Kon Unsaon Paggamit ang Panig-ingnan nga mga Presentasyon
1. Sa unsang paagi atong isipon ang gitaganang panig-ingnan nga mga presentasyon?
1 Ang panig-ingnan nga mga presentasyon sa pagtanyag sa atong mga magasin ug uban pang mga publikasyon regular nga makita diha sa Atong Ministeryo sa Gingharian. Sa dihang makig-ambit diha sa ministeryo, dili man kinahanglan nga atong isulti kining gisugyot nga mga presentasyon nga eksakto gayod sumala sa nasulat. Gitagana kini aron mohatag kanatog linangkob nga ideya kon unsay mahimo natong isulti. Kasagaran kita mas epektibo kon atong isulti ang mga presentasyon sa kaugalingon natong mga pulong. Ang pagpahayag sa atong kaugalingon sa natural nga paagi makatabang aron ang tagbalay mobating relaks ug mabanaag niana ang sinseridad ug kombiksiyon.—2 Cor. 2:17; 1 Tes. 1:5.
2. Nganong kinahanglan man natong tagdon ang lokal nga mga kostumbre sa dihang mangandam ug mga presentasyon?
2 Ipahiuyon ang Imong Presentasyon: Ang atong paagi sa pagpresentar sa maayong balita maapektohan gayod tungod sa lokal nga mga kostumbre. Mahimo mo bang timbayahon ang tagbalay ug dayon ipasulod ang imong presentasyon ngadto sa panaghisgot, o gidahom ba sa mga tawo sa imong teritoryo nga imo dayong isulti ang imong tuyo? Kana magkalainlain sa matag dapit ug usahay sa matag tawo pa gani. Gikinahanglan usab ang katakos sa pag-ila sa dihang mogamit ug mga pangutana. Ang mga pangutanang nahiangay sa pipila ka dapit basin di-maangayan sa mga tawo sa ubang dapit. Busa, kinahanglang gamiton nato ang maayong panghukom ug ipahiuyon ang atong mga presentasyon sumala sa kon unsay dinawat sa lokal.
3. Nganong ato mang tagdon ang gigikanan ug panghunahuna niadtong atong pakig-estoryahan?
3 Dugang pa, kinahanglan natong tagdon ang gigikanan ug panghunahuna sa mga tawo sa atong teritoryo sa dihang mangandam alang sa pagsangyaw sa kanataran. Pananglitan, lagmit lahi ang imong paagi sa paghisgot sa Mateo 6:9, 10 uban sa usa ka debotadong Katoliko kay sa paagi nga imong gamiton uban sa tawo nga di-sinati sa pag-ampong “Amahan namo.” Pinaagi sa diyutayng abanteng paghunahuna, kasagaran atong ikapahiuyon ang atong mga presentasyon aron kini mas madanihon ngadto sa mga tawo nga atong mahimamat diha sa ministeryo.—1 Cor. 9:20-23.
4. Nganong hinungdanon ang maayong pagpangandam?
4 Bisan tuod giplanohan natong gamiton ang usa ka panig-ingnan nga presentasyon nga susama sa nasulat, wala nay mas maayo pa sa maayong pagpangandam. Kinahanglan natong basahon pag-ayo ang artikulo o kapitulo nga giplanohan natong ipasiugda ug tan-awon ang mga punto nga makapukaw sa interes. Dayon ilakip kini sa atong presentasyon. Pinaagi lamang sa pagkahimong sinati sa maayong impormasyon nga anaa sa atong mga publikasyon nga kita makatanyag niana uban ang kadasig.
5. Nganong angay kitang mangandam ug laing presentasyon, ug sa unsang paagi mahimo nato kana?
5 Uban Pang mga Paagi: Kita ba gipugngan sa paggamit sa mga paagi nga gilaraw diha sa panig-ingnan nga mga presentasyon? Wala. Kon mas sayon alang kanimo ang paggamit sa laing paagi o laing teksto, gamita kana. Ilabina sa dihang magtanyag ug mga magasin, pangitag mga kahigayonan nga mapasiugda ang di-pangunang mga artikulo nga hayan magustohan gayod diha sa inyong teritoryo. Sa dihang ipasundayag ang mga presentasyon sa pagsangyaw sa kanataran panahon sa Tigom sa Pag-alagad, mahimong hikayon nga ipasundayag ang bisan unsang paagi nga epektibo diha sa lokal nga teritoryo. Niining paagiha matabangan ang tanan nga mapresentar ang maayong balita sa epektibong paagi.