‘Magmaandam Alang sa Tanang Maayong Buhat’
1 Sa dihang gisugdan ni Jesus ang usa ka bag-ong kampanya sa pagsangyaw, siya migugol ug panahon sa pag-andam sa iyang mga tinun-an. (Mat. 10:5-14) Bisan pag kitang tanan puliki, ang paggahin ug pipila ka minuto sa pagpangandam una moadto sa kanataran mopatunghag maayong mga resulta.—2 Cor. 9:6.
2 Kon Unsaon Pagpangandam: Ang maayong pagpangandam magsugod pinaagi sa pagsinati sa literatura nga buot natong itanyag. Angay usab natong hunahunaon ang mga tawo diha sa atong teritoryo. Unsang mga isyu ang ilabina gayong makapainteres kanila? Unsay kasagarang tinuohan sa mga tawo sa maong lugar? Mahimo natong tan-awon ang sugyot nga mga presentasyon sa Atong Ministeryo sa Gingharian ug sa librong Nangatarongan.
3 Ang pagpaminaw pag-ayo sa mga pasundayag panahon sa Tigom sa Pag-alagad makatabang usab kanato. Kon kanunay natong gamiton ang atong mga presentasyon, dili na kita kinahanglang mogugol pa ug taas nga panahon sa pagpangandam. Hinunoa, mahimo kitang mas epektibo kon pamalandongon una nato ang atong isulti ug maningkamot nga mapauswag ang atong mga presentasyon sa dili pa kita moadto sa kanataran. Angay usab natong susihon kon anaa na ba sa atong bag ang mga literatura nga atong gikinahanglan.
4 Unsay makatabang aron dili nato makalimtan ang atong presentasyon? Ang pagbansay-bansay sa kusog nga tingog makatabang aron magpabilin diha sa atong hunahuna ang buot natong isulti. Ang pipila mag-ensayo panahon sa pagtuon sa pamilya. Nakatabang sa uban ang pagsulat ug mubong sumaryo sa ilang presentasyon diha sa usa ka gamayng papel ug dayon pasiplatan kana sa dili pa manuktok sa pultahan.
5 Kon Nganong Mapuslanon: Ang maayong pagpangandam magpauswag sa atong kaepektibo ug kalipay diha sa pagsangyaw. Motabang kini kanato nga mobating relaks ug dili kaayo kulbaan samtang magsangyaw. Mahatagan usab natog dakong pagtagad ang tagbalay inay kay magsigeg hunahuna sa atong isulti. Dugang pa, kon nasinati kita sa atong literatura, mas epektibo kita sa pagtanyag niana.
6 Ang Kasulatan nag-awhag kanato nga ‘magmaandam alang sa tanang maayong buhat.’ (Tito 3:1) Wala na gayoy mas maayo pa nga buluhaton kay sa pagsangyaw sa maayong balita! Pinaagi sa maayong pagpangandam, atong mapakita ang atong pagtahod sa tagbalay nga buot mamati, ug kang Jehova, ang Diyos nga atong gihawasan.—Isa. 43:10.