Mga Magmamantala sa Gingharian Nagtaho
Mapasalamaton Ka ba sa Katilingbanong Pagsangyaw?
ANG balay-balay nga pagsangyaw Kasulatanhon, ug ang mga Saksi ni Jehova nailhan sa tibuok kalibotan tungod niining bahina sa ilang katilingbanong pag-alagad. (Buhat 20:20, 21) Giingnan ni Jesus ang iyang mga sumusunod: “Pagadawaton ninyo ang gahom inig-abot sa balaang espiritu diha kaninyo, ug kamo mahimong akong mga saksi sa Jerusalem ug sa tibuok Judea ug sa Samaria ug sa kinalay-ang bahin sa yuta.” (Buhat 1:8) Ang Buhat 5:42 nagapakitang kadtong unang mga Kristohanon “namalaybalay” nga walay hunong.
Sa Haiti may pagharongay mahitungod sa balay-balay nga ministeryo sa mga Saksi ni Jehova. Kini nahitabo dihang nahibalag sa usa ka espesyal payunir ang usa ka hugot Protestanteng babaye. Panahon sa estoryahay, gipunting sa igsoong lalaki nga ang mga Saksi ni Jehova lamang ang nagasangyawng balay-balay sumala sa gilaraw sa Bibliya. Ang babaye mitubag nga ang mga membro sa iyang iglesya makahimo sa pagbalaybalay ug nagbuhat niana usahay. Segurado tuod, sa sunod Sabado, nahibalag sa Saksi ang usa ka grupong namalaybalay, nga gidumalahan sa maong babaye. May mga usa ka gatos sa grupo. Ang babaye, nga magarbohon sa maong nahimo, nagtawag sa igsoon aron iyang masaksihan ang maong nahimo.
Usa ka semana sa ulahi, ang samang babaye nangulo sa laing grupo ug nalipay sa pagpunting niini ngadto sa igsoong lalaki. Apan ang igsoon mikomentong mga katunga na lamang sa gidaghanon ang diha kay sa miaging semana. Sa pagkaikaupat nga Sabado ang grupo mikunhod ngadto sa 20, ug sa ikalimang Sabado ang babaye nag-inusara na lang. Sa mapaubsanon siya miadto sa igsoong lalaki ug miadmitir: “Mga Saksi ni Jehova lamang ang adunay kamatuoran, kay sila lamang ang nagapadayon sa pagsangyaw sa sunodsunod nga semana.”
Gitanyagan sa espesyal payunir ang babaye sa usa ka pagtuon sa Bibliya nga magpakita kaniya nganong ang mga Saksi makapadayon sa pagsangyaw sa balay-balay ug nganong ang uban dili. Gidawat kana sa babaye. Siya ug ang iyang bana misugod sa pagtuon ug maayo ang pag-uswag. Silang duha karon nakig-uban sa mga Saksi ni Jehova, nga madasigong nagamantala sa dayag sa Gingharian ug sa balay-balay!
Ang balay-balay ug ubang paagi sa katilingbanong pagsangyaw maoy kahibulongan ug mahigugmaong tagana nga gihikay ni Jehova alang sa pagpangita niadtong may matinud-anong kasingkasing ug pagtabang kanila nga makakat-on sa iyang mga kinahanglanon sa kinabuhi. Uyon niana, ang mga Saksi ni Jehova malipayong nakig-ambit niini ug sa ubang bahin sa ilang sagradong pag-alagad sa Diyos. Ang ilang tinamdan maoy sama sa iya ni apostol Pablo, kinsa miingon: “Ako mapasalamaton kang Kristo Jesus nga atong Ginoo, kinsa mihatag kanakog gahom, tungod kay ako iyang giisip nga matinumanon pinaagi sa pagtudlo kanako ngadto sa usa ka ministeryo.”—1 Timoteo 1:12.