Kon Unsaon Pagbansay ang mga Bag-ohan sa Pagsangyaw
1. Unsay imong gibati sa unang higayon nga ikaw nagsangyaw?
1 Nahinumdom ka ba sa unang higayon nga ikaw nagsangyaw sa balaybalay? Lagmit ginerbiyos ka. Kon kauban mo niadto ang imong magtutudlo sa Bibliya o ang laing magmamantala, nalipay ka gayod sa iyang tabang. Karon nga ikaw eksperyensiyado nang ministro, makatabang ka na sa mga bag-ohan sa pagsangyaw.
2. Unsay kinahanglang makat-onan sa bag-ohang mga magmamantala?
2 Ang bag-ohang mga magmamantala kinahanglang makakat-on kon unsaon pagpakig-estorya sa tagbalay, paggamit sa Bibliya, paghimog mga balikduaw, ug pagsugod ug pagdumalag mga pagtuon sa Bibliya. Angay usab silang makakat-on kon unsaon pagsangyaw sa lainlaing paagi, sama sa pagsangyaw sa kadalanan ug pagduaw sa mga tawo sa komersiyal nga mga dapit. Matabangan nimo sila nga mouswag niining mga bahina pinaagi sa imong panig-ingnan ug mga sugyot.
3. Sa unsang paagi ang atong panig-ingnan makatabang sa uban?
3 Pagtudlo Pinaagig Panig-ingnan: Gipasundayag ni Jesus sa iyang mga disipulo kon unsaon pagsangyaw. (Luc. 8:1; 1 Ped. 2:21) Kon makig-uban ka sa usa ka bag-ohan, andama ang usa ka yanong presentasyon nga mahimo niyang masundog. Makagamit ka ug usa ka sugyot nga anaa sa atong mga basahon. Dayon, ikaw ang mosangyaw sa una ug ikaduhang balay aron ang bag-ohan makadungog kon unsay imong isulti. Sa inyong pagpaingon sa laing balay, pakomentoha ang bag-ohan bahin sa imong epektibong presentasyon. Kini makatabang niya nga masabtan ang kahinungdanon sa pagsangyaw nga may mga kauban ug mas sayon niyang dawaton ang imong mga sugyot.
4. Sa unsang paagi makatabang kita sa usa ka bag-ohan human mamati sa iyang presentasyon?
4 Paghatag ug mga Sugyot: Si Jesus mihatag usab ug mga instruksiyon sa iyang mga disipulo kon unsaon pagsangyaw. (Mat. 10:5-14) Makatabang ka usab sa usa ka bag-ohan sa samang paagi. Kon iya nang turno sa pagsulti, pamati pag-ayo. Dayon, human makabiya sa balay, komendahi siya sa espesipiko ug sinserong paagi, bisan pag namatikdan nimong may mga bahin sa iyang presentasyon nga pauswagonon pa. Sa dili pa mohatag ug sugyot, panid-i una kon iya bang mapauswag ang iyang presentasyon sa sunod balay. Tingalig ginerbiyos lang siya. Hinumdomi usab nga ang mga magmamantala dili parehog abilidad, ug dunay lainlaing paagi sa pagsangyaw.—1 Cor. 12:4-7.
5. Unsay mahimong isulti sa dihang maghatag ug sugyot?
5 Usahay ang usa ka bag-ohan mangayo kanimog mga sugyot. Apan kon dili, pangitag paagi nga matabangan siya. Unsaon kini paghimo sa mataktikanhong paagi? Ang pipila ka eksperyensiyadong magmamantala moingon, “Aduna koy isugyot nimo, unsa kaha kon . . . ?” Ang laing paagi mao ang pag-ingon, “Sa dihang bag-ohan pa ko, nalisdan ko sa . . . , apan nakatabang kanako ang . . . . ” Usahay, makatabang kon inyong tan-awon ang librong Nangatarongan. Aron dili siya malisdan, paghatag ug mga sugyot sa usa lamang ka aspeto sa iyang presentasyon.
6. Diha sa pagsangyaw, sa unsang paagi ‘ang puthaw makapahait sa puthaw’?
6 Ang Puthaw Makapahait sa Puthaw: Si Timoteo, nga usa ka eksperyensiyadong ebanghelisador, gidasig ni Pablo nga padayong magmakugihon sa pagpanudlo ug ipadayag ang pag-uswag. (1 Tim. 4:13, 15) Bisan pag daghang katuigan na ang milabay sukad sa imong unang pagsangyaw, dili ka angayng mohunong sa pagpaningkamot nga mouswag. Paniid sa imong mga kauban sa pagsangyaw, bisan niadtong dili pa kaayo eksperyensiyado. Magmaigmat sa pagtabang sa uban sa malulotong paagi, ilabina sa mga bag-ohan aron mahimong hanas nga mga ministro sa maayong balita.—Prov. 27:17.