Kon Unsaon sa Pagpangandam ug Usa ka Presentasyon sa Magasin
1. Nganong mas maayong mag-andam ug usa ka personal nga presentasyon sa magasin imbes sag-ulohon na lang ang sampol nga gihatag diha sa Atong Ministeryo sa Gingharian?
1 Makapangutana ka tingali: ‘Nganong kinahanglan man tang mangandam ug mga presentasyon sa magasin nga may mga presentasyon mang makita diha sa matag gula sa Atong Ministeryo sa Gingharian?’ Bisan tuod nakaplagan sa daghan nga mapuslanon kining sampol nga mga presentasyon, gikinahanglan gihapon ang personal nga pagpangandam. Ang usa ka presentasyon nga epektibo sa usa ka teritoryo mahimong dili epektibo sa lain. Busa, dili kita angayng mobating obligado sa pagpresentar sa mga magasin nga eksakto gayod sumala sa naimprenta diha sa sampol nga mga presentasyon. Bisan pag mopili kitag usa ka sampol nga presentasyon, labing maayo kon atong ipahayag kana sa kaugalingon natong mga pulong.
2. Unsay nalangkit sa pagtino kon unsang artikuloha ang imong ipasiugda?
2 Pagpilig Usa ka Artikulo: Human nimo mabasa ang magasin, pagpilig usa ka artikulo nga haom sa inyong teritoryo ug kanang nakapainteres kanimo. Ang imong pagtuo ug kadasig sa dihang magpresentar sa artikulo mahimong makaaghat sa tagbalay sa pagbasa usab niana. Bisan tuod kasagaran nimong ipasiugda ang artikulo nga makadani sa kadaghanang tawo sa inyong teritoryo, sinatia usab pag-ayo ang ubang mga artikulo sa magasin. Kini motabang kanimo sa pagpasibo sa imong presentasyon kon ikaw makahibalag ug usa ka tawo nga mas interesado sa ubang ulohan.
3. Unsang matanga sa introduksiyon ang angay nimong gamiton aron makab-ot ang kinamaayohang mga resulta?
3 Pagsuknag Usa ka Pangutana: Sunod, andama pag-ayo ang imong introduksiyon. Hinungdanon ang imong introduksiyon. Mapuslanon tingali ang pagsukna sa tagbalay ug usa ka makapukaw-sa-kaisipang pangutana aron mahaling ang iyang interes sa artikulo nga gipili nimong ipasiugda. Ang punto-debistang mga pangutana epektibo kaayo. Ayaw pagpangutanag usa ka butang nga makahaling ug panaglantugi kay maghunahuna man ang tagbalay nga kinahanglan niyang depensahan ang iyang pagtuo.
4. Unsa ang mga kaayohan sa pagbasag usa ka teksto ngadto sa tagbalay kon itugot sa kahimtang?
4 Pagbasag Usa ka Teksto: Sa kataposan, pagpilig usa ka teksto nga imong basahon kon itugot sa kahimtang sa tagbalay, tingali usa ka teksto nga makita diha sa artikulo nga imong ipasiugda. Ang pagbasag usa ka teksto makatabang sa tagbalay sa pagkasabot nga ang atong mensahe gikan sa Pulong sa Diyos. (1 Tes. 2:13) Ang teksto makahatag usab ug pamatuod kaniya bisag dili niya kuhaon ang mga magasin. Napukaw sa pipila ang interes sa tagbalay pinaagi sa pagbasag usa ka teksto sa dili pa mangutana. Ikapailaila nimo ang teksto pinaagi sa pag-ingon, “Buot nakong mahibaloan ang imong opinyon sa giingon niining bersikuloha sa Bibliya.” Dayon ipakita sa maong tawo ang nalangkit nga punto diha sa magasin, ug komentohi sa mubo aron mahaling pa gayod ang iyang interes sa dili pa itanyag kini.
5. Unsang paninugdang mga giya ang angay nimong hinumdoman sa dihang mangandam ug usa ka presentasyon sa magasin?
5 Walay higpit nga mga lagda bahin sa kon unsay isulti sa dihang magtanyag ug mga magasin. Sa katibuk-an, labing maayong maghatag kag simple ug mubo nga presentasyon. Gamita ang usa ka presentasyon nga dili lisod para nimo ug makakuhag maayong mga resulta. Ipasiugda ang pagkabililhon sa mga magasin, ug magmadasigon. Kon ikaw nakapangandam pag-ayo, ikaw mahimong mas epektibo sa pagpahimutang sa Ang Bantayanang Torre ug Pagmata! ngadto sa mga “hustong nakiling alang sa kinabuhing walay kataposan.”—Buh. 13:48.