Buhata ang Buluhaton sa Ebanghelista
1 Si Pablo midasig kang Timoteo sa paghupot nga malinawon sa iyang hunahuna diha sa tanang butang, sa pagbuhat sa buluhaton sa usa ka ebanghelista, ug sa bug-os nga pagtuman sa iyang ministeryo. (2 Tim. 4:5) Batan-on man o tigulang, bag-ohan sa kamatuoran o bansay-kaayo diha sa buluhatong pagsangyaw, kita usab buot nga bug-os nga moambit diha sa buluhatong pagwali.
2 Samtang magapahayag sa maayong balita sa mga bulan sa Hulyo ug Agosto, atong igatanyag ang ‘brochure’ sa Sosyedad, Ang Kagamhanang Mopatunghag Paraiso. Kon gahinan tag panahon sa pagsinati niini nga ‘brochure’ kita mapasibot sa atong kaugalingon maylabot sa mensahe sa Gingharian nga anaa niana ug makaarang sa pagtanyag niana nga epektibo ngadto sa katawhan sa atong teritoryo.
GAMITANG BAG-ONG ULOHAN NGA MAHISGOTAN
3 Imong mamatikdan nga ang bag-ong Ulohan nga Mahisgotan gisugyot nga gamiton uban sa ‘brochure’ nga Kagamhanan. Kini nagadala sa ulohan sa maong ‘brochure’ ug nagagamit sa mga teksto gikan sa Mateo 6:9, 10 ug Isaias 11:6-9. Among girekomendar nga mangandam ka sa paggamit niining Ulohana, nga gihimo na ang mga praktis sesyon sa balay aron ikaw mahimong epektibo. Ania ang sinugyot nga presentasyon nga imong magamit:
4 “Maayong buntag. Ako nagaduaw sa paghisgot uban sa akong mga silingan mahitungod sa maayong kagamhanan. Mapaneguro ko nga ikaw mouyon nga kini usa ka ulohang gikabalak-an sa tanan karon. Apan namatikdan ba nimo nga ang kadaghanan sa mga gobyerno karon nakakaplag nga nagakalisod ang pagtagbaw sa mga panginahanglan sa tanan? [Hunong para sa komento.] Sa hunahuna mo aduna kaha ing gobyerno karon nga makapatunghag paraiso ngadto sa iyang mga molupyo? [Tugoting mokomento.] Kon maohon, sa dihang nagaampo kita sa Amahan Namo nga pag-ampo kita gayod nagaampo sa Diyos nga ang iyang kagamhanan maoy momando sa langit ug sa yuta. [Basahang Mateo 6:9, 10.] Kini lamang ang kagamhanan nga gikan sa Diyos nga makapatunghag matuod nga kalinaw taliwala sa mga tawo ug ngani tali sa mga tawo ug sa mga mananap. [Basahang Isaias 11:6-9.] Dinhi sa mga panid 28 ug 29 niini nga brochure, imong makita ang ilustrasyon sa mga kahimtang sa paraiso nga patunghaon sa Gingharin sa Diyos sa yuta. Akong gidasig ka nga mokuhag usa ka kopya sa amot nga ₱4.20 ug ako malipay sa pagbalik sa sunod semana aron abagan ka nga makapahimulos gayod niini nga ‘brochure.’”
5 Mamatikdan mo nga ang Mateo 6:9, 10 gisitar diha sa panid 3 sa ‘brochure’ nga Kagamhanan, samtang ang Isaias 11:6-9 gipunting sa panid 29. Busa, sa dihang puliki ang mga tawo o palabihon mong mohimog minubong presentasyon usahay, yanong magamit mo ang ‘brochure’ diha sa imong introduksiyon, nga ablihan kini ngadto niini nga mga panid, dayon basahon ang tukmang mga teksto samtang nagapakita sa mga ilustrasyon. Kini mahimong maayo kaayong paagi para sa bag-ohan o batan-ong mga magmamantala sa pagtanyag sa ‘brochure’ diha sa buluhatong pamalaybalay. Sa walay duhaduha ang mga ginikanan makatabang sa ilang mga anak sa pag-andam sa maong yanong presentasyon.
6 Hinaot nga kita masibotong mobuhat sa buluhaton sa mga ebanghelista, nga nagaabot sa daghang tawo kutob sa mahimo uban sa maayo kaayong impormasyon nga anaa niini nga ‘brochure.’—1 Tim. 2:3, 4.