Pagsangyaw nga Walay Hunong
1 Usahay, bation nato nga sublisubli ug bug-os nang nakobrehan ang atong teritoryo apan wala kaayoy misanong. Bisan pa niana, adunay lig-ong mga katarongan nga angay kitang mopadayon sa pagsangyaw.—Mat. 28:19, 20.
2 Ingon nga Pagpamatuod: Si Jesus nagtagna nga ang pagsangyaw sa Gingharian maoy usa ka hinungdanong bahin sa mga ilhanan “sa kataposan sa sistema sa mga butang” ug himoon kini “ingon nga pagpamatuod ngadto sa tanang kanasoran.” (Mat. 24:3, 14) Kita naghatag ug dakong pamatuod sa mga tawo sa dihang ila kitang makita nga nagsangyaw sa maayong balita sa Gingharian. Dihang makabiya na kita sa teritoryo, mahimong hisgotan sa mga tawo ang atong pagduaw sulod sa daghang oras o mga adlaw, bisag wala sila mamati sa atong mensahe. Kita molahutay kay nahibalo kita sa mga hinungdan sa atong pagsangyaw. Atong gipahimut-an si Jehova kay kita nakigbahin sa pagtuman sa tagna sa Bibliya pinaagi sa pagsangyaw ug pagpasidaan sa mga tawo bahin sa umaabot nga kalaglagan.—2 Tes. 1:6-9.
3 Gikinahanglan ang Pagkamalahutayon: Tungod sa mga kabaldahan ug kapuliki sa mga tawo, gikinahanglan ang pagkamalahutayon aron maugmad ang ilang interes. Usa ka babaye ang ginaduaw kada semana apan milabay una ang usa ka tuig ayha pa niya gipadayon ang mga Saksi sa iyang balay alang sa panaghisgot sa Bibliya. Nakaangay siya pag-ayo sa iyang nadunggan ug tungod niana siya midawat sa pagtuon sa Bibliya, misugod pagtambong sa mga tigom, ug wala madugay mipahayag sa iyang tinguha nga magpabawtismo.
4 Kusog kaayong nagakausab ang mga kahimtang sa kalibotan karon, maingon man ang tinamdan sa mga tawo. Ang mga tawo nga wala maminaw kanato sa miagi tingali andam na karon sa pagpaminaw sa makapahupay nga paglaom nga atong ginasangyaw. Mapuslanon gayod ang atong pagkamalahutayon bisag usa lang ka tawo ang mosanong sa mensahe sa Gingharian.
5 Sa tibuok kalibotan, nagkadaghan ang mga tawo nga “nagapanghupaw ug nagaagulo tungod sa tanang dulumtanang mga butang nga ginahimo” (Ezeq. 9:4) Ang mga bunga sa atong pagsangyaw nagpamatuod nga kadtong nakiling sa pagkamatarong nagasanong sa mensahe sa Gingharian. (Isa. 2:2, 3) Busa, mopadayon kita sa pagsangyaw nga walay hunong pinaagi sa paglahutay sa ‘pagdala sa maayong balita sa butang nga mas maayo.’—Isa. 52:7; Buh. 5:42.