Pagtanyag sa Maayong Balita—Uban sa mga Brosyur
1 Pagkadakong kalipay sa pagpaambit sa maayong balita sa Gingharian uban sa katawhan! (Buh. 15:3) Apan ang atong panahon sa pagbuhat niini maoy limitado. Sa pagkamaalamon, si Jehova pinaagi sa iyang organisasyon nagatagana ug ekselenteng mga tabang sa pagtuon sa Bibliya nga atong ikabilin sa mga interesadong tawo sa pagbulig kanila sa espirituwal.
2 Sa Hulyo ug Agosto atong gamiton ang bag-ong Ulohan nga Mahisgotan, “Kon Unsa ang Mahimo sa Gingharian sa Diyos,” ug atong itanyag ang bisan hain sa mga brosyur nga gihisgotan niining artikuloha. Gikinahanglan tang masayran ang paagi nga epektibo sa pagpaila niini nga mga brosyur uyon sa atong Ulohan nga Mahisgotan maylabot sa Gingharian sa Diyos.
PIPILA KA SUGYOT
3 Tagamtama ang Kinabuhi sa Yuta sa Walay Kataposan!: Adunay ekselenteng pagdani kini nga brosyur ngadto sa mga batan-on maingon kanilang limitado ang katakos sa pagbasa. Sa unsang paagi imong ikapaila kini? Sa pagtiklop sa imong paghisgot bahin sa Gingharian, ikaw makaingon: “Di ba gusto mong mopuyo sa yutang paraiso ubos sa Gingharian sa Diyos? [Tugoting motubag.] Matikdi kining matahom nga ilustrasyon sa paraiso dinhi niini nga brosyur. [Paklia ngadto sa panid 49, ug basahang mga komento ibabaw sa litrato.] Kining brosyura makabulig kanimo sa pagkakat-on kon sa unsang paagi ikaw mabuhi sa walay kataposan sa yuta taliwala sa maong malipayong mga tawo. Maimo kini sa amot nga ₱4.20.”
4 Ang Kagamhanang Mopatunghag Paraiso: Kini nga brosyur nagapunting sa pagtagad maylabot sa Gingharian sa Diyos, nga mao ang atong Ulohan sa sunod bulan. Ania ang usa ka paagi nga imong ikalambigit kini nga brosyur ngadto sa Ulohan nga Mahisgotan: “Kining mga panalangina nga ato pa lang gihisgotan mapatungha pinaagig Gingharian sa Diyos, nga si Jesus mitudlo kanato sa pag-ampo. Matikdi ang pasiunang mga pulong niini nga brosyur sa panid 3. [Basahang unang bahin sa parapo.] Dayon sa panid 29 gihulagway ta ang mga panalangin nga ipatungha sa Gingharian sa Diyos ngadto sa katawhan. [Ipakitang puntos sa tinagsatagsa.] Ingon sa gisulti dinhi sa panid 30, atong gikinahanglang tun-an ang Bibliya aron makakat-on nga mas pa bahin sa Gingharian sa Diyos ug kining matulon-anong brosyur makabulig kanimo niini. Maimo kini sa ₱4.20 lamang.”
5 Ang Balaang Ngalan nga Magapadayon sa Walay Kataposan: Tino nga ang mga nagapangita sa mga panalangin sa Gingharian sa Diyos kinahanglang masinati kang Jehova, ang Diyos sa kalipay. Mao nga mahimong ikapaila mo ang brosyur niining paagiha: “Aron makapahimulos sa maong mga panalangin ang usa kinahanglan gayong masinati nga mas maayo sa Diyos mismo. Mao kining usa ka rason nga kami nagatanyag sa katawhan niining impormatibong tabang sa pagtuon sa Bibliya. [Ipakitang brosyur.] Dili lang kini nagapatin-aw kon unsa ang ngalan sa Diyos kondili usab nagapakita dinhi sa panid 31 sa kabililhon sa pagkaila sa ngalan sa Diyos. [Basahang parapo 1.] Kining kopyaha maimo sa amot nga ₱4.20.”
6 “Tan-awa! Ginabag-o Ko ang Tanang Butang”: Kini nga brosyur ekselente sa paghatag ug katibuk-ang panglantaw sa mga katuyoan sa Diyos ug magamit usab sa pagsugod ug pagtuon sa Bibliya. Busa, human mahisgoti ang mga teksto sa Ulohan nga Mahisgotan, maayong mosulti sama niini: “Aron mas pa gayong mahanduraw kon unsa ang kahibulongang mga kahimtang ang ipatungha sa Gingharian sa Diyos nganhi sa yuta, buot kong ipakita kanimo ang maanindot nga brosyur. [Ipakita ang tabon sa atubangan ug sa likod.] Gituyo kini nga brosyur sa pagtabang kanimong makakat-on ug mas pa kon sa unsang paagi ikaw ug ang imong pamilya makaandam sa pagpuyo sa paraiso. Maimo kini sa ₱4.20 lamang.”
7 Mahimong makaplagan mo ang lain pang epektibong mga paagi sa pagpaila sa mga brosyur sa pagsangyaw sa Hulyo ug Agosto. Pangandam ug maayo, ug hinaot si Jehova magahatag kanimo ug kangaya sa pagtanyag sa maayong balita uban sa mga brosyur ug sa pagpanlimbasog sa pagsugod ug mga pagtuon sa Bibliya diin ang interes gipakita.