Pangutana

◼ Sa unsang paagi pagaisipon ang pag-alagad ingong usa ka oksilyare payunir?

Ang pag-oksilyare payunir kinahanglang isipong usa ka pribilehiyo ug usa ka seryosong kaakohan. Tinagpulo ka linibo sa mga magmamantala kada bulan ang natudlong mag-alagad ingong oksilyare nga mga payunir, ug ang pipila nagabuhat niana nga mapinadayonon. Atong gidayeg kining mga masibotong magmamantala kansang mga sirkumstansiya nagatugot kanila sa paggugol sa gikinahanglang 60 ka oras sa pag-alagad sa kanataran sa matag bulan nga sila nagaalagad ingong oksilyare nga mga payunir. Ang mga ansiyano maingon man ang uban kinahanglang magadasig sa mga magmamantala nga miaplay sa oksilyare payunir nga pag-alagad nga seryosong maghupot sa ilang pagkatinudlo ug likayan ang bisang unsang hilig sa kasuwal o di-mabinantayon nga tinamdan.

Maingon sa regular nga mga payunir, kadtong mobulontaryo ingong oksilyare nga mga payunir sa usa o kapin pang mga bulan kinahanglang magkuwenta unà sa galastohan. (Luc. 14:28) Kini nagalakip sa pagtino nga abante sa panahon kon sila ba makataronganong makadahom nga makagugol sa gikinahanglang gidaghanon sa panahon diha sa ministeryo sa kanataran sa walay pagpasagad sa ubang Kristohanong mga kaakohan. Ang desisyon sa usa ka tawo sa pagpalista ingong oksilyare payunir kinahanglang himoon human sa mainampoong pagtagad sa iyang personal nga mga sirkumstansiya. Kinahanglang dili kini tinukmod sa mga emosyon nga napalihok tungod kay nagaaplay ang uban. Kinahanglang kini maoy makataronganong desisyon, nga inubanan sa paghimog sinulat nga eskedyol sa pagtuman sa mga kinahanglanon. Importante nga maampingong basahon ang aplikasyon ug modesider diha sa kaugalingong kasingkasing nga siya sa pagkamatinud-anon makaingong oo sa kon unsay gikinahanglan.

Siyempre, ang dugang panlimbasog nalangkit. Ang pipila ka bulan sa tuig nagahatag ug maayo sa ilang kaugalingon nga mahimong “puliki kaayo” sa pagsangyaw sa maayong balita. (Buh. 18:5) Kini nagalakip sa panahon sa Memoryal sa Marso, Abril, ug Mayo ug ang mga bulan sa dihang moduaw sa kongregasyon ang magtatan-aw sa sirkito. Daghang magmamantala ang malipayong nagadisiplina sa kaugalingon sa pagsunod sa maorag mapig-otong eskedyol aron mabatonan ang dugang pakig-ambit sa pagsangyawng buluhaton sulod niining mga hugnaa sa espesyal nga kalihokan, nga nagapabili nga ang sagad nga resulta mao ang dagayang mga panalangin. (2 Cor. 9:6) Daghang magmamantala nagahimog espesyal nga mga paningkamot sa pagpayunir sa mga bulang tingbakasyon ug bisan unsang bulan sulod sa tuig nga may lima ka hinapos nga semana. Pero sa dihang nagaaplay, ilang ginapabilhan ang panginahanglan sa pagtapot sa prinsipyo nga ‘Pasagding ang imong Oo nagakahulogag Oo’ pinaagig pagbuhat sa ilang maarangan sa pagtahog 60 o labaw pang mga oras kada bulan nga sila nagaalagad ingong oksilyare nga mga payunir.​—Mat. 5:37.

Ang mga magmamantala nga dili makapayunir makabulig pinaagig pagkaandam sa ilang kaugalingon nga makaduyog uban sa oksilyare nga mga payunir, nga maghikay ug tinong mga kasabotan kanila. Mapuslanon ang pagpabilin nga dugaydugay diha sa pagsangyaw uban sa mga payunir sa dihang posible. Ang mga payunir ilabinang magapabili sa suportar sa ubang mga magmamantala sa sayong kabuntagon, sa mahapon, o sa sayong mga oras sa kagabhion. Ang oksilyare nga mga payunir malipay nga dapiton sa pagkuyog sa uban sa paghimog mga balikduaw ug pagsugod ug mga pagtuon sa Bibliya sa balay. Busa kadtong kinsa maabagon sa oksilyare nga mga payunir makaani sa mas dakong kalipay nga moabot tungod sa paghatag.​—Buh. 20:35.

Ang kakugi diha sa bahin sa daghang oksilyare payunir gipabilhan gayod. Kadtong makaarang sa pakig-uban kanila makadahom ug dagayang mga panalangin. (Prov. 10:4) Kanus-a man ikaw sunod nga makig-ambit sa mga kalipay sa napauswag nga kalihokan ingong usa ka oksilyare payunir?