Magtibuok-Kalag sa Ministeryo sa Kanataran
Bahin 3—Motabang sa Kauswagan sa Uban
1 Ang relasyon tali sa mas hamtong-edad nga si brother Pablo ug sa debotado batan-ong lalaking si Timoteo sagad na nga gisitar ingong maayo kaayong panig-ingnan sa pagbansay alang sa ministeryo. (1 Cor. 4:17) Si Timoteo gitultolan ni Pablo sa pagtug-an ngadto sa uban sa samang kahibalo ug pagbansay nga iyang nadawat. (2 Tim. 2:1, 2) Makaayo kanato ang pagsunod sa samang paagi diha sa kongregasyon karong mga adlawa.
2 Bansaya ang Uban: Ang panginahanglan sa pagbansay mahimong dayag sa dihang atong amgohon nga sa Pilipinas karon adunay 13,000 nga mas pang mga magmamantala kay sa tulo ka tuig nga miagi. Lagmit gayod nga ang kadaghanan niini kanila makabenepisyo gikan sa pagbansay nga ikahatag sa eksperiyensiyadong mga magmamantala. Usa ka sister nga sagad migugol ug usa o duha ka oras lamang sa usa ka bulan diha sa pag-alagad sa kanataran nakakat-on sa epektibong pagsangyaw diha sa mga pultahan sa dihang gitabangan sa bansay nga magmamantala. Nawagtang ang iyang kanhing pag-ukon-ukon sa pagpakig-ambit sa ministeryo, ug siya nahimong masibotong magmamantala sa maayong balita. Karon ingong hanas nga payunir, siya nahinumdom ug nag-ingon: “Ang ako lang gayong gikinahanglan mao nga matudloan kon unsay isulti, ug unya misugod ako sa pagkalipay sa ministeryo.”
3 Kon ikaw usa ka ansiyano, ministeryal nga alagad, o payunir, o eksperiyensiyadong magmamantala, sa unsang paagi makatabang ka sa progreso sa uban? Ang unang tikang mao ang pagpahibalo sa imong konduktor sa Pagtuon sa Libro sa Kongregasyon nga ikaw buot nga moabag sa laing magmamantala.
4 Mahimong Organisado ug Andam: Makabulig nga adunay tinong kasabotan nga magkuyog sa pagsangyaw. Hayan makulbaan ang imong kauban o di-seguro sa iyang kaugalingon sa sinugdanan, pero siya moapresyar nga adunay kauban niya sa pagsangyaw aron sa pagtabang kon ang panginahanglan motungha. (Eccl. 4:9) Kon posible, pilia ang teritoryong lagmit inyong mahibalag ang mga tawo nga mahinangop makighisgot sa mga tema sa Bibliya. Kini mobulig sa bag-ohan sa pagkalangkit ug sa ingon makabatog pagsalig.
5 Sa pagpadayon sa mauswagong pagbansay, makaayong hisgotan ang paagi sa paghimog balikduaw sa interes nga nakaplagan. Nagalangkit kanag pagpahimutang sa pasukaranan sa unang duaw pinaagig pagbilin ug usa ka pangutana sa tagbalay nga tubagon sa dihang kamo mobalik. Paneguroa nga makaandam ang di pa bansay nga magmamantala, ug dayon ubanan siya sa maong duaw. Kon ang usa ka pagtuon masugdan ug ang bag-ohang magmamantala di pa gihapon masaligon sa iyang kaugalingong katakos, ang mas bansay nga magmamantala basin maoy modumala sa pagtuon sa pipila ka higayon hangtod ang bag-ohan mahimo nang takos sa pagbanos.
6 Uban sa kusog nga pagsulod sa mga bag-ohan sa organisasyon, ang kaalam sa pagtaganag bug-os nga edukasyon diha sa ministeryo sa kanataran mahimong madayganon gayod. Ang tabang gikinahanglan gikan kanilang nakaugmad na sa ilang mga kahanas diha sa buluhatong pagsangyaw. Kon ikaw makatabang sa lain, ngadtongadto siya usab mahimong “may igong katakos sa pagtudlo sa uban.”—2 Tim. 2:2.