Kaylap nga Imantala ang mga Kahamili ni Jehova
1. Unsay modasig kanato sa pagmantala sa mga kahamili ni Jehova?
1 “Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad; tungod kay ang tanang butang sa mga langit ug sa yuta imo.” (1 Cron. 29:11) Sa unsang paagi ang atong gugma ug pagpabili alang kang Jehova makaapektar kanato? Kini modasig kanato aron ‘kaylap nga imantala ang mga kahamili sa usa nga nagtawag kanato gikan sa kangitngit ngadto sa iyang katingalahang kahayag.’ (1 Ped. 2:9) Kita dili gayod mohunong sa pagsulti sa uban bahin sa atong dakong Diyos! Kita may talagsaong mga kahigayonan sa pagmantala sa mga kahamili ni Jehova sa mga bulan sa Marso, Abril, ug Mayo.
2. Unsang espesyal nga kampanya ang giplano aron ianunsiyo ang Memoryal, ug kinsay mahimong makigbahin niini?
2 Espesyal nga Kampanya sa Pag-anunsiyo sa Memoryal: Sa Lunes, Abril 2, atong ipasiugda ang mga kahamili ni Jehova pinaagi sa pagsaulog sa Panihapon sa Ginoo. Usa ka espesyal nga imbitasyon alang niining importanteng okasyon ang ipanagtag sa tibuok kalibotan sukad sa Marso 17 hangtod sa Abril 2. Ang tanan gidasig sa pagpakigbahin sa bug-os. Kini maoy maayo kaayong panahon alang sa mga bag-ohan sa pagsugod sa pagmantala sa maayong balita kon sila mokuwalipikar. Kon aduna kay mga estudyante sa Bibliya o mga anak nga mokuwalipikar, pakigsultihi dayon ang mga ansiyano.
3. Unsay mahimo natong isulti sa pagdapit sa mga tawo sa pagtambong sa Memoryal?
3 Kini nga kampanya susama sa atong gihimo labot sa “Ang Kaluwasan Haduol Na!” nga Distritong mga Kombensiyon. Ang mga kongregasyon padad-an ug igong mga imbitasyon aron ang matag magmamantala makabaton ug tag-50 ka kopya. Mub-a lang ang imong isulti, tingali moingon ka: “Para nimo kining imbitasyona alang sa umaabot nga hinungdanong okasyon nga ginahimo kada tuig. Amo ka gayong abiabihon. Palihog basaha lang ang mga detalye diha sa imbitasyon.” Pero kon may mga pangutana ang tagbalay, tubaga kini. Atong magamit ang impormasyon diha sa apendise bahin sa Panihapon sa Ginoo nga nagsugod sa panid 206 sa librong Gitudlo sa Bibliya aron sa pagpatin-aw niini. Sa mga hinapos sa semana, atong itanyag ang bag-ong mga magasin uban sa espesyal nga imbitasyon. Isulat ang tanang nagpakitag interes, ug hikaya nga makabalik ka pag-usab.
4. Sa unsang paagi ipanagtag ang espesyal nga mga imbitasyon sa Memoryal?
4 Kon mahimo, kining espesyal nga imbitasyon kinahanglang personal nga itunol sa matag tagbalay. Kon gamay ra ang inyong teritoryo, isulat kadtong mga wala sa balay ug paningkamoting makabalik sa sunod higayon. Kon dako ang teritoryo sa inyong kongregasyon, mahimong mohukom ang mga ansiyano nga ang mga imbitasyon kinahanglang ibilin sa maalamong paagi diha sa mga balay nga walay tawo. Paneguroa nga ang inyong mga balikduaw, estudyante sa Bibliya, paryente, kauban sa trabaho, silingan, ug uban pang mga kaila mahatagan ug imbitasyon.
5. Nganong angay na kitang magplano karon sa pag-oksilyare payunir?
5 Pag-oksilyare Payunir: Imo bang ikamantala sa mas bug-os pa ang mga kahamili ni Jehova pinaagi sa pag-oksilyare payunir sa Marso, Abril, ug Mayo? Ang paghimo niana magkinahanglan gayod ug pipila ka pagpasibo sa imong adlaw-adlaw nga eskedyul. (Efe. 5:15-17) Makaseguro ka nga ang pagpaningkamot sa paghimog dugang pa sa pag-alagad kang Jehova makahatag ug kalipay ug panalangin ni Jehova. (Prov. 10:22) Sanglit haduol na ang Memoryal, karon na ang panahon sa paghimog mga plano.—Prov. 21:5.
6. Unsay atong makat-onan gikan sa kasinatian sa 90-anyos nga sister nga nag-oksilyare payunir sa miaging tuig?
6 Ang usa ka 90-anyos nga sister nakapribilehiyo sa pag-oksilyare payunir sa miaging tuig. Siya miingon: “Bisan pag ganahan gayod akong mananom, akong naamgohan nga kinahanglan nakong tinoon ang akong mga prayoridad. Kay gusto man nakong unahon ang mga intereses sa Gingharian, ako mihukom sa pag-oksilyare payunir sa Marso.” Gipanalanginan ba siya sa iyang mga paningkamot? Siya miingon, “Mibati akong mas nasuod sa kongregasyon, ug kini mas nakapasuod pa kanako kang Jehova.” Ato bang matimbangtimbang ang atong mga prayoridad ug mohimog susamang mga pagpasibo kon gikinahanglan?
7. Lisod ba ang pag-oksilyare payunir?
7 Ang pagkab-ot sa kinahanglanong oras sa oksilyare payunir nga 50 ka oras dili ra tingali lisod kay sa imong gihunahuna. Mainampoong pamalandonga ang imong adlaw-adlaw nga mga kalihokan, paghimog eskedyul, ug dayon isulat kana sa imong teokratikanhong kalendaryo. Ikaw ang mas nasayod sa kaugalingon nimong kahimtang. Kon dili ka maayog panglawas ug dali rang kapoyon, tingali makasangyaw ka ug pipila lang ka oras kada adlaw. Kon ikaw may bug-os-panahong trabaho o nagtungha, tingali makaoksilyare payunir ka pinaagi sa pagsangyaw magabii o sa mga hinapos sa semana.
8. Unsay nakapaarang sa usa ka magtiayon sa pag-oksilyare payunir?
8 Daghang pamilya ang nakahimo sa pag-oksilyare payunir. Sa miaging mga tuig, dihay magtiayon nga nagpanuko sa pag-aplay tungod kay gibati nila nga dili sila makaoksilyare payunir tungod sa ilang mga kahimtang. Unsay ilang gihimo bahin niana? “Nag-ampo kami kang Jehova sa pagtabang kanamo sa pagbuhat sa gusto namong buhaton sa dugay nang panahon.” Uban ang maayong pagplano sila nakapayunir. Sila midugang: “Talagsaon gayod kadto. Gipanalanginan gayod kami. Ang among sugyot mao nga sulayi kini. Kon kami nakahimo niini, kamo makahimo usab niini.”
9. Unsay mahimo ninyong himoon sa sunod nga pagtuon sa pamilya agig pagpangandam sa umaabot nga mga bulan sa espesyal nga kalihokan?
9 Paggahin ug panahon sa sunod ninyong pagtuon sa pamilya aron hisgotan kon sa unsang paagi ang tanang membro makapauswag sa ilang kalihokan sa umaabot nga mga bulan. Bisag dili makaoksilyare payunir ang tibuok pamilya, tingali may usa nga makaoksilyare payunir sa tabang ug kooperasyon sa ubang mga membro sa pamilya. Kon wala bisag usa, lagmit makahimog mga tumong ang inyong pamilya sa paggahin ug dugang panahon sa ministeryo niining espesyal nga mga bulan sa kalihokan.
10. Nganong angay natong ipakigsulti sa uban ang atong tinguha nga mag-oksilyare payunir panahon sa Memoryal?
10 Tabangi ang Usag Usa: Makatakod ang kadasig. Ipakigsulti sa uban ang imong tinguha nga mag-oksilyare payunir. Kini hayan makadasig sa uban sa pag-aplay. Dugang pa, kadtong nakapayunir na sa miagi makahatag kanimo ug mga sugyot nga makatabang kanimo sa paghikay sa imong mga kalihokan ug eskedyul aron makab-ot ang imong tumong. (Prov. 15:22) Kon makaoksilyare payunir ka, nganong dili nimo dasigon ang laing magmamantala, tingali kadtong susama nimog mga kahimtang, sa pagduyog kanimo niining makapalipay nga kalihokan?
11. Sa unsang paagi madasig sa mga ansiyano ang uban sa pag-oksilyare payunir sa umaabot nga mga bulan?
11 Daghang ansiyano ang mohimog gikinahanglang mga kahikayan sa pagpakigbahin niining linaing matang sa pag-alagad. (Heb. 13:7) Kini makapadasig gayod sa kongregasyon! Madasig usab sa mga ansiyano ang uban pinaagi sa ilang pagpakigsulti kanila. Ang malulotong mga pulong o praktikal nga mga sugyot lagmit mao ray gikinahanglan aron madasig ang uban sa pag-oksilyare payunir. Ang magtatan-aw sa pag-alagad hayan mag-organisar ug dugang nga mga tigom sa pag-alagad sa kanataran aron makapakigbahin ang tanan sa ginurupo nga pagsangyaw, bisan human sa trabaho o klase. Kining mga kahikayana kinahanglang regular nga ipahibalo. Iyang paneguroon usab nga ang tanan adunay igong teritoryo ug literatura.
12. Unsay imong mahimo kon dili ka makaoksilyare payunir?
12 Bisan pag dili ka makaoksilyare payunir tungod sa imong mga kahimtang, ikaw makadasig niadtong magpayunir, ug makaampo ka alang kanila. (Prov. 25:11; Col. 4:12) Tingali makahimo kag mga kahikayan sa pagpakig-uban kanila sa pagsangyaw ug dugang usa ka adlaw sulod sa usa ka semana o sa paggugol ug mas taas nga panahon sa pagsangyaw kay sa imong naandang buhaton.
13. Unsang tumong ang kab-oton sa Pilipinas, ug sa unsang paagi makatabang ang inyong kongregasyon sa pagkab-ot niana?
13 Tumong nga 25,000 ka Oksilyare Payunir sa Abril: Ang kinatas-ang ihap sa mga oksilyare payunir sa sanga sa Pilipinas maoy 22,410, nga nakab-ot niadtong 1997. Busa, ang realistikong tumong sa umaabot nga Abril maoy 25,000 ka oksilyare payunir. Atong makab-ot kana kon may aberids nga 1 sa matag 6 ka magmamantala sa matag kongregasyon ang mag-oksilyare payunir. Hinuon, sa pipila ka kongregasyon dunay mas daghang mga magmamantala kansang mga kahimtang magtugot kanila sa pag-oksilyare payunir. Kanang tumonga sa kongregasyon dali rang makab-ot sa kadaghanang mga kongregasyon. Hunahunaa lang ang kalipay nga mahimo niini sa inyong kongregasyon ug ang positibong epekto nga mahimo niini sa buluhatong pagsangyaw diha sa inyong teritoryo!
14. Nganong maayo kaayong mag-oksilyare payunir sa bulan sa Abril?
14 Nganong maayo kaayong mag-oksilyare payunir sa bulan sa Abril? Ang Memoryal himoon sa sinugdanan sa maong bulan, mao nga daghan kitag kahigayonan sa pagbalikduaw niadtong motambong. Kita magtanyag ug mga magasin, uban ang tumong nga makapahimutang ug librong Gitudlo sa Bibliya sa mga balikduaw ug makasugod ug mga pagtuon sa Bibliya. Busa pinaagi sa pag-oksilyare payunir sa Abril, kita may daghang kahigayonan sa pagsugod ug mga pagtuon sa Bibliya. Dinhi sa Pilipinas, mas tag-as ang adlaw ug kasagarang mas maayo ang panahon. Dugang pa, ang Abril may lima ka Dominggo ug may usa ka pista opisyal, nga mas makapasayon para sa mga nagtrabaho sa pag-aplay, ug ilabina sa mga nagtungha kay tingbakasyon man.
15. Nganong angay kitang mobatig pagkadinalian samtang nagsingabot ang panahon sa Memoryal?
15 Sa matag paglabay sa Memoryal, kita magkaduol ug usa ka tuig sa kataposan niining sistema sa mga butang. Hamubo na lang ang panahon sa pagsulti sa uban bahin sa atong dakong Diyos. (1 Cor. 7:29) Iniglabay niining panahon sa Memoryal, ang bililhong mga kahigayonan nga gihatag kanato niini sa pagdayeg sa atong langitnong Amahan dili na gayod mobalik. Hinaot mangandam na kita karon sa paghimo kutob sa atong maarangan sa Marso, Abril, ug Mayo aron kaylap nga ikamantala ang mga kahamili ni Jehova!
[Kahon sa panid 4]
Ato Bang Makab-ot ang 25,000 ka Oksilyare Payunir sa Abril?
◼ Timbang-timbanga ang imong mga prayoridad
◼ Hisgoti ang mga tumong ingong pamilya
◼ Ipakigsulti sa uban ang imong mga plano