Epektibong Pagpamalaybalay
1 Karong adlawa ang “maayong balita” ginawali na sa tibuok yuta. (Mat. 24:14) Kini napalampos ilabina pinaagig balaybalay nga ministeryo.—Buh. 20:20, 21.
2 Ang atong mga presentasyon kinahanglang ipahaom sa katawhan nga atong ikahibalag. Busa maayo gayod nga magmaandam sa nagakadaiyang Kasulatanhong mga ulohan nga makadani sa katawhan sa atong teritoryo.
3 Gamitag Maayo ang mga Brosyur: Ang atong mga brosyur nagakobreg nagakadaiyang mga ulohan nga makadani gayod sa katawhan bisan diin. Ang mga ilustrasyon maoy epektibong mga tabang. Ang mga brosyur makabulig sa katawhan sa pagsabot sa panginahanglan nga usbon ang ilang mga tinuohan, tinamdan, ug paagi sa kinabuhi. Ang pagkasinati kaayo sa mga kaundan sa mga brosyur makapaarang nato sa pagpakighisgot nga epektibo sa katawhan diha sa lainlaing mga ulohan.
4 Aron epektibo diha sa ministeryo, gikinahanglan natong ipakita ang tiunay personal nga interes. (Filip. 2:4) Paningkamoting ikapunting ang panaghisgot sa tema sa Gingharian nga naglangkit sa tawo ug sa iyang mga panginahanglan. Tinguhaang masabtan ang panghunahuna sa tawo pinaagig pagkuha niana gikan kaniya uban sa nahiangayng mga pangutana. Paminawa pag-ayo ang iyang mga tubag. Ang iyang mga komento makabulig kanimo sa pagsabot kon unsang ulohana ang makapainteres kaniya. Buot natong mabuligan ang katawhan nga makasabot sa bili sa mensahe sa Gingharian ug ikapakita kanila kon unsaon pagkat-on ug dugang bahin niana. Usa ka magtiayon misaysay nga ilang gidawat ang usa ka pagtuon sa Bibliya tungod kay ang igsoong lalaki nga miduaw kanila mipakitag usa ka sinsero personal nga interes diha kanila.
5 Diha sa Subsob Gikobrehang Teritoryo: Ang pag-ugmad sa pagkaepektibo maoy ilabinang mahinungdanon sa teritoryo nga subsob natrabaho. Ang labaw pang epektibong ministeryo makabulig kanato sa pagpalapad sa atong teritoryo. Inay nga molihok nga daw wala pa gayod kita makaduaw sa maong balay kaniadto, atong ikahisgot ang atong miaging duaw ug unya modugang sa kon unsay atong gikasulti niadtong panahona. Ang mga presentasyon nga gisugyot sa miaging mga gula sa Atong Ministeryo sa Gingharian ug sa librong Nangatarongan ikapahaom sa mga panginahanglan sa teritoryo.
6 Si Jehova sa pagkamapailobon nagabukas pa sa ganghaan alang sa dugang pang katawhan nga makapahimulos sa mga panalangin sa Gingharian. Ang ministeryo ni Jesus maoy epektibo tungod sa iyang gugma sa katawhan. (Mar. 6:34) Gibuhat ba nato ang ato gayong maarangan sa pagsunod sa iyang panig-ingnan? (1 Ped. 2:21) Dili gayod kita magapugong gikan sa bug-os ug epektibong pagpakig-ambit sa pagpamalaybalay nga ministeryo.—2 Tim 4:5.