Bug-os ba Nimong Ginatuman ang Imong Ministeryo?
1 Sa basahon sa Mga Buhat, kita gisultihan nga gituman sa mga tinun-an ni Jesus ang ilang ministeryo pinaagi sa paghatag ug “bug-os nga pagpamatuod” ngadto sa mga tawo. (Buh. 2:40; 8:25; 28:23) Mao gayod kadto ang tumong ni apostol Pablo. (Buh. 20:24) Dili ba kana mao ang imong tumong ingong ministro sa maayong balita? Sa unsang paagi matuman nimo kini?
2 Andama ang Imong Presentasyon: Aron maseguro nga imong ikahatag ang epektibong pamatuod sa ministeryo, hinungdanon ang pagpangandam. Kini ilabinang tinuod sa dihang magtanyag ug mga magasin, tungod kay ang ulohan nagabag-obag-o kanunay. Aron matabangan kitang masangkapan nga mas maayo pa, kining gulaa sa Atong Ministeryo sa Gingharian nagaduso ug bag-ong butang—ang lindog diha sa wala, nga naglista sa sampol nga mga presentasyon sa kinabag-ohang Bantayanang Torre ug Pagmata! nga mga magasin. Ang tukma-sa-panahong ulohan nga makapadani sa daghang tawo ipasiugda sa matag gula. Sa unsang paagi mahimo nimong tagikon kining mugbong mga presentasyon?
3 Pilia ang usa ka sugyot nga imong gibating labing epektibo sa inyong teritoryo. Basaha pag-ayo ang pangunang artikulo, ug matikdi ang espesipikong mga puntos nga lagmit makapukaw sa interes. Pangitag gisitar nga teksto diha sa magasin nga may kalangkitan sa panaghisgot ug mahimo nimong basahon ngadto sa tagbalay. Dugangi ug mubong konklusyon aron dasigon ang imong tigpaminaw nga basahon ang magasin ug mubong pahayag, kon haom, nga mahimong moamot ang tagbalay alang sa tibuok-kalibotang buluhaton sa mga Saksi ni Jehova. Karon, ensayoha ang imong presentasyon.
4 Planoha ang Paggamit sa Bibliya: Tungod sa maayong pagplano, ang usa ka teksto sagad ikasal-ot sa imong presentasyon. Pananglitan, ang eksperyensiyadong mga magmamantala sa daghang dapit nagmalamposon sa pagpamalaybalay nga naggunit na ug Bibliya, nagtimbaya sa tagbalay, ug miingon:
◼ “Kami nagsukna sa mga tawo kon sila ba nagtuo niini . . .” Basaha ang Genesis 1:1, ug dayon mangutana: “Mouyon ka ba sa maong pahayag?” Kon mouyon ang tawo, dayon moingon: “Ako nagtuo usab. Apan, naghunahuna ka ba nga kon gilalang sa Diyos ang tanang butang, siya usab ang hinungdan sa pagkadaotan?” Human pasalamati ang tubag sa tawo, basaha ang Ecclesiastes 7:29. Ablihi ang librong Kahibalo sa panid 71, ug basaha ang parapo 2. Dasiga ang tawo nga basahon ang libro. Kon ang tagbalay dili mouyon sa pahayag sa Genesis 1:1, agdaha siya nga usisahon ang librong Creation.
5 Paloapa ang Tanang Interes: Dili nimo matuman sa bug-os ang imong ministeryo kon dili nimo paloapon ang interes nga makaplagan. Kon ikaw adunay maayong panaghisgot, nakapahimutang ka man ug mga magasin o ubang literatura, itala ang ngalan ug adres sa maong tawo. Sa pagkamakugihon sulayi ang pag-ugmad sa interes sa maong tawo pinaagig pagbalik nga walay langan. Sa tino, tanyagi ug pagtuon sa Bibliya.
6 Ang unang-siglong mga tinun-an nahibalo nga si Jesus nagsugo kanila nga “maghatag ug bug-os nga pamatuod.” (Buh. 10:42) Kanang samang sugo mapadapat kanato, kay kana lamang ang paagi nga kita makaarang sa paghimog mga tinun-an. (Mat. 28:19, 20) Buhaton nato ang ato gayong maarangan aron bug-os matuman ang atong ministeryo.—2 Tim. 4:5.