Ipakita ang Personal nga Interes—Pinaagi sa Pagkahimong Andam
1 Ang maayong pagpangandam alang sa ministeryo motabang kanato sa pagpakitag personal nga interes sa uban. Sa unsang paagi? Kon kita nakapangandam pag-ayo, kita dili kaayo maghunahuna sa atong igsusulti ug busa atong ikasentro ang atong pagtagad ngadto sa tagbalay. Dugang pa, kini motabang kanato sa pagbuntog sa kakulba ug sa ingon kita makasulti nga kinasingkasing. Apan, sa unsang paagi kita makapangandam ug epektibong presentasyon?
2 Gamita ang Haom nga Presentasyon: Pagpilig usa sa gisugyot nga mga presentasyon gikan sa Enero 2006 nga Atong Ministeryo sa Gingharian nga haom sa inyong dapit, ug hunahunaa kon unsaon nimo pagsulti kana sa kaugalingon nimong mga pulong. Ipahiuyon kini sa inyong teritoryo. Pananglitan, kon ikaw kanunayng makahibalag ug mga tawo nga laig relihiyon o kultura, hunahunaa kon sa unsang paagi ang imong presentasyon makapainteres kanila. Ang pagpahiuyon sa imong presentasyon ngadto sa mga tawo nga imong ikaestorya magbanaag sa imong sinserong interes kanila.—1 Cor. 9:22.
3 Samtang imong gamiton ang maong presentasyon, padayong ugmara kana. Tungod kay hinungdanon gayod ang imong introduksiyon, matikdi kon unsay sanong sa mga tawo niini. Nainteres ba sila sa maong ulohan? Mitubag ba sila sa mga pangutana nga imong gisukna? Kon wala, paghimog mga kausaban hangtod makakita kag epektibong presentasyon.
4 Mga Tabang sa Paghinumdom: Daghan ang nalisdan sa paghinumdom ug usa ka presentasyon sa dihang anaa na sila sa pultahan. Kon kanay mahitabo kanimo, imo na bang nasulayan ang pagbansaybansay sa maong presentasyon uban sa laing tawo? Kini makatabang kanimo sa paghinumdom sa mga ideya ug sa pagpresentar niini sa simple ug lohikal nga paagi. Kini makatabang usab sa pag-andam kanimo sa pagdumala sa lainlaing mga sanong sa mga tagbalay.
5 Ang laing tabang sa paghinumdom mao ang pagsulat ug usa ka mubong sumaryo sa presentasyon diha sa usa ka gamayng papel ug tan-awon kana sa dili pa ka moduol sa pultahan. Nakaplagan sa uban nga kining mubong pahinumdom makatabang kanila nga dili kaayo makulbaan ug sayon rang makapakig-estorya sa mga tawo. Niining mga paagiha, ang maayong pagpangandam makatabang kanato sa pagpakitag personal nga interes sa uban ug sa ingon mapauswag ang atong pagpresentar sa maayong balita.