Pagpamalaybalay
1. Unsang pangutana ang motungha bahin sa pagpamalaybalay, ug ngano?
1 “Kadtong may eksperyensiya sa nagkalainlaing paagi sa pagsangyaw sa Kamatuoran mouyon nga ang pagpamalaybalay ginamit ang MILLENNIAL DAWN mao ang labing epektibong paagi sa pagsangyaw sa Kamatuoran sa pagkakaron.” Kanang mga pulonga gikan sa Hulyo 1, 1893, nga gula sa Zion’s Watch Tower nagpasiugda sa bili sa pagpamalaybalay. Ang mga tawo sa tibuok yuta nag-isip niini ingong timailhan sa mga Saksi ni Jehova. Epektibo pa ba gihapon kining paagiha, sanglit nag-anam na man kalisod ang pagkaplag ug mga tawo sa ilang mga balay diha sa pipila ka nasod?
2. Unsa ang Kasulatanhong basehanan sa pagpamalaybalay?
2 Kasulatanhon ug Hinungdanon: Ang pagpamalaybalay maoy Kasulatanhon. Gisugo ni Jesus ang 70 ka tinun-an nga magtinagurha sa pag-adto sa kabalayan sa mga tawo. (Luc. 10:5-7) Wala madugay human mamatay si Jesus, ang Bibliya nag-ingon bahin sa iyang mga tinun-an: “Matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita.” (Buh. 5:42) Si apostol Pablo usab masibotong nanudlo sa balay ug balay.—Buh. 20:20.
3. Unsa ang pipila ka bentaha sa pagpamalaybalay?
3 Ang pagpamalaybalay nagpadayon nga hinungdanong paagi sa pagsangyaw sa maayong balita karon. Kini magpaarang kanato sa ‘pagpangita’ sa mga tawong takos sa sistematiko ug organisadong paagi. (Mat. 10:11) Kasagarang mas relaks ang mga tawo sa ilang balay. Ang pagpakigsulti kanila nga atubangay—pagkabati sa ilang tingog, pagkakita sa ekspresyon sa ilang nawong, ug pagpaniid sa ilang palibot—makatabang kanato sa pag-ila sa ilang mga gusto ug mga gikabalak-an. Kini sagad maghatag kanato ug labing maayong kahigayonan sa pagpakigsulti ug dugay kanila.
4. Sa unsang paagi atong mahimong mas mabungahon ang pagpamalaybalay?
4 Paghimog Personal nga mga Pagpasibo: Si apostol Pablo andam nga mihimog personal nga mga pagpasibo “tungod sa maayong balita.” (1 Cor. 9:23) Tingali atong mapasibo ang atong eskedyul sa pagsangyaw sa dihang ang mga tawo lagmit anaa ra sa balay, sama sa kahaponon, sa mga hinapos sa semana, o sa mga pista opisyal. Paghupot ug listahan sa mga tawong wala sa balay, ug paningkamoting mobalik sa laing adlaw sa semana o sa laing oras sa maong adlaw.
5. Sa unsang paagi kadtong may kakulian sa panglawas mahimong iuban sa pagpamalaybalay?
5 Bisan kadtong may mga kakulian sa panglawas makapakigbahin sa pagpamalaybalay. Tingali makaplano kita nga iuban sila ngadto sa mga balay nga dali rang adtoon, nga mag-agad lang kanila. Ang usa ka sister nga dali rang hangakon makaduaw lag usa ka balay matag tunga sa oras. Bisan pa niana, mibati siyag dakong kalipay ug katagbawan human makauban sa grupo!
6. Nganong angay natong himoong regular nga bahin sa atong ministeryo ang pagpamalaybalay?
6 Daghan pang karnerohon ang makaplagan diha sa pagpamalaybalay. Usa ka magmamantala mituktok sa usa ka pultahan ug giingnan: “Dayon. Nahibalo ko kon kinsa ka. Dugay na kong nag-ampo sa Diyos nga padalhan akog usa ka tawo nga makatabang nako, ug dayon nakadungog ko nga may nanuktok. Iya akong gidungog ug iya kang gipadala.” Ang mga resulta nagpamatuod nga gipanalanginan ni Jehova kining paagiha sa pagsangyaw. (Mat. 11:19) Magmadeterminado sa paghimo sa pagpamalaybalay nga usa ka regular nga bahin sa imong ministeryo.