Pagpas-an sa Atong mga Kaakohan sa Pagbuhat ug Maayo sa Uban
1 Ang apostol nga si Pablo mitambag sa unang-siglong mga Kristohanon: “Ayawg kalimot sa pagbuhat ug maayo ug sa pagpaambit sa mga butang sa uban.” (Heb. 13:16) Ang ilang mga panlimbasog sa pagtabang sa ilang mga igsoon bisan ubos sa malisod nga mga kahimtang magpalig-on sa ilang gugma sa Diyos ug sa usag usa. (Juan 13:35) Kita usab gidasig sa pagbuhat sa maayo ug sa pagpaambit sa uban.
2 Tungod niining tumonga, si Jehova naghimog tagana alang kanato nga mapakaon ug maayo ug masangkapan gayod sa espirituwal nga paagi. Pagkadakong bahandi sa impormasyon nga atong nabatonan diha sa matag gula sa Bantayanang Torre ug Pagmata! Pagkadakong kalipay nga atong matagamtam sa pagbasa sa kada gula sa sayo nga maarangan human madawat kini! Sa pagpalandong sa Kasulatanhong impormasyon, mahimong atong ikanota ang mga puntos nga magamit sa ministeryo sa kanataran maingon man sa atong mga pagsultihanay sa uban. Sa susama, mahimong pahimuslan ta ang panahon sa pag-andam sa matag tigom ug ilabina para sa senemanang pagtagad sa Ang Bantayanang Torre. Ang personal nga pagtuon sa Pulong sa Diyos makabulig kanato sa pag-ugmad “sa hunahuna ni Kristo” ug magpaarang kanato sa pagsugid kon unsa ang maayo ngadto kanilang atong mahibalag.—1 Cor. 2:12-14; Sal. 19:14.
3 Mga Kaakohang Angay Dawaton: Ang tanang makadangat sa paghigugma kang Jehova magpahinungod sa ilang kinabuhi ngadto kaniya. Pinaagig pagdawat sa mga kaakohan nga nalambigit sa pahinungod, atong ginapasundayag nga kita dapig kang Jehova ug mibulag na sa atong kaugalingon gikan sa kalibotan ni Satanas ug sa makadaot nga mga paagi niana. Pinaagig pagsunod sa sumbanan nga gibilin ni Jesu-Kristo, atong gipahimutang ang maayo kaayong panig-ingnan alang sa uban. (1 Ped. 2:21) Ang sirkitong asembliyang mga programa sama nianang gilaraw alang sa 1992, uban sa tema niining “Pagpas-an sa Atong Kaugalingong Lulan sa Kaakohan,” magpalig-on kanato sa pagkinabuhi sumala sa atong pahinungod.
4 Ang regular nga pagtambong sa mga tigom sa kongregasyon magpatugot kanato nga ipaambit ang makapalig-ong mga puntos sa usag usa. Ang atong personal nga pagtuon ug pagpangandam alang sa mga tigom magtagana kanatog maayo gayong impormasyon nga atong ikapaambit. Ang pagpakita sa maong personal nga interes sa uban magpalambog mainit, mahigalaong espiritu sa pamilya. Pinaagig pag-amot ngadto sa mga tigom, atong ginapakita nga kita nagauyon gayod sa mga pulong ni Pablo nga natala sa Hebreohanon 10:24, 25 ug nagadawat sa atong kaakohan sa pagpalig-on sa uban.
5 Kab-ota ang Dugang mga Kaakohan: Sa 1992 nga tuig sa pag-alagad, kita ba makapangab-ot sa dugang mga kaakohan, sama sa katabang o regular payunir nga pag-alagad? Inay kay tagdon ang hilabihang pagpasiugda sa kinahanglanon sa oras, nganong di puntingon ang pagtagad sa dugang kahigayonan sa buluhatong pagpanigom? (Juan 4:35, 36) Ang regular nga pagsangyaw uban sa laing takos nga mga magmamantala ug mga payunir moabag kanato sa pagpauswag sa atong mga kahanas sa ministeryo. Ang nagauswag nga gidaghanon sa mga katabang nga payunir usab ingong maayong pagpadasig ngadto sa kongregasyon. Kon posible, nganong di moaplay ingong regular payunir o hikayon nga mahimong oksilyare payunir sa regular nga paagi o sa masubsob kutob sa maarangan niining tuiga?
6 Ang mga kaakohan andam man nga ikapaabot ngadto sa takos dedikado ug bawtismadong lalaking mga membro sa kongregasyon. (1 Tim. 3:1-l0, 12, 13) Ang tanan makapasundayag sa ilang kahinangop sa pag-alagad pinaagig ilang napalandong-kaayong mga komento diha sa mga tigom, pakig-ambit sa Teokratikanhong Ministeryong Tunghaan, ug pagdawat sa mga asaynment nga ipresentar ang usa ka pasundayag o sa pag-atiman sa ubang mga bahin diha sa Tigom sa Pag-alagad. Bisan ang mga bata mahimo mang sumbanan niining mga paagiha ug sa ilang pamatasan diha sa Kingdom Hall. Sila makabulig man uban sa ilang grupo sa pagtuon sa libro sa dihang itudlo sa paghinlo sa Kingdom Hall o sa pag-atiman sa uban pang maong mga panginahanglan.
7 Si Jesus mipatugbaw sa iyang kahinangop sa pagdawat sa kaakohang pagbuhat ug maayo ngadto sa uban duyog sa mga pulong: “Buot ko.” (Luc. 5:12, 13) Sa pagsundog sa iyang panig-ingnan kita usab makapalig-on ug makatabang sa atong mga igsoon, mga interesado, ug sinserong mga tawo nga atong mahibalag sa pag-alagad sa kanataran aron regular nga makig-uban sa kapunongan ni Jehova. Ang pagdawat sa atong kaakohan sa “pagbuhat kon unsa ang maayong ngadto sa tanan” nagakinahanglag determinadong panlimbasog ug hayan ang personal nga sakripisyo sa atong bahin. (Gal. 6:10) Apan sa dihang atong makita ang maayo nga nalampos, kita makauyon kang Pablo, kinsa miingon: “Uban sa maong mga halad ang Diyos nahimuot gayod.”—Heb. 13:16.