Mga Paagi sa Pagpauswag sa Atong Pagsangyaw sa Gingharian
1 Ang atong pagsangyawng buluhaton labawng dinalian karon kay sukad masukad. Kon ang katawhan mabuhi ba o mamatay magadepende sa ilang reaksiyon sa maayong balita. (1 Ped. 4:5, 6, 17; Pin. 14:6, 7) Busa kanunay gayod natong paningkamotan nga mapauswag ang atong pagsangyaw sa Gingharian. Unsa man ang pipila ka paagi sa pagpauswag?
2 Pangandam Pag-ayo: Nga nagagamit sa kinabag-ohang gula sa Atong Ministeryo sa Gingharian, piliang presentasyon nga makadani sa katawhan sa inyong teritoryo. O mahimong buot nimong andamon ang usa ka kaugalingong presentasyon, nga magagamit sa mga Kasulatang imong nakaplagang epektibo. Gikinahanglan nimo ang makapukaw-interes nga pasiuna. (Tan-awang librong Nangatarongan, mga panid 9-15.) Tingali imong giplano nga mosuknag usa ka pangutana o pangayoon ang komento sa tagbalay maylabot sa usa ka lokal nga balita. Sa dihang anaa na sa imong hunahuna ang presentasyon, bansaya kana uban sa usa ka membro sa pamilya o laing magmamantala nga makahatag kanimog mga sugyot sa pagpauswag.
3 Pakigkukabildo sa Katawhan: Ang atong katuyoan mao ang paghatod sa hinungdanong mensahe. Kini mahimo pinaagig pakigkukabildo sa mga tawo. Kon ang tagbalay magapatunghag pagsupak o mohatag ug opinyon, paminawa pag-ayo ang iyang isulti. Ang iyang mga komento makatabang kanimo sa paghatag ug usa ka Kasulatanhong tubag. (1 Ped. 3:15) Kon ang iyang panglantaw wala mahiuyon sa Bibliya, makaingon ka: “Daghang tawo mibati ug sama nimo. Apan, niay laing paagi sa pagtagad sa ulohan.” Unya basaha ang tukmang teksto, ug kuhaa ang iyang komento.
4 Batoni ang Mapasiboong Eskedyol: Ang maayong pagpangandam diyutay ra unyag bili kon dili ka makahimo sa pagpakigsulti sa katawhan. Sa pipila ka dapit karon pipila lamang sa mga tagbalay ang anaa sa balay sa dihang kita moduaw. Kon tinuod kana sa inyong teritoryo, sulayi ang pagpasibo sa imong eskedyol aron nga ikaw makaduaw sa dihang dudaghan ang mga tawo nga anaa sa balay. Hayan ang labing maayong panahon sa pagduaw maoy sa mga hinapos sa semana; ang uban mahimong mas daling makontak sa sayong kagabhion. Ang mga tawo sagad mas relaks ug mas andam nga makigkukabildo nianang mga panahona.
5 Analisaha ang Pagkaepektibo sa Imong Presentasyon: Human sa pagbiya sa matag pultahan, suknaang kaugalingon: ‘Naabot ba nako ang kasingkasing sa tagbalay? Nadasig ba nako siya sa pagsulti ug naghatag pagtagad kon unsa ang iyang gisulti? Mataktikanhon ba ang akong pagtubag? Gigamit ba nako ang labing maayong paagi?’ Hayan makatabang ang pupanahong pagsangyaw kauban ang eksperyensiyadong magmamantala o usa ka payunir ug maminaw pag-ayo sa iyang mga presentasyon aron nga mapauswag ang imong kaugalingong pagkaepektibo sa ministeryo.
6 Kon ikaw mahanason sa imong buluhaton, mahimo nimong ikapaambit ang mga kamatuoran sa Gingharian nga “maluwas ang imong kaugalingon ug kadtong kinsa mamati kanimo.”—1 Tim. 4:16; Prov. 22:29.