Kon Unsaon Paggamit ang Maayong Balita Gikan sa Diyos!
Bag-ong Brosyur nga Gidisenyo Aron Motabang Nato sa Pagbalikduaw ug Pagsugod ug mga Bible Study
1. Unsang bag-ong giluwatan nga brosyur sa “Ampingi ang Imong Kasingkasing!” nga Distritong Kombensiyon ang gidisenyo sa pagtabang nato sa pagbalikduaw ug pagsugod ug Bible study?
1 Niadtong milabayng “Ampingi ang Imong Kasingkasing!” nga Distritong Kombensiyon, nalipay ta sa pagkadawat sa bag-ong brosyur nga motabang nato sa pagbalikduaw ug pagsugod ug mga Bible study. Ang Maayong Balita Gikan sa Diyos! nga brosyur mugbog mga leksiyon, nga susama sa gipulihan niini nga brosyur nga Gikinahanglan. Busa epektibo kaayo ni sa pagsugod ug mga Bible study. Samtang ang brosyur nga Gikinahanglan naghisgot sa Kristohanong mga kinahanglanon nga mahimong lisod dawaton sa bag-ong nag-Bible study, gipasiugda niining bag-o nga brosyur ang maayong balita nga anaa sa Bibliya.—Buh. 15:35.
2. Nganong gipatik ang brosyur nga Maayong Balita?
2 Nganong kini gipatik? Ang mga igsoon sa tibuok kalibotan naghangyo ug simpleng basahon nga makadani sa mga tawo sa kamatuoran ug magamit ingong tulay sa pagtuon sa librong Gitudlo sa Bibliya, ang atong pangunang galamiton sa pag-Bible study. Ang mga tawo nga dili gustong mobasa ug libro sagad mosugot nga magtuon sa Bibliya kon brosyur ang gamiton. Dugang pa, ang brosyur mas daling hubaron ngadto sa daghang pinulongan.
3. Nganong lahi kini nga brosyur sa uban natong tun-anang mga publikasyon?
3 Ang Pagkadisenyo Niini: Daghan sa atong tun-anang mga publikasyon ang gipatik aron mabasa ug masabtan sa tawo ang kamatuoran bisag walay tabang. Lahi kini nga publikasyon. Gipatik kini ingong giya sa pagtuon sa Bibliya uban sa usa ka magtutudlo. Busa, kon itanyag kini, labing maayong hisgotan ang usa o duha ka parapo niini. Mugbo ang mga parapo niini, busa mahuman dayon kini bisag hisgotan diha lang sa pultahan o sa negosyohanan. Bisan tuod maayong magsugod sa leksiyon 1, puwede tang magsugod ug Bible study sa bisan asa nga leksiyon niini nga brosyur.
4. Sa unsang paagi kini nga brosyur motabang nato sa pagtudlo gikan mismo sa Bibliya?
4 Sa daghan natong publikasyon, ang mga tubag sa mga pangutana makita diha sa mga parapo. Apan, niini nga brosyur ang mga tubag makita lang diha sa Bibliya. Ang kadaghanan gustong magtuon ug Bibliya inay sa atong mga basahon. Busa, halos walay usa sa gisitar nga mga teksto ang gikutlo. Kini basahon mismo diha sa Bibliya aron makita sa mga estudyante nga ang ilang gitun-an gikan sa Diyos.—Isa. 54:13.
5. Nganong kinahanglang mangandam pag-ayo ang magtutudlo sa matag pagtuon?
5 Wala ipatin-aw niini nga brosyur ang tanang teksto. Ngano? Gituyo ni aron dasigon ang estudyante sa pagpangutana ug magamit usab sa magtutudlo ang iyang katakos sa pagpanudlo. Busa, kinahanglang mangandam pag-ayo sa matag pagtuon. Pahinumdom: Ayaw pagsulti ug daghan. Gusto tang mopatin-aw sa mga teksto, apan mas magmalamposon ta kon dasigon nato ang estudyante sa pagkomento kon unsay iyang nasabtan niini. Pinaagi sa mataktikanhong paggamit ug mga pangutana, matabangan nato siya sa pagpangatarongan kon unsay iyang nasabtan sa matag teksto.—Buh. 17:2.
6. Unsaon nato paggamit ang brosyur (a) kon ang mga tawo maduhaduhaon sa Diyos ug sa Bibliya? (b) sa dihang mamalaybalay? (c) sa pagsugod ug Bible study sa direktang paagi? (d) sa dihang magbalikduaw?
6 Sama sa ubang mga publikasyon nga gigamit sa pagtuon sa Bibliya, mahimong itanyag kini nga brosyur sa bisan unsang panahon, bisan unsa pay tanyag nga literatura nianang bulana. Daghan ang ganahang mogamit sa direktang paagi sa pagsugod ug Bible study diha sa pultahan. Dugang pa, sumala sa gihisgotan sa distritong kombensiyon, kon gamiton kini sa pagbalikduaw niadtong nagpakitag interes, mahimong magmalamposon gayod ang pagbalikduaw.—Tan-awa ang mga kahon sa panid 5-7.
7. Unsaon nimo pagdumalag Bible study ginamit ang brosyur?
7 Kon Unsaon Pagdumala ang Pagtuon: Makasugod ta sa paghisgot pinaagi sa pagbasa sa ginumerohan nga bagag letrang mga pangutana. Dayon, basaha ang mga parapo ug ang pinahandag nga (mga) teksto. Paggamit ug mataktikanhong mga pangutana aron masabtan sa tagbalay ang mga teksto. Sa dili pa mobalhin sa sunod nga seksiyon, isukna sa tagbalay ang ginumerohan nga pangutana aron matino kon siya ba nakasabot. Sa unang mga duaw, labing maayo nga usa lang ka pangutana ang hisgotan. Sa ngadtongadto, tingali mapatas-an nato ang panaghisgot hangtod mahuman ang tibuok leksiyon.
8. Sa unsang paagi hisgotan nato ang mga teksto, ug ngano?
8 Ang gisitar nga mga teksto nga may giingong “basaha” sagad mao gayod ang tubag sa ginumerohan nga mga pangutana. Sa dihang hisgotan ang usa ka teksto, ayaw pag-ingon, “Misulat si apostol Pablo” o, “Matikdi ang gitagna ni Jeremias.” Basin hunahunaon sa tagbalay nga ang atong gibasa maoy pulong lang sa mga tawo. Mas maayong moingon, “Ang Pulong sa Diyos nag-ingon” o, “Matikdi ang gitagna sa Bibliya.”
9. Kinahanglan bang basahon ang tanang gisitar nga mga teksto panahon sa pagtuon?
9 Basahon ba nato ang tanang gisitar nga teksto o ang mga teksto lang nga may giingong “basaha”? Depende kana sa kahimtang. Wala ibutang ang gisitar nga mga teksto aron lang ipakita kon asa mabasa sa Bibliya ang usa ka puntong gihisgotan. Ang matag teksto may impormasyon nga angayng tagdon. Apan sa ubang kahimtang, ang mga teksto nga may giingong “basaha” mao ray basahon kon ang estudyante kulang ug panahon, interes, o maglisod ug basa.
10. Kanus-a nato puwedeng ibalhin ang pagtuon ngadto sa librong Gitudlo sa Bibliya?
10 Kon Kanus-a Ibalhin ang Pagtuon Ngadto sa Gitudlo sa Bibliya: Human sa pipila ka panaghisgot ug sa dihang regular na ang atong Bible study, mahimo natong ibalhin ang pagtuon sa librong Gitudlo sa Bibliya o ipadayon diha sa brosyur nga Maayong Balita hangtod nga matapos kini. Depende sa magmamantala kon kanus-a niya kini ibalhin. Kon ibalhin na sa librong Gitudlo sa Bibliya, magsugod ba gyod ta sa sinugdanan? Walay instruksiyon niini. Magkalahi ang matag tawo. Apan, ang kadaghanang estudyante makabenepisyo kon tun-an pag-usab ang samang ulohan sa detalyadong paagi diha sa librong Gitudlo sa Bibliya.
11. Nganong gamiton nato kining bag-ong brosyur?
11 Sa kalibotan diin tagsa rang madungog ang maayong balita, pribilehiyo gayod nato ang pagmantala sa labing maayong balita—nga nagmando na ang Gingharian sa Diyos ug ipahinabo niini ang bag-ong kalibotan diin magpuyo ang pagkamatarong! (Mat. 24:14; 2 Ped. 3:13) Masaligon tang daghan sa makadungog niini nga mensahe ang mouyon niining mga pulonga: “Pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan, ang usa nga nag-ingon ngadto sa Zion: ‘Ang imong Diyos nahimong hari!’” (Isa. 52:7) Hinaot nga gamiton nato ning bag-ong brosyur sa pagdala sa maayong balita sa mga giuhaw sa espirituwal diha sa atong teritoryo!
[Kahon sa panid 5]
Kon ang mga Tawo Maduhaduhaon sa Diyos ug sa Bibliya:
● Sa pipila ka dapit, kon hisgotan ang “Diyos” ug “Bibliya,” dili na makig-estorya ang mga tawo. Busa, maayong hisgotan sa unang pagduaw ang topiko nga interesado ang mga tawo, sama sa maayong panggobyerno, praktikal nga mga tabang alang sa pamilya, ug kon unsay anaa sa umaabot. Tingali ayha pa gamiton ang brosyur nga Maayong Balita human sa pipila ka pagduaw aron hisgotan kon giunsa nato pagkasayod nga naglungtad ang Diyos ug nganong makasalig ta sa Bibliya.
[Kahon sa panid 6]
Sa Dihang Mamalaybalay:
● “Kami miduaw aron hisgotan kon unsay gitagana sa Diyos nga kaugmaon alang sa katawhan. Sa imong tan-aw, hupayon ba kaha sa Diyos ang atong mga pag-antos? [Patubaga.] Gipakita niini nga brosyur kon asa makita sa Bibliya ang tubag niini. [Itunol kaniya ang brosyur, ug basaha ang unang parapo sa leksiyon 1, ug ang Jeremias 29:11.] Sumala dinhi, gusto ba sa Diyos nga duna tay maayong kaugmaon? [Patubaga.] Kon gusto nimo, imo na ni nga kopya. Sa sunod, hisgotan nato ang ikaduhang parapo aron makita nato sa Bibliya ang tubag niining pangutanaha: ‘Unsay buhaton sa Diyos aron ang katawhan dili na mag-antos?’” Kon ang tagbalay duna pay panahon sa unang pagduaw, mahimong ipadayon pagbasa ug paghisgot ang ikaduhang parapo ug ang tulo ka teksto niini. Ingna siya nga mobalik ka aron hisgotan ang ikaduhang pangutana niini nga leksiyon.
● “Daghang tawo ang mag-ampo, ilabina kon sila may mga problema. Pirme ka bang mag-ampo? [Patubaga.] Sa imong hunahuna, patalinghogan ba sa Diyos ang tanang pag-ampo, o may pag-ampo nga dili niya dunggon? [Patubaga.] Duna koy brosyur nga nagpakita sa tubag sa Bibliya nianang pangutanaha. [Itunol kaniya ang usa ka kopya, ug hisgoti ang unang parapo sa leksiyon 12 ug ang ipabasang mga teksto.] Di ba makapalipay nga ang Diyos andam mamati kanato? Apan aron dunggon ang atong pag-ampo, kinahanglan bug-os tang makaila sa Diyos. [Paklia ang leksiyon 2 ug ipakita ang mga sub-ulohan.] Kon gusto nimo, ibilin nako ning brosyura, ug sa sunod, basahon nato ang mga tubag niining mga pangutanaha.”
● “Daghang tawo ang nabalaka kon unsay dangatan sa kalibotan. Sa imong tan-aw, moarang-arang pa ba ang kahimtang? [Patubaga.] Daghang tawo ang nahibulong nga makita diay sa Bibliya ang maayong balita nga makahatag kanatog paglaom. Ania ang pipila ka pangutana nga gitubag sa Bibliya.” Hatagi siyag brosyur, ug papilia siyag pangutana diha sa hapin sa likod. Dayon paklia ang maong leksiyon, ug ipasundayag ang pagtuon. Ingna siya nga mobalik ka aron hisgotan ang sunod nga pangutana diha sa maong leksiyon.
[Kahon sa panid 7]
Sulayi ang Direktang Paagi:
● “Mianhi ko aron ipakita nimo ang usa ka bag-ong paagi sa pagtuon sa Bibliya. Kini nga brosyur dunay 15 ka leksiyon nga nagpakita sa tubag sa Bibliya niining mga pangutanaha. [Ipakita kaniya ang hapin sa atubangan ug sa likod.] Nakasulay ka na bag pagtuon sa Bibliya? [Patubaga.] Akong ipakita nimo nga sayon rang tun-an kini nga mga leksiyon. [Hisgoti ang unang parapo sa pangutana 3 sa leksiyon 3, ug basaha ang Pinadayag 21:4, 5. Kon haom, hisgoti ang sunod nga parapo ug mga teksto nga ipabasa.] Kon gusto ka, ibilin nako ning brosyura. Gidasig ka namo nga sulayan nimo ni nga paagi sa pagtuon bisag kas-a lang. Kon gusto nimo, puwede ni nimong ipadayon. Sa sunod, hisgotan nato ang unang leksiyon. Mubo ra kaayo ni.”
[Kahon sa panid 7]
Gamita Kini sa Pagbalikduaw:
● Dihang mobalikduaw sa nagpakitag interes, tingali moingon ta: “Nalipay kong nakaduaw nimo pag-usab. Gidad-an ta ka ning brosyura nga nagpakita sa tubag sa Bibliya sa daghang makapainteres nga pangutana. [Itunol kaniya ang brosyur, ug ipatan-aw ang hapin sa likod.] Asa niini ang nakapainteres nimo? [Patubaga. Dayon paklia ang iyang napili.] Akong ipakita nimo kon unsaon ni paggamit aron makita ang tubag sa Bibliya.” Hisgoti ang usa o duha ka parapo ug ang mga teksto nga ipabasa. Di ba sayon ra kaayong magsugod ug Bible study? Ihatag ang brosyur ngadto sa tagbalay, ug ingna nga mobalik ka. Kon mahuman na ninyo ang leksiyon, mahimong hisgotan ninyo ang laing leksiyon nga iyang napili o kaha magsugod sa sinugdanan sa brosyur.