay nga Pagsangyaw. “Ang Diyos dili mapihigon . . . Ang tawo nga magakahadlok kaniya ug magabuhat ug pagkamatarong dalawaton kaniya.” (Buh. 10:34, 35) Ang pagngadto sa kada balay sa atong teritoryo nagapakitag di-pagkamapihigon, nga nagahatag sa kada usa ug samang kahigayonan sa pagpatalinghog sa mensahe sa Gingharian. Sa baylo ang mga madinawaton makadawat ug pagbulig sa personal nga paagi sumala sa ilang tinagsatagsa nga mga panginahanglan.
5 Hapit ang tanang magmamantala, apil ang mga batan-on, mga tigulang, ug bisan silang mga bag-ohan pa, makapakig-ambit man sa buluhatong pamalaybalay. Niining paagiha ang matag usa makahimog “pagpahayag diha sa dayag alang sa kaluwasan.” (Roma 10:10) Ang pagpakig-ambit sa balaybalay nga ministeryo kauban sa uban nagapahiusa kanato diha sa mga bugkos sa gugma ug panaghiusa. Sa samang panahon, kita nahatagan ug higayon sa pagpasundayag sa atong paglahutay sa dihang atong mahibalag ang pagkadimatinagdanon o pagsupak. Ang tanan nagapakita nga si Jehova nagapanalangin sa buluhatong pamalaybalay ug nagagamit niana sa pagpanigom sa dakong panon ngadto sa iyang “balay” sa dalisay nga pagsimba.—Isa. 2:2-4.
6 Padayonon ta ang pagsangyaw sa kabalayan nga walay hunong hangtod nga si Jehova moingon nga husto na. (Isa. 6:11) Sa pagbuhat niana, kita pagagantihan uban sa kangaya nga nagasumikad sa pagpakig-ambit niining buluhatona.—1 Cor. 15:58.