Pagsangyaw Diha sa Kalibotan nga Kanunayng Nagakausab
1 Pagkadaling mausab sa mga butang! Sa usa lang ka gabii, ang kinaiyanhong katalagman, krisis sa ekonomiya, politikanhong kagubot, o gibandilyo pag-ayong trahedya mahimong ulohan sa panag-estorya. Apan, dali ra usab kaayong maliso ang atensiyon sa mga tawo ngadto sa laing mga butang. (Buh. 17:21; 1 Cor. 7:31) Niining kalibotan nga kanunayng nagakausab, sa unsang paagi atong makuha ang pagtagad sa mga tawo aron ikapaambit nato ang mensahe sa Gingharian ngadto kanila?
2 Ilha ang Ilang mga Gikabalak-an: Ang usa ka paagi sa pagkuha sa pagtagad sa mga tawo mao ang paghisgot sa bag-ong mga panghitabo. Sa pag-awhag sa iyang mga mamiminaw nga seryosong hunahunaon ang ilang baroganan uban sa Diyos, sa usa ka higayon gihisgotan ni Jesus ang di pa dugayng mga hitabo nga anaa sa ilang hunahuna. (Luc. 13:1-5) Sa samang paagi, sa dihang isangyaw ang maayong balita, labing maayo nga atong mahisgotan ang lab-as nga mga balita o lokal nga isyu nga makapainteres sa mga tawo diha sa atong teritoryo. Apan, sa dihang maghisgot sa maong mga butang, angay kitang magmabinantayon nga dili magdapigdapig sa politikal o sosyal nga mga isyu.—Juan 17:16.
3 Sa unsang paagi atong mahibaloan kon unsay gihunahuna karon sa mga tawo? Tingali ang labing maayong paagi mao lamang ang pagpangutana ug dayon maminaw. (Mat. 12:34) Ang interes sa mga tawo motukmod kanato sa pagmatikod sa panglantaw sa uban ug mataktikanhong magpakisayod ug dugang. Ang dihadihang komento sa tagbalay mahimong magpadayag sa gikabalak-an sa kadaghanan sa maong dapit ug mahimong maghatag ug kahigayonan sa pagpamatuod.
4 Pagpangandam ug Usa ka Presentasyon: Sa pagpangandam alang sa pagsangyaw sa kanataran diha sa kalibotan nga kanunayng nagakausab, magamit nato ang librong Nangatarongan. Ang mapuslanong mga sugyot kon unsaon paglangkit sa bag-ong mga hitabo ngadto sa atong presentasyon gilista diha sa mga panid 10-11, ilalom sa “Krimen/Kaluwasan” ug sa “Bag-ong mga Hitabo sa Adlaw.” Ang susamang impormasyon makita diha sa Septiyembre 2000 nga Atong Ministeryo sa Gingharian, panid 4. Sa dihang andamon ang inyong presentasyon, paneguroa nga malakip ang usa ka haom nga kasulatan.
5 Samtang matikdan nato ang kanunayng nagakausab nga mga gikabalak-an sa mga tawo diha sa atong teritoryo, kinahanglan natong ipasibo ang atong presentasyon sa maayong balita sumala niana. Nianang paagiha, atong maestorya ang mga tawo bahin sa dulot nga nakaapektar sa ilang kinabuhi. Sa ingon, makatabang kitag mas daghan pa nga makaila sa Usa nga may di-mausab-usab nga mga hiyas ug mga sukdanan.—Sant. 1:17.