Ikaw ba May Dugang Pang Mahimo sa Pagpasidungog Kang Jehova?
1 Kana maoy usa ka mahinungdanong pangutana nga tagdon natong tanan. Ingong matinumanong mga manunundog sa atong Agalon, si Jesu-Kristo, gipasidunggan ta karon ang atong Diyos pinaagig publikong pagmantala sa iyang ngalan. Kini maoy usa ka kaakohan nga kinahanglan tang abagahon kon buot natong mabatonan ang pabor sa Diyos. (Mar. 13:10; Luc. 4:18; Buh. 4:20; Heb. 13:15) Pagkadili-mahubit nga pribilehiyo—oo, dungog—sa pagdala niining maayong balita ngadto sa nanghibiling nagakatibulaag nga “mga karnero” nga mahimo pang bahin sa unibersohanong toril ni Jehova!—Juan 10:16.
2 Ikaw ba ug ang imong mga anak may dugang pang mahimo sa pagpasidungog kang Jehova pinaagig pagpauswag sa inyong kalihokan sa ministeryo? Diha sa kanunay-nagauswag nga mga gidaghanon sa tibuok kalibotan, ang inyong mga igsoong lalaki ug babaye nagasulod sa payunir nga pag-alagad. Sa bulan sa Abril 1992, usa ka kinatas-ang ihap nga 34,313 sa Pilipinas maoy anaa sa espesyal, regular, o oksilyare payunir nga pag-alagad. Ikaw ba sa personal nagahatag ug seryoso nga pagtagad sa pagpayunir? Imo bang gidasig ang imong mga anak nga mangagpas ug karera sa bug-os panahong ministeryo?
3 Nganong dili analisahon ang imong personal nga mga pagbati ngadto sa payunir nga pag-alagad? Sa panahong mahisgotan ang ulohan, mohinapos ka ba dayon nga ang imong mga kahimtang yanong dili magtugot kanimo nga moalagad ingong payunir nga ministro? Tinuod nga ang pagpayunir dili posible sa tanan. Ang Kasulatanhong mga kaakohan ug uban pang mga limitasyon nagapugong sa daghan sa pag-alagad sa bug-os panahon. (1 Tim. 5:8) Apan nahatagan ba nimo kining butanga ug mainampoong panghunahuna di pa dugay? Nahisgotan ba ninyo ang ulohan ingong pamilya sa pagtino kon sa labing menos makapayunir ba ang usa ka membro? Ang Mayo 15, 1983, nga gula sa Ang Bantayanang Torre (Nobyembre 15, 1982 sa Ingles) mihimo niining makapalihok-hunahunang pahayag diha sa panid 24 (panid 23 sa Ingles): “Sa pagkamatuod, ang matag Kristohanong ministro angay nga mag-ampo kon makahimo ba siya sa pagpayunir o dili. Usa ka magtiayon sa South Africa nga nagpayunir sulod sa napulog-lima ka tuig miingon: ‘Nganong nagpayunir kami? May ikapangatarongan kaha kami atubangan kang Jehova kon dili kami magpayunir?’ Ang kadaghanan nga dili mga payunir makahimo sa pagpangutana sa kaamgid nga pangutana: ‘Tinuod bang may katarongan ako atubangan kang Jehova sa kamatuoran nga dili ako payunir?’”
4 Ang laing artikulo sa Bantayanang Torre bahin sa maong ulohan naghimog prangkang komento niini: “Ang matag usa kanato angay magmatinud-anon sa iyang kaugalingon. Ikaw ba nagaingon, ‘Ang espiritu andam, pero ang lawas luya’? Pero ang espiritu ba tinuod nga andam? Likayan nato ang paggamit sa kaluya sa lawas nga usa ka pasumangil sa pagkadili-andam sa espiritu.”—bt79 2/15 p. 25 (w78 8/15 p. 23 sa Ingles).
5 Mga Ginikanan Kinsa Gustong Molampos ang Ilang mga Anak: Ang Proverbio 15:20 nagapasalig kanato: “Ang usa ka maalamong anak mao ang usa nga makapalipay sa amahan.” Ang diyosnong mga ginikanan sa walay duhaduha malipay sa dihang ang ilang mga anak nga lalaki ug mga babaye mangagpas sa usa ka kinabuhi sa dedikadong pag-alagad kang Jehova. Bisan pa niana, ang imong mga anak dili awtomatiko nga mopili sa maalamong kurso. Ang pagkamahayloon niining kalibotana kusganon kaayo. Mga ginikanan, ang mga hiyas sa inyong mga anak sa kinadak-an mahulma pinaagi kaninyo. Kon kamo kanunayng positibong nagahisgot bahin sa mga kaayohan sa bug-os panahong pag-alagad, kon inyong ginadasig ang inyong mga batan-on nga maninguha sa pagpakig-uban sa debotadong mga payunir, kon kamo gayod kombensido nga ang bug-os panahong ministeryo mao ang labing dungganong karera nga sukad atubangon sa inyong mga anak, kining maong positibong tinamdan sa walay duhaduha may dakong impluwensiya sa inyong mga anak. Buligi sila sa pagpabili sa kahinungdanon sa paghimog maayong ngalan uban kang Jehova inay kay sa mga tawo.
6 Mga batan-on, ang Proverbio 22:1 nagapatugbaw sa pagpili nga kinahanglan ninyong himoon: “Ang usa ka ngalan maoy pagapilion inay kay sa dagayang mga bahandi; ang pabor labing maayo bisan gani sa salapi ug bulawan.” Unsa mang matanga sa ngalan ang imong himoon sa imong kaugalingon? Hunahunaa ang mga lalaki ug mga babaye nga atong mabasa sa Bibliya nga nakahimog ngalan uban sa Diyos pinaagig dedikadong pag-alagad. Anaa si Lucas, ang hinigugmang doktor, ug si Enoch, nga naglakaw uban sa matuod nga Diyos. Si Samuel midawat sa labing maayong edukasyon nga posible, nga nagsugod sa iyang pag-alagad diha sa templo ni Jehova sa sayong panuigon. Gihunahuna ba ninyong kining matinumanong mga alagad sa bisan unsang panahon nagbasol sa mga pagpili nga ilang nahimo? Nganong magbasol man sila? Silang tanan may malipayon, mabungahon, ug makapadasig nga mga kinabuhi. Ug nakaplagan nila ang malungtarong pabor uban kang Jehova!—Sal. 110:3; 148:12, 13; Prov. 20:29a; 1 Tim. 4:8b.
7 Sa dihang makahimog kalamposan sa kinabuhi ang mga anak, bation sa ilang mga ginikanan ang garbo. Ang ilang puhunan sa pagbansay, pagdisiplina, ug pag-edukar niining maong “panulondon gikan kang Jehova” nabalosan sa kapid-an ka pilo. (Sal. 127:3) Unsa pa may mas ikapasigarbo sa bisan kinsang ginikanan kay sa anak nga lalaki o babaye nga nagahimo sa tanan niyang maarangan sa pagpasidungog kang Jehova? Daghang kabatan-onan sa modernong mga panahon ang misunod sa mga lakang ni Lucas, Enoch, ug Samuel, ingon sa giilustrar sa usa ka sulat: “Ako 16. Ako misugod sa regular nga pagpayunir . . . siyam ka bulan human ko mabawtismohi, ug nagadawat kog mga panalangin gikan kang Jehova sukad niadto. . . . Ang pagpayunir makabulig usab nimo diha sa tunghaan. Kaniadto, sungogon ko sa akong mga klasmet tungod sa akong pagka Saksi. Karon, tungod kay kinahanglan kong mohimog dugang personal nga pagtuon, makahimo na ko sa ‘pagtubag sa usa nga nagabiaybiay nako.’”
8 Edukasyon nga Mosangkap sa Usa sa Ministeryo: Niining puntoha mahisgotan nato ang pangutana bahin sa sekular nga edukasyon. Kini maoy usa ka dapit nga ilabinang gikinahanglan ang balanseng panglantaw. Ang Nobyembre 1, 1992, nga Bantayanang Torre mipatugbaw sa artikulong “Edukasyon nga May usa ka Katuyoan.” Ubos sa sub-ulohang “Igong Edukasyon,” gihimo kining puntoha: “Ang mga Kristohanon kinahanglang makabuhi sa ilang kaugalingon, bisan pag sila bug-os panahong payunir nga mga ministro. (2 Tesalonica 3:10-12) . . . Unsa ka dakong edukasyon ang kinahanglanon sa usa ka batan-ong Kristohanon sa pagtahod niining mga prinsipyoha sa Bibliya ug sa pagtuman sa iyang Kristohanong mga katungdanan? . . . Unsa ang [suweldo] ‘igo’ . . . alang sa mga buot mahimong payunir nga mga ministro sa maayong balita? Kana sila sagad nanginahanglan ug inoras nga trabaho aron dili ‘makapabug-at kaayo’ sa ilang mga igsoon o sa ilang pamilya.—1 Tesalonica 2:9.”
9 Kon ang dugang edukasyon gituohang kinahanglanon sa malaomang payunir sa pagtabang kaniya sa pagpangagpas sa bug-os panahong pag-alagad, ang Nobyembre 1, 1992, nga Bantayanang Torre nagarekomendar: “Maayong himoon kini sa usa ka batan-ong Saksi, kon posible, samtang nagapuyo sa balay, sa ingon makapadayon sa normal nga Kristohanong mga batasan sa pagtuon, pagtambong sa tigom, ug sa buluhatong pagsangyaw.”
10 Gikan sa Aprika midangat ang kasinatian sa 22-anyos-edad nga batan-on nga kinahanglang motungha sa trade school, bisan pag ang iyang kasingkasing anaa sa payunir nga pag-alagad. Samtang diha sa maong tunghaan, siya nagpalista ingong oksilyare payunir. Ang iyang mga katalirongan nagyagayaga kaniya, nga nagaingong dili gayod siya makapasar sa mga pasulit. Ang iyang tubag kanunay kanila mao: “Pangitaa pag-una ang Gingharian sa Diyos ug ang iyang pagkamatarong.” Nga nagadisiplina sa kaugalingon, siya mobangon nga sayo kaayo kada buntag ug mohimog duha ka oras nga pagpangandam alang sa klase ug unya makig-ambit sa pagsangyaw sa pagkahapon sa dihang matapos na ang klase. Ang tibuok tunghaan nakurat sa dihang kining batan-ona nahimong ikatulo sa usa ka espesyal nga pasulit aron pagpili sa tulo ka labing maayong estudyante alang sa usa ka espesyal pinasiugdahang ganti. Ang estudyante nga nahimong ikaduha mao ang interesadong tawo nga gitun-an sa Bibliya sa atong payunir nga igsoong lalaki sa tunghaan. Ang estudyante nga nakaangkon sa unang dapit mao ang laing madasigong batan-ong Saksi sa tunghaan.
11 Mga Ansiyanong Nagabuhat sa Ilang Bahin: Ang mga ansiyano sa kongregasyon, kinsa mapagarbohon sa buluhaton nga ginahimo sa mga payunir, nagataganag dakong pagdasig alang niining masibotong mga ministro. Ang mga ansiyano nahimuot sa pagbuhat niini tungod kay ilang nasayran nga ang manggibuhaton, mabungahong mga payunir maoy usa ka panalangin sa bisan haing kongregasyon. Human sa paggugol ug usa ka tuig o kapin pa sa regular payunir nga pag-alagad, kana sila mahimong takos alang sa dugang pagbansay diha sa Tunghaan sa Payunir nga Pag-alagad. Ang maong kurso napamatud-ang mahinungdanong kagamitan sa pagpauswag sa pagkaepektibo sa mga payunir. Bisan pag ang mga payunir anaa sa kinaunhan sa buluhaton, nanginahanglan usab silag mahigugmaong pagdasig, ug ang mga ansiyano kinahanglang alisto sa paghulip niining panginahanglana.—1 Ped. 5:1-3.
12 Sa unsang paagi ang mga ansiyano makahatag ug pagdasig sa payunir nga buluhaton? Ang usa ka maayong pagsugod mao ang pupanahong pagtimbangtimbang kon kinsa ang kalagmitang makapangab-ot niining pribilehiyoa. Ang mga ansiyano makaduol sa mga indibiduwal nga maorag anaa sa paborableng posisyon nga makapayunir, lakip ang daghang nag-oksilyare payunir sa regular nga paagi, mga nagretiro na, mga asawa, ug mga estudyante. Samtang walay usa nga mobating nailalom sa obligasyon nga magpalista, kadtong kinsa may tinguha pero nagpanuko mahimong, uban sa diyutayng praktikal nga pagdasig, makaamgo nga ang pagpayunir maarangan ra nila.
13 Sa paghatag ug pagdasig ngadto kanilang buot nga moaplay, kinahanglang ibutang sa hunahuna sa mga ansiyano nga dili kinahanglanon alang sa aplikante sa paggugol ug ubay-ubayng bulan diha sa oksilyare payunir nga pag-alagad una pa makapalista ingong regular nga payunir. (km 9/86 suplemento mga parapo 24-26) Siyempre, ang mga ansiyano buot nga makataronganong makaseguro nga ang aplikante anaa sa posisyon nga makakuha sa gikinahanglang oras.
14 Human marepaso ang aplikasyon sa Komite sa Pag-alagad sa Kongregasyon ug maampingong nasusi sa sekretaryo aron pagseguro nga ang tanang pangutana natubag, kinahanglang ipadala dayon kini ngadto sa Sosyedad.
15 Ang sekretaryo kinahanglang magpahibalo kanunay sa mga ansiyano sa bisan unsang mga suliran nga mahimong masinatian sa mga payunir. Kini ilabinang hinungdanon sa mga kongregasyon nga may daghang payunir. Dugang pa sa pagrepaso sa kalihokan sa mga payunir sa kataposan sa tuig sa pag-alagad, ingon sa gihangyo diha sa Congregation Analysis Report (S-10), ang sekretaryo kinahanglang magdapit sa magtatan-aw sa pag-alagad nga makigtagbo kaniya sayo sa Marso aron pagsusi kon kinsay naulahi sa pagkab-ot sa gikinahanglang oras ug nanginahanglan sa personal nga pagtagad. (Tan-awang Marso 1993 Atong Ministeryo sa Gingharian, Mga Pahibalo.) Kon ang tabang ikahatag sa walay langan, ang payunir mahimong makakompleto nga malamposon sa tuig sa pag-alagad.
16 Ang kadaghanan sa bag-ong mga payunir maoy batan-on pag pangedaron ug bag-ohay pa sa kamatuoran. Ang ilang andam nga espiritu makapalipay gayod kanato! Apan kining mga bag-ohan nanginahanglan pag pagbansay aron maugmad ang kahanas sa balaybalay nga buluhaton, paghimog epektibong mga balikduaw, ug pagtudlo diha sa mga pagtuon sa Bibliya. Kon kining pagbansaya dili mabatonan, ang bag-ohan malagmit maluya human sa usa ka tuig o kapin pa ug ngadtongadto mohunong sa payunir nga pag-alagad tungod kay wala makakuhag maayong mga resulta sa ministeryo. Ang abtik nga mga ansiyano makaarang sa pagmatikod sa gagmayng mga suliran o pagkunhod sa kalihokan. Kon ang dihadihang pagtagad gikahatag ug ang payunir nabuligan sa iyang suliran, mahimong matagamtam niya ang daghang katuigan sa mabungahong pag-alagad.
17 Ikaw ba Makapangisda sa Halayong Katubigan? Ang pipila sa mga tinun-an ni Jesus mga mangingisda. Usahay, human sa tibuok gabiing pangisda, wala gihapoy sulod ang ilang mga pukot. (Juan 21:3) Sa mga bahin niining nasora diin ang ‘pagpangisdag tawo’ nagapadayon sa mga katuigan, ang pipila ka payunir mohinapos nga adunay pipila na lamang ka “isda” nga nagapabilin sa mga “katubigan” sa ilang kongregasyon. (Mat. 4:19) Sa kasukwahi, wala ba ta mahinam sa pagkabasa sa mga taho gikan sa ubang kayutaan diin ang mga magmamantala ug mga payunir nagadumalag daghang pagtuon sa Bibliya? Ang kalipay nga nasinati sa mga payunir niining mga yutaa dayag kaayo. (bt92 9/1 p. 20 par. 15) Busa, kon ang pipila sa manggibuhatong payunir anaa sa posisyon nga mobalhin sa ilang kaugalingong gasto ngadto sa laing nasod diin adunay mas dakong panginahanglan, kinahanglang tagdon nila kini uban sa sangang buhatan una pa mobalhin.
18 Sa sinugdanan, ang pipila mahimong mosugod pagpayunir tungod kay ilang nasayran nga mao kanay hustong butang nga pagabuhaton pero nahibulong kon makapalampos ba sila niini. Sila lagmit nag-aplay nga may pipila ka pagduhaduha ug pagpanagana. Sa sinugdanan, ang ilang mga resulta sa kanataran maoy ubos ra. Sa kadugayan, hinunoa, ang ilang kahanas nag-uswag, ug anaay ebidensiya sa panalangin ni Jehova sa ilang buluhaton. Busa, ang ilang kalipay ug pagsalig nagatubo. Alang sa pipila, ang pagpayunir napamatud-ang usa ka tikanganan ngadto sa pag-alagad sa Bethel, misyonaryong buluhaton, ang Tunghaan sa Ministeryal nga Pagbansay, ug nagapanawng buluhaton pa gani.
19 Mahimong dili posible alang kanimo nga mobalhin sa laing dapit o mahimong misyonaryo sa laing yuta, apan aduna pay mga kahigayonan sa pagpangisda sa ubang katubigan sulod niining nasora kon ang imong presenteng teritoryo ilabinang dili mabungahon. Ang maong pagbalhin magakinahanglan sa usa ka pagpasibo sa imong estilo sa kinabuhi, pero ang espirituwal nga mga ganti dako gayod kaayo.—Mat. 6:19-21.
20 O kon ang imong mga kahimtang motugot, makahimo ka sa pagbulig sa usa ka duol nga kongregasyon sa imong kaugalingong sirkito. Kon takos ka, ang inyong magtatan-aw sa sirkito malipay nga mohatag kanimog mga sugyot sa mga kongregasyon sa sirkito nga makabenepisyo gikan sa laing payunir.
21 Ang pipila ka payunir ug mga magmamantala nakaalagad sa panginahanglan sa ilang kaugalingong dapit samtang nagapabilin sa pinuy-anan. Sila mahimong makakat-on ug laing pinulongan. Nakaplagan ba nimo sulod sa imong teritoryo nga may usa ka dakong bahin sa populasyon ang nagasultig laing pinulongan? Aduna bay katawhan nga nanginahanglang makadawat sa mensahe sa Gingharian gikan sa usa nga nagagamit ug inamang nga pinulongan? Kadtong nahibalo ug laing pinulongan mahimong dakong tabang sa pag-abot sa tanang matang sa tawo uban sa mensahe sa Gingharian. Bisan tuod nga kini mahimong usa ka tinuod nga hagit, mapamatud-an usab kining magantihon kaayo.—1 Tim. 2:4; Tito 2:11.
22 Kon sa pagkakaron gibuhat mo ang tanan mong maarangan sa pagpasidungog kang Jehova, pagmaya diha sa imong presenteng mga pribilehiyo sa pag-alagad. Kon mobati kang makahimo pag dugang, dalha ang maong butang sa pag-ampo kang Jehova. Sa pagkamatinud-anon analisaha kon unsang mga kausaban sa imong mga kahimtang ang motugot kanimo sa pagbuhat. Ipakigsulti ang imong mga plano sa usa ka ansiyano nga may espiritu sa pagpayunir o uban sa magtatan-aw sa sirkito. Sa dihang nahimo mo ang mainampoon, praktikal nga desisyon, tumana dayon kana, nga masaligon sa saad ni Jehova sa pagpasidungog niadtong kinsa nagapasidungog kaniya.—Heb. 13:5, 6; 1 Sam. 2:30.