Imantala ang Maayong Balita sa Gingharian Pinaagig mga Brosyur
1 Pagkamangayaon ang pagkahibalo sa kamatuoran ug maapil kanilang masibotong nagamantala sa maayong balita! Ang mga tawong gawas sa organisasyon sa Diyos kinahanglan gayod nga makadungog sa maayong balita sa Gingharian. Ang kamatuoran sa Gingharian gisaysay nga yano diha sa mga brosyur nga Tagamtama ang Kinabuhi sa Yuta sa Walay Kataposan!, “Tan-awa! Ginabag-o Ko ang Tanang Butang,” ug Ang Kagamhanang Mopatunghag Paraiso. Kini mabulokong nagalarawan sa kinabuhi sa yuta ubos sa Gingharian sa Diyos, ug ginatultolan niini ang magbabasa sa mga tagna sa Gingharian diha sa Pulong sa Diyos. Siyempre, ang pagpahilunag usa ka brosyur ngadto sa usa ka interesadong tawo maoy sinugdanan lamang sa atong buluhaton. (1 Cor. 9:23) Atong sundalon gilayon ang tanang napahimutang, uban ang tumong sa pagtanyag ug usa ka pagtuon diha sa librong Kahibalo nga Motultol sa Kinabuhing Walay Kataposan. Unsaon ta sa pagpalampos niini sa Agosto?
2 Ang brosyur nga “Tagamtama ang Kinabuhi sa Yuta sa Walay Kataposan!” hayan ikatanyag uban ang mubo kaayong presentasyon. Samtang ginapakita mo ang hapin niini, tingali ikaw makaingon:
◼ “Buot ko nga ipakita nimo ang usa ka butang nga naundan ug usa ka matahom nga mensahe.” Paklia ang brosyur nga Kinabuhi sa Yuta, ug basaha ang unang parapo diha sa introduksiyon. Unya ipadayon: “Kini usab nagatubag niining pangutanaha [paklia ngadto sa ulohan ibabaw sa hulagway numero 8]: ‘Nganong ang tawo mamatay?’ Imong makaplagang makapaikag ang pagtuon sa mga hulagway ug pagbasa sa mga kasulatan niini nga brosyur. Mahimong mabatonan mo kining kopyaha sa gamayng amot.”
3 Unsa ang imong isulti sa dihang magabalikduaw sa napahimutang nga “Kinabuhi sa Yuta” nga brosyur? Imong masulayan kining paagiha:
◼ Ipakita ang hulagway numero 49 diha sa brosyur nga Kinabuhi sa Yuta ug mosukna, “Dili ba kini usa ka maanindot nga hulagway? [Tugoting motubag.] Anaa kini sa brosyur nga akong nabilin kanimo sa miaging duaw. Buot ko nga isukna nimo ang pangutana diha sa sunod nga panid.” Paklia sa hulagway numero 50 ug basaha ang pangutana: “‘Buot ba nimong mopuyo sa walay kataposan nianang matahom nga paraiso?’ [Tugoting motubag.] Kon kana ang imong pangandoy, matikdi kon unsa ang giingon nga angay mong himoon: ‘Nan kat-oni sa dugang ang ginaingon sa Diyos.’ [Basahang Juan 17:3.] Ako malipay sa pagtuon sa Bibliya uban nimo nga walay bayad. Buot mo ba kana?” Himoa ang tinong kasabotan nga mobalik.
n4 Sa dihang itanyag ang brosyur nga “Tan-awa! Ginabag-o Ko ang Tanang Butang,” tingali ikaw makasugod pinaagi sa pagpakita sa tibuok hulagway sa hapin ug mangutana:
◼ “Unsa sa imong hunahuna ang gikinahanglan aron mahimo ang tibuok yuta nga sama niining tan-awon?” Tugoting motubag. Unya moingon: “Mibati ang kadaghanang tawo nga imposible ang paghimo sa usa ka kalibotang sama niini. Apan kini dili imposibleng himoon sa Diyos. [Ipaambit ang mga puntos diha sa parapo 43; unya basahang Isaias 9:6, 7.] Ang Diyos nagasaad nga ipatungha ang usa ka bag-ong kalibotan diin ang mga tawo gikan sa tanang kanasoran magatagamtam sa usa ka kahibulongang paraiso. Kining brosyura nagapakita kon sa unsang paagi ikaw ug ang imong pamilya mahimong makatagamtam sa usa ka kahibulongang kaugmaon.” Itanyag kini ug hikaya nga mobalik.
5 Sa pagbalikduaw, imong magamit ang brosyur nga “Tan-awa!” sa pagsaysay kon nganong adunay panginahanglan sa pagkat-on ug dugang bahin sa Bibliya. Hayan ipakita mo pag-usab ang hapin ug moingon:
◼ “Sa una kong pagpakita nimo niining hulagwaya, nagkauyon tang matagamtam nato ang pagkinabuhi sa maong kahibulongang kalibotan. Aron mahimo kining posible, adunay butang nga gikinahanglang himoon natong tanan.” Paklia ang brosyur nga “Tan-awa!” sa parapo 52; basaha ang parapo ug ang kasulatan sa Juan 17:3. Ipunting ngadto sa ilustrasyon sa parapo 53 bahin sa tukmang edukasyon sa Bibliya, dayon isaysay nga ang mga Saksi ni Jehova nagatanyag sa maong pagtudlo nga walay bayad. Itanyag nga ipasundayag ang atong paagi sa pagtuon, ginamit ang librong Kahibalo.
6 Sa dihang nagatanyag sa brosyur nga “Ang Kagamhanang Mopatunghag Paraiso,” mahimong imong sulayan ang pag-ingon niini:
◼ “Akong nadunggan ang daghang tawo nga moingong buot nilang mopuyo ubos sa usa ka kagamhanan nga makasulbad gayod sa mga problema nga atong ginaatubang karong adlawa. [Hisgoting lokal nga mga problema sama sa pagkawalay trabaho, nagauswag nga krimen, o pag-abuso sa droga.] Kining mga butanga magpabati natong wala gayoy kasegurohan bahin sa umaabot alang nato ug sa atong mga hinigugma. Sa imong hunahuna aduna ba gayoy usa ka kagamhanan nga makasulbad niining mga problemaha? [Tugoting motubag.] Tingali ikaw nagaampo sa Pag-ampo sa Ginoo. Kon mao, nasayod ka bang nagaampo ka gayod alang sa usa ka matarong nga kagamhanan?” Paklia sa panid 3 diha sa brosyur nga Kagamhanan, ug basaha ang unang duha ka parapo. Itanyag ang brosyur.
7 Kon ang brosyur nga “Ang Kagamhanang Mopatunghag Paraiso” napahimutang, imong masugdan ang panaghisgot sa pagbalikduaw pinaagig pag-ingon:
◼ “Sa miagi nahisgotan ta ang panginahanglan alang sa usa ka matarong nga kagamhanan nga makasulbad sa mga problema sa katawhan. Ang brosyur nga nabilin ko kanimo nagapunting ngadto sa Gingharian sa Diyos ingong atong bugtong paglaom. Ang pipila ka tawo nahibulong kon unsa ang mahimo nianang kagamhanana sa pagpauswag sa atong kahimtang sa kinabuhi. Ang Bibliya nagapakita nga si Kristo nakapamatuod na nga siya molampos diin napakyas ang tawhanong mga magmamando.” Paklia ang brosyur nga Kagamhanan sa panid 29, ug basaha ang kataposang upat ka parapo. Unya mosulti: “Dili ba kana usa ka kahibulongang kaugmaon? Buot mo bang makita kana?” Tugoting motubag. Basahang Juan 17:3. Dasiga nga mokat-on pag dugang pinaagig usa ka pagtuon sa Bibliya sa balay.
8 Kon gigamit mo ang ubang mga brosyur, ikaw makaandam sa imong kaugalingong mga presentasyon, ginamit ang mga sugyot sa ibabaw ingong mga sumbanan. Pangandam ug maayo ug pangayoa ang panalangin ni Jehova samtang gimantala mo ang maayong balita sa Gingharian.