Kon Kana Molampos, Gamita Kana!
1 Ang Atong Ministeryo sa Gingharian padayong nagatagana kanatog nagkadaiyang sinugyot nga mga presentasyon nga magamit diha sa ministeryo. Nagahatag kini kanatog bag-ong mga ideya kon unsaon paghaling ug interes diha sa mensahe sa Gingharian. Tingali nagapaningkamot ka sa matag bulan sa pagkat-on ug usa o dugang pa niining mga presentasyona. Bisan pa niana, ang pipila ka magmamantala hayan makakaplag nga sa dihang ila nang nagamit ang usa niini sa pipila ka higayon, ang laing isyu sa Atong Ministeryo sa Gingharian nagataganag bag-ong mga presentasyon. Dayag nga dili tingali posible alang sa matag usa ang pagkat-on ug usa ka bag-ong presentasyon sa dili pa mahanas ang una.
2 Siyempre, adunay linibong payunir ug ubang mga magmamantala kinsa nagagugol ug dakong panahon diha sa pag-alagad sa kanataran. Dugang pa, daghang kongregasyon ang nagakobre sa ilang bug-os nga teritoryo sa matag pipila ka semana. Niining mga kahimtanga, ang mga magmamantala mopabili sa pagbaton ug bag-ong mga paagi ug mga ideya sa pagpresentar sa mensahe. Magtabang kini kanila sa pag-ugmad sa ilang mga katakos. Magpahimo usab kini sa ilang ministeryo nga mas makapainteres ug mabungahon ug moabag kanila sa pag-atubang sa mga hagit nga ikahibalag.
3 Unsa man ang kahimtang, kon nakaandam ka ug presentasyon nga misaler pag-ayo sa pag-ugmad ug interes, sa walay pakyas padayona ang paggamit niana! Dili kinahanglang hunongon ang paggamit sa epektibong presentasyon sa dihang kana malamposon. Ipahiuyon lamang kana sa tanyag nga literatura sa maong bulan. Samtang imong sublion ang mga sugyot nga gitanyag diha sa Atong Ministeryo sa Gingharian, pangitaa ang makapainteres nga mga puntos nga hayan buot nimong ilambigit sa imong presentasyon.
4 Busa kon makadawat ka ug bag-ong gula sa Atong Ministeryo sa Gingharian, hinumdomi nga ang mga presentasyon nga anaa niana maoy mga sugyot lamang. Kon magamit nimo kana, maayo. Apan kon nakaplagan na nimo ang usa ka presentasyon nga milampos sa imong teritoryo, gamita kana! Ang hinungdanong butang mao nga “buhata sa bug-os ang imong ministeryo” sa maayong paagi, nga nagapangita sa mga takos ug nagabulig kanila nga mahimong mga tinun-an.—2 Tim. 4:5.