Gamitang Bag-ong mga Hitabo sa Pagpukawg Interes
1 Buot ba nimong makabaton ug kanunayng suplay sa maayong mga ideya nga padayong magpalunhaw sa imong ministeryo ug magpukawg interes sa katawhan diha sa mensahe sa Bibliya? Nan gamita ang nagakahitabo sa kalibotan ug sa inyong komunidad sa pagsugod ug mga panaghisgot. Mahimo nimong gamiton ang bag-ong lokal ug nasodnong mga hitabo o internasyonal nga mga balita. Kining mga butanga kanunayng nagausab-usab. (1 Cor. 7:31) Tagda ang mosunod nga mga panig-ingnan.
2 Mga problema sa ekonomiya ug gugol sa panginabuhi maoy tinuod nga mga gikabalak-an sa mga tawo. Busa, ikaw tingali moingon:
◼ “Nadunggan ba nimo sa balita nga [isulti ang ulohan] ang mga presyo mitaas na usab?” O tingali ikaw mokomento bahin sa kawalay-trabaho kon ang dakong kompaniya nanangtang ug daghang trabahante. Nagdepende kon sa unsang paagi ikaw buot mopadayon sa panaghisgot, ikaw makapaloap pinaagi sa pagsuknang “Nahibulong ka ba sukad kon nganong lisod kaayo ang panginabuhi?” o “Naghunahuna ka bang kanunayng lisod ang pagpangitag pangabuhian?”
3 Mga taho sa kapintasan, sama sa mga trahedya sa mga pamilya o taliwala sa mga estudyante, magtaganag pasukaranan alang sa laing panaghisgot. Ikaw mahimong mosukna:
◼ “Nabasa ba nimo sa mantalaan nga [nganli ang trahedya sa komunidad]?” Dayon mangutana “Sa imong hunahuna unsay hinungdan sa daghan kaayong kapintasan sa kalibotan?” o “Naghunahuna ka ba nga moabot ra ang panahon sa dihang kita mahimong mobatig kasegurohan?”
4 Ang mga balita sa malaglagong mga baha, mga linog, o sibil nga kagubot sa lainlaing bahin sa kalibotan nagtagana usab ug materyal nga magpukawg interes. Pananglitan, ikaw tingali mosukna:
◼ “Ang Diyos ba ang responsable sa [nganli ang kinaiyanhong katalagman]?” O ikapunting mo ang kinaulahiang pagbuto sa sibil nga kagubot ug moingon: “Kon ang tanan buot ug kalinaw, nganong lisod kaayo kanang kab-oton?”
5 Padayong igmat sa bag-ong mga hitabo nga magamit nimo sa imong introduksiyon. Ang makatabang nga mga sugyot makaplagan ubos sa “Bag-ong mga Hitabo sa Adlaw,” sa panid 11, diha sa librong Nangatarongan. Apan, likayi ang pagdapig sa politikanhon o katilingbanong mga isyu. Hinunoa, itumong ang pagtagad sa Kasulatan ug sa Gingharian sa Diyos ingong ang bugtong permanenteng solusyon sa mga suliran sa katawhan.