Mga Paagi sa Pagpauswag sa Imong Ministeryo

DIHANG gipadala ni Jesus ang iyang mga tinun-an ingong magwawali sa Gingharian, siya miingon: “Daghan ang anihonon, apan diyutay ra ang mangangani.” Daghan pa ang buluhaton, busa siya midugang: “Hangyoa ninyo ang Agalon nga magpadalag dugang mangangani.” (Mat. 9:37, 38) Gitudloan ni Jesus ang mga tinun-an kon unsaon pagtuman ang ilang ministeryo. Makita sa iyang gisulti nga dinalian ang buluhaton, kay siya miingon: “Dili gayod ninyo malibot ang tanang siyudad ug baryo sa Israel hangtod moabot ang Anak sa tawo.”​—Mat. 10:23.

² Karon sab, daghan pa ang sangyawanan. Ang maayong balita sa Gingharian kinahanglang iwali sa dili pa moabot ang kataposan, ug mubo na lang ang panahong nabilin! (Mar. 13:10) Kay ang uma mao ang kalibotan, ang atong kahimtang parehas sa kahimtang ni Jesus ug sa iyang mga tinun-an, pero mas dako ang buluhaton karon. Kita diyutay ra kon itandi sa bilyonbilyong katawhan sa kalibotan, pero makaseguro ta nga si Jehova motabang kanato. Ang maayong balita sa Gingharian iwali sa tibuok yuta, ug sa gitakdang panahon ni Jehova, ang kataposan moabot. Unahon ba nato ang Gingharian sa Diyos diha sa atong kinabuhi aron bug-os matuman ang atong ministeryo? Busa unsang mga tumong sa pag-alagad ang puwede natong kab-oton?

³ Gipahayag ni Jesus kon unsay gipangayo ni Jehova sa Iyang dedikadong mga alagad pinaagi sa pag-ingon: “Higugmaa si Jehova nga imong Diyos sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog.” (Mar. 12:30) Kinahanglang tibuok kalag ang atong pag-alagad sa Diyos. Nagpasabot kini nga ipakita nato nga kinasingkasing ang atong debosyon ug tininuod ang atong dedikasyon pinaagi sa pag-alagad kang Jehova kutob sa maarangan. (2 Tim. 2:15) Dunay mga kahigayonan nga bukas para sa matag usa kanato, depende sa atong mga kahimtang ug katakos. Sayra ang pipila niini, ug pagpili kon unsang mga tumong ang imong kab-oton sa pagtuman sa imong ministeryo.

PAG-ALAGAD INGONG MAGMAMANTALA SA KONGREGASYON

⁴ Ang tanang modawat sa kamatuoran dunay pribilehiyo sa pagmantala sa maayong balita. Kini ang pangunang buluhaton nga gihatag ni Jesus sa iyang mga tinun-an. (Mat. 24:14; 28:19, 20) Ang mga tinun-an ni Jesu-Kristo sagad mopaambit dayon sa uban sa maayong balita human nila kini madunggi. Kanay gihimo ni Andres, Felipe, Cornelio, ug uban pa. (Juan 1:40, 41, 43-45; Buh. 10:1, 2, 24; 16:14, 15, 25-34) Nagpasabot ba ni nga ang usa puwede nang mosangyaw sa uban bahin sa maayong balita bisag dili pa bawtismado? Oo! Dihang ang usa kuwalipikado na ingong dili bawtismadong magmamantala, siya puwede nang makigbahin sa pagpamalaybalay. Dugang pa, depende sa iyang katakos ug kahimtang, siya puwedeng makigbahin sa ubang paagi sa ministeryo.

⁵ Human mabawtismohi ang usa ka magmamantala, seguradong interesado siyang mohimo sa iyang maarangan sa pagtabang sa uban nga mahibalo sa maayong balita. Pribilehiyo sa tanan, lalaki man o babaye, ang pagpakigbahin sa pagsangyaw. Pribilehiyo nato nga makasuportar sa pagpauswag sa buluhaton sa Gingharian sa Diyos bisan sa gamayng paagi. Kadtong magpauswag sa iyang ministeryo pinaagi sa pagpakigbahin sa lainlaing paagi sa pag-alagad magmalipayon gayod.

PAG-ALAGAD SA LUGAR NGA MAS DAKOG PANGINAHANGLAN

⁶ Tingali kanunay nang makobrehan ang teritoryo sa inyong kongregasyon. Kon mao, basin gusto nimong pauswagon ang imong ministeryo pinaagi sa pagbalhin sa lugar nga mas dakog panginahanglan. (Buh. 16:9) Kon ansiyano ka o ministeryal nga alagad, tingali naay laing kongregasyon nga malipay sa pagdawat sa imong tabang. Ang inyong tigdumala sa sirkito makahatag nimog sugyot kon sa unsang paagi makatabang ka sa laing kongregasyon sa sirkito. Kon gusto nimong mag-alagad sa ubang lugar sa inyong nasod, ang sangang buhatan makahatag ug mapuslanong impormasyon.

⁷ Gusto ba nimong mag-alagad sa laing nasod? Kon mao, palandonga kana pag-ayo. Puwede nimo kining ipakig-estorya sa mga ansiyano sa inyong kongregasyon. Ang imong pagbalhin seguradong duna unyay epekto kanimo ug sa mouban kanimo. (Luc. 14:28) Pero kon wala kay planong magdugay didto, basin mas maayong konsiderahon nimo ang pag-alagad sa lugar diha sa inyong nasod.

⁸ Sa ubang lugar, ang mga brader nga gihatagag responsibilidad sa kongregasyon bag-o pa sa kamatuoran. Ang maong mapainubsanong mga brader andam nga itugyan ang pagpanguna ngadto sa mas eksperyensiyadong mga ansiyano nga namalhin sa ilang kongregasyon. Kon ansiyano ka ug nagplanong mobalhin sa maong nasod, hinumdomi nga dili nimo tumong nga pulihan ang lokal nga mga brader. Hinuon, tumong nimo ang pag-alagad uban nila. Dasiga sila sa pagkab-ot ug pagdawat ug mga responsibilidad sa kongregasyon. (1 Tim. 3:1) Kon dunay mga kahikayan nga naandang gisunod sa imong nasod pero wala nila kini sunda, magmapailobon lang. Gamita ang imong eksperyensiya ingong ansiyano aron makatabang pag-ayo sa mga igsoon. Unya, kon kinahanglan na kang mouli sa inyong nasod, ang mga ansiyano sa maong lugar mas nabansay na sa pag-atiman sa kongregasyon.

⁹ Sa dili pa ka hatagan sa sangang buhatan ug ngalan sa mga kongregasyon nga nagkinahanglag tabang, ang inyong Komite sa Pag-alagad sa Kongregasyon kinahanglang magpadalag sulat-rekomendasyon. Gikinahanglan kini nga sulat, ansiyano man ka, ministeryal nga alagad, payunir, o magmamantala. Direktang ipadala sa komite sa pag-alagad ang sulat-rekomendasyon apil ang imong personal nga mga pangutana ngadto sa sangang buhatan sa nasod nga gusto nimong alagaran.

PAGSANGYAW SA LAING PINULONGAN

¹⁰ Aron mapauswag pa ang imong ministeryo, basin gusto nimong magtuon ug laing pinulongan, apil ang senyas nga pinulongan. Kon kanay imong tumong, puwede kang makig-estorya sa mga ansiyano ug sa tigdumala sa sirkito. Sila makahatag nimog mga sugyot ug pagdasig. Ubos sa direksiyon sa sangang buhatan, ang ubang sirkito nag-organisar ug mga tunghaan sa pagtuon ug pinulongan aron mabansay ang kuwalipikadong mga magmamantala ug mga payunir sa pagsangyaw diha sa laing pinulongan.

PAG-ALAGAD INGONG PAYUNIR

¹¹ Ang tanang magmamantala kinahanglang mahibalo sa mga kuwalipikasyon sa pag-alagad ingong oksilyare, regular, ug espesyal payunir, ug sa ubang matang sa bug-os panahong pag-alagad. Ang payunir kinahanglang sulondan nga bawtismadong Kristohanon nga makahimo sa pagkab-ot sa espesipikong oras sa pagsangyaw sa maayong balita. Ang Komite sa Pag-alagad sa Kongregasyon maoy mag-aprobar sa mga aplikasyon sa oksilyare ug regular payunir, pero ang sangang buhatan maoy magtudlog mga espesyal payunir.

¹² Ang usa mahimong itudlo ingong oksilyare payunir sulod sa usa ka bulan, sa sunodsunod nga mga bulan, o magpadayon sa walay tinong gidugayon, sumala sa iyang kahimtang. Daghang magmamantala sa Gingharian malipay nga mag-oksilyare payunir sa espesyal nga mga okasyon, sama sa bulan sa Memoryal o sa duaw sa tigdumala sa sirkito. Ang uban magpayunir sa mga bulan sa bakasyon. Ang bawtismadong mga estudyante mahimong mag-oksilyare payunir sa mga panahon nga walay klase. Ang mga magmamantala puwedeng mag-oksilyare payunir sa mga bulan diin gimenosan ang kinahanglanong oras, sama sa bulan sa Marso ug Abril ug sa bulan sa duaw sa tigdumala sa sirkito. Bisag unsay imong kahimtang, kon ikaw maayog moralidad ug panggawi, makakab-ot sa kinahanglanong oras, ug makaoksilyare payunir sa usa o mas daghang bulan, ang mga ansiyano malipay sa pagkonsiderar sa imong aplikasyon.

¹³ Aron mokuwalipikar ingong regular payunir, kinahanglang naa ka sa kahimtang nga makab-ot ang kinahanglanong oras matag tuig. Ingong regular payunir, paningkamoti nga makigkooperar kanunay sa inyong kongregasyon. Ang kugihang mga payunir panalangin sa kongregasyon, nga makapadasig sa uban diha sa ministeryo ug sa pagpayunir sab. Pero sa dili pa ka makaaplay ingong regular payunir, kinahanglang sulondan ka nga magmamantala nga bawtismado sa labing menos unom ka bulan.

¹⁴ Ang mga espesyal payunir kasagarang pilion gikan sa mga regular payunir nga napamatud-ang epektibo sa ministeryo. Sila kinahanglang makaalagad bisag asa sila iasayn sa sangang buhatan. Kasagaran, iasayn sila sa hilit nga lugar diin makakita silag mga interesado ug makapormag bag-ong mga kongregasyon. Usahay, ang mga espesyal payunir iasayn sa mga kongregasyon nga nagkinahanglag tabang sa pagkobre sa ilang teritoryo. Ang pipila ka espesyal payunir nga mga ansiyano iasayn sa pagtabang sa gagmayng kongregasyon, bisag walay panginahanglan para sa dugang magsasangyaw. Ang mga espesyal payunir makadawat ug igoigong alawans para sa adlaw-adlawng panginahanglan. Dunay uban nga itudlo ingong temporaryong mga espesyal payunir.

PAG-ALAGAD INGONG MISYONARYO

¹⁵ Ang Komite sa Pag-alagad sa Nagamandong Lawas maoy magtudlo ug mga misyonaryo, dayon ang Komite sa Sangang Buhatan maoy mag-asayn nila sa mga lugar nga daghag tawo. Dako silag ikatabang sa pagpauswag ug pagpalig-on sa buluhatong pagsangyaw ug sa mga kalihokan sa kongregasyon. Sagad, ang mga misyonaryo nabansay sa School for Kingdom Evangelizers. Sila gitagan-an ug puy-anan ug igoigong alawans para sa ilang mga panginahanglan.

PAG-ALAGAD INGONG TIGDUMALA SA SIRKITO

¹⁶ Kadtong itudlo sa Nagamandong Lawas ingong mga tigdumala sa sirkito bansayon una aron makabaton ug kasinatian pinaagi sa pag-alagad ingong kahulip nga tigdumala sa sirkito. Ang maong mga brader dunay dakong gugma sa ministeryo ug sa ilang mga igsoon. Sila madasigong mga payunir, kugihang mga estudyante sa Bibliya, maayong mamumulong, ug epektibong magtutudlo. Sila maayong panig-ingnan sa pagpakita sa bunga sa espiritu, pagkabalanse, pagkamakataronganon, ug pagpakitag katakos sa pag-ila. Kon siya minyo, ang iyang asawa nga payunir sulondan sa panggawi, maayong makiglabot sa uban, epektibong magsasangyaw, mapinasakopong asawa, dili mosulti para sa iyang bana, ug dili modominar sa mga panagsultihanay. Ang tigdumala sa sirkito ug ang iyang asawa daghan kaayog buluhaton, busa kadtong nagtinguha niini nga pribilehiyo kinahanglan nga maayog panglawas. Ang mga payunir dili mag-aplay para niini nga pribilehiyo. Hinuon, puwede nilang sultihan ang tigdumala sa sirkito bahin sa ilang tinguha aron siya makahatag kanilag mga sugyot.

TEOKRATIKANHONG MGA TUNGHAAN

¹⁷ School for Kingdom Evangelizers: Gikinahanglan ang dugang nga magsasangyaw sa Gingharian aron makobrehan ang mga teritoryo nga talagsa rang masangyawan ug aron madasig ang mga kongregasyon. Busa ang mga brader o sister nga dili minyo ug mga magtiayon puwedeng moaplay aron makadawat ug linaing pagbansay sa School for Kingdom Evangelizers. Human sa pag-eskuwela, sila ipadala ingong regular payunir sa mga lugar sa ilang nasod diin mas dako ang panginahanglan. Pero ang uban puwedeng hatagan ug laing asaynment diha sa ilang nasod o sa laing nasod kon naa sila sa kahimtang nga modawat niini. May pipila nga ipadala ingong temporaryo o permanente nga espesyal payunir. Ang mga payunir nga interesadong moeskuwela niini nga tunghaan puwedeng mahibalo sa mga kuwalipikasyon panahon sa miting nga himoon sa rehiyonal nga kombensiyon.

¹⁸ Watchtower Bible School of Gilead: Ang mga brader o sister nga dili minyo ug ang mga magtiayon nga gipili aron makaeskuwela niini nga tunghaan makamaong mosultig Iningles ug nag-alagad ingong special full-time servant. Sila dunay potensiyal sa pagpauswag ug pagpalig-on sa buluhaton sa kanataran o sa sangang buhatan. Ila nang napakita nga nalipay sila sa pag-alagad sa ilang mga igsoon ug sa pagtabang sa uban sa mahigugmaong paagi aron ang mga igsoon makakat-on ug makatuman sa giya sa Kasulatan ug sa organisasyon. Ang Komite sa Sangang Buhatan modapit sa potensiyal nga mga estudyante sa pag-submit ug aplikasyon para niini nga tunghaan. Ang mga mograduwar iasayn sa kanataran o sa sangang buhatan sa laing nasod o sa nasod nga ilang gipuy-an.

PAG-ALAGAD SA BETHEL

¹⁹ Espesyal nga pribilehiyo ang pag-alagad sa Bethel. Ang Bethel nagkahulogang “Balay sa Diyos,” ug haom kanang ngalana kay kini ang sentro sa teokratikanhong kalihokan. Ang mga igsoon nga nag-alagad sa Bethel dunay hinungdanong bahin sa paghimo, paghubad, ug pagpanagtag ug mga literatura sa Bibliya. Ang ilang pag-alagad gipabilhan gayod sa Nagamandong Lawas, nga maoy nagdumala ug naghatag ug direksiyon sa mga kongregasyon sa tibuok yuta. Daghang Bethelite nga mga maghuhubad ang nagpuyo ug nagtrabaho sa mga lugar nga sakop sa sangang buhatan diin gigamit ang pinulongan nga ilang gihubad. Tungod niini, ilang madunggan ang pinulongan nga gigamit sa adlaw-adlawng pagkinabuhi. Mahibaloan sab nila kon nasabtan ba gyod sa mga tawo ang mga pulong nga ilang gigamit diha sa mga publikasyong gihubad.

²⁰ Ang kadaghanang trabaho sa Bethel nagkinahanglag kusog. Busa ang sagad tawgon sa Bethel maoy dedikado, bawtismadong mga brader nga batan-on pa, maayog panglawas, ug baskog. Kon dunay panginahanglan sa sangang buhatan nga nagdumala sa inyong nasod ug gusto nimong mag-alagad sa Bethel, puwede kang magpakisayod ug dugang bahin sa mga kuwalipikasyon gikan sa mga ansiyano sa kongregasyon.

PAGPANUKOD NGA BULUHATON

²¹ Ang pagtukod ug teokratikanhong mga pasilidad maoy usa ka matang sa sagradong pag-alagad, parehas sa pagtukod sa templo ni Solomon. (1 Hari 8:13-18) Daghang igsoon ang nagpakita ug talagsaong kadasig pinaagi sa paghatag sa ilang panahon ug kahinguhaan aron makaapil niini nga buluhaton.

²² Naa ba ka sa kahimtang nga makatabang? Kon ikaw bawtismadong magmamantala nga gustong moapil niini nga buluhaton, ang mga brader nga nagdumala sa pagpanukod sa inyong lugar malipay nga modawat sa imong tabang ug andam silang mobansay nimo bisag limitado ang imong kahanas, o skill. Isulti sa mga ansiyano sa inyong kongregasyon nga gusto nimong motabang. Ang ubang bawtismadong magmamantala nga mikuwalipikar niini nakahimo pa gani sa pagboluntaryo sa pagpanukod ug teokratikanhong mga pasilidad sa ubang nasod.

²³ Dunay daghang kahigayonan aron makapakigbahin sa buluhatong pagpanukod. Kadtong sulondan nga bawtismadong mga magmamantala nga dunay igong kahanas ug makahimo sa pagsuportar sa mga proyekto sa pagpanukod duol sa ilang lugar puwedeng makaalagad ingong Local Design/Construction volunteer. Ang uban makahimo sa pagsuportar sa mga proyekto sa lagyong lugar sa mubong panahon ug itudlo sa sangang buhatan ingong construction volunteer sulod sa duha ka semana hangtod sa tulo ka bulan. Kadtong itudlo sa pag-alagad sa taas nga panahon tawgong construction servant. Ang construction servant nga iasayn sa laing nasod mag-alagad ingong expatriate construction servant. Ang Construction Group nga gilangkoban sa mga construction servant ug construction volunteer maoy manguna sa matag proyekto ug suportahan sila sa mga Local Design/Construction volunteer ug sa mga boluntaryo gikan sa mga kongregasyon nga nalangkit sa maong proyekto. Ang mga Construction Group mobalhin gikan sa usa ka proyekto ngadto sa lain sulod sa teritoryong sakop sa sangang buhatan.

UNSAY IMONG ESPIRITUWAL NGA MGA TUMONG?

²⁴ Kon imo nang gidedikar ang imong kinabuhi kang Jehova, tinguha nimo nga alagaran siya sa walay kataposan. Pero unsay imong espirituwal nga mga tumong? Ang pagtakdag espirituwal nga mga tumong makatabang nimo nga magamit ang imong kusog ug kahinguhaan sa maalamong paagi. (1 Cor. 9:26) Makatabang sab ni nga mouswag ang imong espirituwalidad ug mahatagag bug-os nga pagtagad ang mas importanteng mga butang samtang naningkamot ka sa pagkab-ot ug dugang pribilehiyo sa pag-alagad.​—Filip. 1:10; 1 Tim. 4:15, 16.

²⁵ Si apostol Pablo nagpakitag maayong ehemplo nga atong masundog sa pag-alagad sa Diyos. (1 Cor. 11:1) Gihimo niya ang iyang maarangan sa pag-alagad kang Jehova. Iyang nakita nga gitagan-an siya ni Jehova ug daghang kahigayonan sa pag-alagad. Ngadto sa mga igsoon sa Corinto, si Pablo misulat: “Nabuksan kanako ang dakong pultahan sa kahigayonan alang sa daghang buluhaton.” Dili ba ingon niana sab ang atong kahimtang? Oo, dunay daghang kahigayonan nga kita makaalagad kang Jehova uban sa kongregasyon, ilabina sa pagsangyaw sa maayong balita sa Gingharian. Pero sama sa kahimtang ni Pablo, apil sa pagsulod nianang “dakong pultahan” ang pag-atubang sa “daghang magsusupak.” (1 Cor. 16:9) Andam si Pablo sa pagdisiplina sa iyang kaugalingon. Matikdi ang iyang giingon: “Gimakmak nako ang akong lawas ug gihimo kining samag ulipon.” (1 Cor. 9:24-27) Mao ba sab nay atong panglantaw?

²⁶ Ang matag usa gidasig nga mokab-ot ug espirituwal nga mga tumong sumala sa iyang kahimtang. Daghan karon ang anaa sa bug-os panahong pag-alagad tungod kay niadtong batan-on pa sila nagtakda na silag espirituwal nga mga tumong. Bisan niadtong bata pa sila, gidasig sila sa ilang mga ginikanan ug sa uban sa paghimo niana. Busa wala gyod sila magmahay sa ilang malipayon ug mabungahon kaayong pag-alagad kang Jehova. (Prov. 10:22) Ang ubang maayong tumong mao ang pagpakigbahin sa ministeryo kada semana, pagsugod ug pagdumalag mga pagtuon sa Bibliya, o paggahin ug dugang panahon sa pagpangandam sa tigom. Ang importante, magpabilin tang lig-on ug bug-os natong tumanon ang atong ministeryo. Kon ato nang himoon, mapasidunggan nato si Jehova ug makab-ot nato ang atong kinalabwang tumong, ang pag-alagad kaniya sa walay kataposan.​—Luc. 13:24; 1 Tim. 4:7b, 8.