Usa ka Maayong Tumong Alang sa Bag-ong Tuig sa Pag-alagad
1. Unsang tumong ang mahimo natong hunahunaon alang sa bag-ong tuig sa pag-alagad?
1 Kinahanglang maghimo kitag mga tumong kon buot kitang mouswag sa espirituwal. Unsay imong mga tumong alang sa bag-ong tuig sa pag-alagad? Ang usa ka maayong tumong mao ang pag-oksilyare payunir sulod sa usa o kapin pang mga bulan. Sanglit kining makapahimuot nga kalihokan nagkinahanglan man ug abanteng pagplano, karon na ang maayong panahon sa paghimo niana. Busa, nganong dili hunahunaon ang pag-oksilyare payunir ingong tumong?
2. Nganong himoong tumong ang pag-oksilyare payunir?
2 Kon Nganong Mag-oksilyare Payunir: Ang pag-oksilyare payunir magpaarang kanato sa pagpahimuot sa atong langitnong Amahan sa “mas bug-os pa” tungod sa paggugol natog dugang panahon sa ministeryo. (1 Tes. 4:1) Samtang atong tagdon ang tanang nahimo ni Jehova alang kanato, madasig ang atong kasingkasing sa pagsugilon sa uban bahin kaniya. (Sal. 34:1, 2) Makita ug pabilhan ni Jehova ang atong mga paningkamot sa paghimo ug dugang pa sa ministeryo. (Heb. 6:10) Kita magmalipayon gayod tungod kay kita nahibalo nga atong mapahimut-an si Jehova pinaagi sa atong pagkugi.—1 Cron. 29:9.
3, 4. Sa unsang paagi makakuha kitag kaayohan sa pag-oksilyare payunir?
3 Kasagaran, kon kanunay mong buhaton ang usa ka butang, kini mahimong mas sayon ug mas makalingaw. Pinaagi sa paggugol ug dugang panahon sa ministeryo, ikaw mobating mas masaligon sa dihang mamalaybalay. Ikaw mas mahanas sa pagsugod sa pagpakig-estorya ug sa paggamit sa Bibliya. Kon kanunay kang makig-estorya bahin sa imong pagtuo, mas molig-on pa kini. Daghang walay ginadumalahag pagtuon sa Bibliya nakasugod ug usa samtang nag-oksilyare payunir.
4 Ang pag-oksilyare payunir makadasig usab kanimo sa pagpauswag sa naandang espirituwal nga rutina. Gibati sa usa ka kanhing regular payunir nga gihatagan niyag dakong panahon ang iyang sekular nga trabaho ug nakahukom siya sa pag-oksilyare payunir ug usa ka bulan. Siya miingon: “Nalig-on gyod ang akong espirituwalidad sulod nianang usa ka bulan! Nakahukom ko nga padayong mag-oksilyare payunir, ug karon ako regular payunir na usab.”
5. Sa unsang paagi atong mabuntog ang pagbati nga kulang ug katakos?
5 Pagbuntog sa mga Babag: Ang uban magpanuko sa pag-aplay tungod kay gibati nilang kulang silag katakos ingong mga magwawali. Kon nagtuo ka nga dili ka makaoksilyare payunir tungod niini, si Jehova motabang kanimo sama nga iyang gitabangan usab si Jeremias. (Jer. 1:6-10) Bisan tuod si Moises “mahinay sa baba ug mahinay sa dila,” gigamit siya ni Jehova sa pagpalampos sa Iyang kabubut-on. (Ex. 4:10-12) Kon mibati kang walay katakos, pangamuyo kang Jehova alang sa kaisog.
6. Sa unsang paagi makaoksilyare payunir ang mga luyag panglawas o puliki ug eskedyul?
6 Nagpanuko ka ba sa pag-oksilyare payunir tungod sa luya nga panglawas o puliki nga eskedyul? Kon luya kag panglawas, agda lang ang imong kusog ug makaoksilyare payunir ka gihapon. Kon puliki kag eskedyul, mahimong ieskedyul mo sa laing bulan ang dili-kaayo hinungdanong mga kalihokan. Ang uban nga may bug-os panahong trabaho nagbakasyon ug usa o duha ka adlaw aron makaoksilyare payunir.—Col. 4:5.
7. Nganong maayong iampo ang tinguha nga mag-oksilyare payunir?
7 Kon Unsay Angayng Himoon: Iampo ang imong tinguha nga mag-oksilyare payunir. Hangyoa si Jehova sa pagpanalangin sa imong mga paningkamot sa pagpauswag sa imong ministeryo. (Roma 12:11, 12) Siya makatabang kanimo sa paghimog maalamong mga desisyon kon unsaon pagpasibo ang imong eskedyul. (Sant. 1:5) Kon kulang kag kadasig, hangyoa si Jehova nga tabangan kang magmalipayon sa buluhatong pagsangyaw.—Luc. 10:1, 17.
8. Sa unsang paagi ang pagpadapat sa Proverbio 15:22 makapaarang kanimo sa pag-oksilyare payunir?
8 Hisgoti ingong pamilya ang tumong nga mag-oksilyare payunir. (Prov. 15:22) Tingali makaoksilyare payunir ang usa ka membro sa pamilya pinaagi sa tabang sa uban diha sa panimalay. Ipakigsulti sa uban diha sa kongregasyon ang imong tinguha nga mag-oksilyare payunir, ilabina niadtong may mga kahimtang nga susama sa imoha. Pinaagi niini madasig usab ang uban nga mag-oksilyare payunir.
9. Unsang mga bulana ang mahimo mong pilion nga mag-oksilyare payunir?
9 Samtang imong susihon ang imong eskedyul sa ministeryo alang sa bag-ong tuig sa pag-alagad, kanus-a ka kaha makaoksilyare payunir? Kon bug-os panahon kang nagtrabaho o nag-eskuyla, mahimong tagdon mo ang mga bulan nga may pista opisyal o kanang may tagilma ka Sabado ug Dominggo. Pananglitan, ang Septiyembre, Disyembre, Marso, ug Agosto may tagilma ka Sabado ug Dominggo. Ang Mayo may lima ka Sabado, ug ang Hunyo may lima ka Dominggo. Kon may suliran ka sa panglawas, tagda ang mga bulan nga kasagarang maayog panahon. Basin makapayunir ka usab sa bulan atol sa duaw sa magtatan-aw sa sirkito sa inyong kongregasyon. Sa iyang pagduaw, aduna kay dugang pribilehiyo sa pagtambong sa unang katunga sa miting nga himoon uban sa mga regular payunir. Sanglit ang Memoryal maatol man sa Marso 22 sa sunod tuig, ang Marso, Abril, ug Mayo maoy maayong mga kapilian. Kon makapili ka nag bulan o mga bulan nga gusto mong mag-oksilyare payunir, pagsulat dayon ug eskedyul nga magpaarang kanimo sa pagkab-ot sa kinahanglanong oras.
10. Unsay imong mahimo kon dili ka gayod makaoksilyare payunir?
10 Bisan kon sa imong pagtuo dili ka makaoksilyare payunir sa umaabot nga tuig sa pag-alagad, ikapakita mo gihapon ang espiritu sa pagpayunir. Buhata ang kutob sa imong maarangan sa ministeryo, nga masaligong si Jehova nahimuot sa imong tibuok-kalag nga pagpaningkamot sa paghatag kaniya sa imong kinamaayohan. (Gal. 6:4) Paluyohi ang uban, ug dasiga kadtong makaoksilyare payunir. Tingali imong mapasibo ang imong eskedyul aron makapakigbahin ka sa ministeryo ug dugang usa ka adlaw sa semana uban sa mga nagpayunir.
11. Nganong angay kitang mobati nga dinalian ang atong panahon?
11 Ang katawhan ni Jehova nakasabot nga dinalian ang atong panahon. Aduna pay buluhaton nga kinahanglang himoon, ang pagsangyaw sa maayong balita. Nameligro ang kinabuhi sa mga tawo ug nagkamubo na ang panahon. (1 Cor. 7:29-31) Ang gugma alang sa Diyos ug sa atong mga isigkatawo maoy modasig kanato sa pagbuhat kutob sa atong maarangan diha sa ministeryo. Pinaagig paningkamot ug maayong pagplano, kita makaoksilyare payunir ug labing menos usa ka bulan sa bag-ong tuig sa pag-alagad. Usa gayod kini ka dalayegong tumong!