Itanyag ang mga Magasin nga Nagpamatuod sa Kamatuoran
1. Unsay katuyoan sa mga magasing Ang Bantayanang Torre ug Pagmata!?
1 Ang mga magasing Ang Bantayanang Torre Nagapahayag sa Gingharian ni Jehova ug ang Pagmata!, nagpabilin ingong pangunang galamiton sa pagsangyaw ug paghimog tinun-an. (Mat. 24:14; 28:19, 20) Malipay kita sa pagtanyag kanunay niining duha ka nunot sa panahong mga magasin samtang kita nakigbahin sa lainlaing natad sa pag-alagad sa Gingharian.
2. Unsang mga kausaban ang gihimo diha sa Bantayanang Torre ug Pagmata!, ug ngano?
2 Sa daghang katuigan, atong nakita ang mga kausaban sa gidak-on ug sa kaundan sa mga magasin lakip na usab sa mga pamaagi sa pagtanyag niini. Kini nga mga kausaban gihimo aron ang mga magasin mahimong mas madanihon ug epektibo, aron ang mensahe sa Gingharian masilsil sa kasingkasing sa ‘tanang matang sa mga tawo aron sila maluwas ug makadangat sa tukmang kahibalo sa kamatuoran.’—1 Tim. 2:4.
3. Unsaon nato pagtanyag ang mga magasin diha sa ministeryo?
3 Sukad sa Enero 2006, hanas na kitang migamit ug lainlaing presentasyon sa binulan nga Pagmata! Ingon usab niana ang atong himoon sa dihang atong itanyag ang usa lamang sa duha ka isyu sa Bantayanang Torre diha sa kanataran. Ang gisugyot nga mga presentasyon sa matag magasin makita diha sa likod nga bahin sa Atong Ministeryo sa Gingharian. Kasagaran gipasiugda niini ang usa sa pangbukas nga mga artikulo sa magasin, apan usahay nagpasiugda usab kinig ubang mga artikulo nga makapainteres kaayo. Ang gipatik nga mga sugyot mas epektibo kon atong nabasa mismo ang gipasiugda nga artikulo ug ipresentar kana sa atong kaugalingong mga pulong diha sa teritoryo.
4. Nganong mapuslanon usab nga mogamit kitag laing mga presentasyon gawas pa sa gisugyot sa Atong Ministeryo sa Gingharian?
4 Bisan pag gipakita sa Atong Ministeryo sa Gingharian ang duha ka sugyot sa matag magasin, makahimo kitag kaugalingon natong presentasyon. Ato kining mahimo kay ang ubang mga artikulo mas mohaom sa atong teritoryo. O kaha atong gibati nga mas epektibo ang atong presentasyon kon mogamit kitag usa ka artikulo nga nakapainteres kanato.
5. Unsay angay natong himoon sa dili pa kita mag-andam ug usa ka presentasyon sa magasin nga atong itanyag?
5 Kon Unsaon Pag-andam ang Atong Presentasyon: Una sa tanan, angay natong sination pag-ayo ang artikulo nga atong itanyag. Kana wala magpasabot nga ato na gayong nasinati kanunay ang tanang artikulo sa magasin sa dili pa gamiton sa pagsangyaw. Hinuon, angay kitang magpakitag pagkasinsero ug kainit sa pagpresentar sa artikulo nga buot natong ipasiugda. Mahimo lamang nato kini kon nasinati kita pag-ayo sa mga impormasyon nga atong ipresentar.
6. Unsaon nato pag-andam ang atong kaugalingong mga presentasyon?
6 Angay usab kitang magmapailin-ilinon sa dihang mangandam kitag introduksiyon. Mahimo kitang mogamit ug usa ka haom ug makapainteres nga pangutana aron makasugod kita sa pagpakighisgot. Salig kanunay sa gahom sa Pulong sa Diyos nga maoy motukbil sa kasingkasing. (Heb. 4:12) Pagpilig usa ka teksto nga mohaom sa punto nga imong ipasiugda, labing maayo kon kana gikan sa artikulo nga imong itanyag. Isaysay ang kalambigitan niana sa artikulo.
7. Unsaon nato pagpauswag ang atong mga presentasyon?
7 Sa Tanang Kahigayonan: Aron mahimong epektibo ang usa ka presentasyon, angay nato kanang gamiton. Pakig-uban sa kongregasyon sa pagtanyag ug magasin sa adlawng Sabado. Itanyag kana ngadto sa mga tawo nga sa nangagi midawat nag ubang literatura. Itanyag usab kana sa imong mga ginadumalahag pagtuon sa Bibliya ug sa ubang mga tawo nga anaa sa dihang ikaw magbalik-duaw. Makatanyag usab kitag mga magasin sa mga tawo nga atong makaestorya samtang kita mamalit, magbiyahe o maghulat diha sa opisina sa doktor. Angay natong pauswagon ang atong mga presentasyon nga pagagamiton sa tibuok bulan.
8. Sa unsang mga paagi talagsaon ang Bantayanang Torre ug Pagmata!?
8 Ang mga magasing Bantayanang Torre ug Pagmata! maoy talagsaon tungod kay kini nagbayaw kang Jehova ingong Soberano sa Uniberso. (Buh. 4:24) Gihupay niini ang katawhan pinaagi sa maayong balita sa Gingharian sa Diyos ug nag-awhag kanila sa pagpakitag pagtuo kang Jesu-Kristo. (Mat. 24:14; Buh. 10:43) Dugang pa, kini nagbantay sa mga panghitabo sa kalibotan ingong katumanan sa tagna sa Bibliya. (Mat. 25:13) Tabangi ang mga tawo sa inyong teritoryo nga makapahimulos usab sa mga magasin pinaagi sa pagpangandam sa pagtanyag niana kanila sa tanang kahigayonan!
9. Unsay atong himoong pasukaranan aron makabalik-duaw?
9 Kon kita molampos sa pagtanyag ug magasin o kaha sa pagpakig-estorya bahin sa Bibliya sa usa ka tawo, pag-andam ug pangutana o makapahinuklog nga pamulong aron mahimong pasukaranan sa pagbalik-duaw ug sa usa ka panaghisgot. Kon kita masiboton sa pagtisok sa mga binhi sa kamatuoran, makalaom kita nga si Jehova magbukas sa kasingkasing sa mga tawong buot gayod mokat-on ug moalagad Kaniya.—1 Cor. 3:6.