Mga Batan-on—Sa Unsang Paagi Gamiton Ninyo ang Inyong Kinabuhi?

“GUSTO ko nga magmapuslanon pag-ayo ang akong kinabuhi.” Kana ang giingon sa usa ka tin-edyer nga babaye. Seguradong kana usab ang imong gusto. Apan sa unsang paagi magmapuslanon pag-ayo ang imong kinabuhi? Ang media ug ang imong mga katalirongan, tingali bisan ang imong mga magtutudlo, mahimong moingon nga kana imong makab-ot pinaagi sa pagpangitag daghang salapi ug pagbaton ug dungganong karera aron mahimong ilado!

Apan ang Bibliya nagpasidaan sa mga batan-on nga ang pagpangagpas sa materyal nga kalamposan sama rag “paggukod sa hangin.” (Ecclesiastes 4:4) Ang usa ka hinungdan mao nga pipila ra ka batan-on ang madato ug mailado. Kadtong makakab-ot niana kasagarang mobatig dakong kapakyasan. “Nahisama kadtog walay sulod nga kahon,” matod sa usa ka batan-ong taga-Britanya nga nangagpas ug dungganong karera sa unibersidad. “Kon palandongon mo ang mga resulta, kini walay kapuslanan.” Tinuod, ang usa ka trabaho usahay magdalag bahandi ug pagkainila. Apan kini dili makatagbaw sa imong “espirituwal nga panginahanglan.” (Mateo 5:3) Gawas pa, ang 1 Juan 2:17 nagpasidaan nga “ang kalibotan nagakahanaw.” Bisan pag magmalamposon ka niining kalibotana, kini dili magdugay.

Busa ang Ecclesiastes 12:1 nag-awhag sa mga batan-on: “Hinumdomi ang imong Maglalalang samtang batan-on ka pa.” (Today’s English Version) Oo, ang labing maayong paagi sa paggamit sa imong kinabuhi mao ang pag-alagad kang Jehova nga Diyos. Apan una pa niana, kinahanglang mahimo kang kuwalipikado sa pag-alagad sa Diyos. Unsaon man nimo pagbuhat niana? Ug unsay nalangkit sa pagkinabuhi nga nag-alagad sa Diyos?

Pagkuwalipikar nga Mahimong Usa ka Saksi ni Jehova

Sa pagsugod, angay nimong ugmaron ang tinguha sa pag-alagad sa Diyos​—ug kanang tinguhaa dili basta na lang modangat, bisan pag Kristohanon ang imong mga ginikanan. Kinahanglang ikaw adunay personal nga relasyon uban kang Jehova. “Ang pag-ampo motabang nimo sa pagbatog personal nga relasyon uban kang Jehova,” matod sa usa ka tin-edyer nga babaye.​—Salmo 62:8; Santiago 4:8.

Ang Roma 12:2 nagpasiugda sa laing tikang nga angay nimong himoon. Kini nag-ingon: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ Nagduhaduha ka ba sa pipila ka butang nga gitudlo kanimo? Nan sunda ang tambag sa Bibliya, ug ‘pamatud-i sa imong kaugalingon’ nga kanang mga butanga tinuod! Panukiduki. Basaha ang Bibliya ug ang mga publikasyon nga gipasukad sa Bibliya. Apan, ang pagkakat-on bahin sa Diyos dili lang basta paggamit sa imong utok diha sa pagsusi sa mga kamatuoran. Pamalandonga ang imong gibasa aron kini matisok sa imong masambingayong kasingkasing. Magpalambo kini sa imong gugma sa Diyos.​—Salmo 1:2, 3.

Dayon, ipaambit ang imong makat-onan sa di-pormal nga paagi, tingali sa imong mga eskolmet. Ang balay-balay nga pagsangyaw mao ang sunod nga tikang. Inigsangyaw nimo, tingali makahibalag kag usa ka eskolmet, ug makulbaan ka sa sinugdan. Apan ang Bibliya nagdasig kanato nga dili “ikaulaw ang maayong balita.” (Roma 1:16) Ikaw nagdalag mensahe bahin sa kinabuhi ug paglaom! Nan nganong ikaulaw kana?

Karon, kon ang imong mga ginikanan maoy mga Kristohanon, basin nakakuyog ka na sa pagsangyaw uban kanila. Apan may dugang ka pa bang mahimo gawas sa pagtindog lang nga walay timik diha sa pultahan o kaha pagtunol lang ug mga magasin ug mga tract? Makahimo ka ba pagsulti diha sa pultahan, ginamit ang Bibliya aron matudloan ang tagbalay? Kon dili, pangayog tabang sa imong mga ginikanan o sa usa ka hamtong nga igsoon sa kongregasyon. Himoang tumong nga mahimo kang takos ingong di-bawtismadong magmamantala sa maayong balita!

Sa igong panahon, ikaw mapalihok sa pagpahinungod​—ang pagsaad sa Diyos nga ikaw moalagad kaniya sukad nianang panahona. (Roma 12:1) Apan, ang pagpahinungod dili lang basta usa ka pribadong buhat. Buot sa Diyos nga ang tanan mohimog “pagpahayag sa dayag alang sa kaluwasan.” (Roma 10:10) Panahon sa bawtismo, imo unang himoon ang binabang pagpahayag sa imong pagtuo. Sunod mao ang pagbawtismo diha sa tubig. (Mateo 28:19, 20) Tinuod, ang bawtismo maoy usa ka seryosong tikang. Apan ayaw pagpanuko tungod kay gibati nimong morag dili ka makatuman. Kon mosalig ka sa Diyos alang sa kusog, siya mohatag kanimog “gahom nga labaw sa kasarangan” aron tabangan ka nga makabarog nga malig-on.​—2 Corinto 4:7; 1 Pedro 5:10.

Panahon sa bawtismo, ikaw mahimong usa sa mga Saksi ni Jehova. (Isaias 43:10) Angay nga magpahinabo kinig dakong epekto diha sa paagi sa paggamit mo sa imong kinabuhi. Ang pagpahinungod naglakip sa ‘pagdumili sa imong kaugalingon.’ (Mateo 16:24) Mahimong dumilian mo ang ubang personal nga mga tumong ug mga ambisyon ug ‘pangitaon pag-una ang gingharian sa Diyos.’ (Mateo 6:33) Sa ingon ang pahinungod ug bawtismo magbukas sa daghang kahigayonan sa pagbuhat niana. Tagdon nato ang pipila niini.

Mga Kahigayonan sa Pag-alagad sa Diyos sa Bug-os-Panahon

● Ang pagpayunir maoy usa niini. Ang usa ka payunir maoy sulondang bawtismadong Kristohanon nga nag-eskedyul sa paggugol ug labing menos 70 ka oras kada bulan sa pagsangyaw sa maayong balita. Ang paggugol ug dugang panahon sa kanataran motabang nimo sa pag-ugmad sa imong mga katakos sa pagsangyaw ug pagpanudlo. Daghang payunir ang nakasinatig kalipay sa pagtabang sa ilang mga estudyante sa Bibliya nga nahimong bawtismadong mga Saksi. Duna bay sekular nga trabaho nga mas makapadasig ug makapatagbaw kay niini?

Aron adunay panggasto sa ilang mga kinahanglanon, kadaghanang payunir dunay partaym nga mga trabaho. Daghan ang nangandam alang niining maong kaakohan pinaagig pagkat-on ug trabahong pangamot diha sa tunghaan o gikan sa ilang mga ginikanan. Kon ikaw ug ang imong mga ginikanan mobati nga mas maayong makabaton kag dugang edukasyon human sa hayskul, seguroa nga ang imong motibo maoy, dili magpadato, kondili aron masuportahan ang imong ministeryo ug tingali mag-alagad ingong bug-os panahong ministro.

Hinuon, ang sentro sa kinabuhi sa payunir mao ang iyang ministeryo, ang pagtabang sa uban nga makabaton ug kinabuhi, dili ang iyang sekular nga trabaho! Nganong dili nimo himoong tumong ang pagpayunir? Ang pagpayunir kasagarang motultol sa laing mga pribilehiyo. Pananglitan, ang ubang payunir moadto sa mga dapit nga mas dako ang panginahanglan sa mga magmamantala sa Gingharian. Ang uban magtuon ug langyawng pinulongan ug mag-alagad sa usa ka lokal nga kongregasyon nga nagsulti nianang pinulongana o kaha sa usa ka langyawng nasod. Oo, ang pagpayunir maoy magantihong paagi sa kinabuhi!

● Ang School for Kingdom Evangelizers maoy laing pultahan sa kahigayonan. Katuyoan niining duha ka bulan nga tunghaan nga bansayon ang eksperyensiyadong mga payunir nga andam moalagad diin sila gikinahanglan. Sama rag miingon sila, “Ania ako! Ipadala ako,” agig pagsundog kang Jesu-Kristo, ang kinalabwang Ebanghelisador sa yuta. (Isaias 6:8; Juan 7:29) Tingali kinahanglan nilang pasimplehon ang ilang kinabuhi dihang mag-alagad sa ubang lugar. Ang kultura, klima, ug pagkaon tingali lahi sa ilang naandan. Basin kinahanglan silang magtuon ug ubang pinulongan. Kini nga tunghaan makatabang sa mga ulitawo, dalaga, ug magtiayon, nga nag-edad ug 23 hangtod sa 65 anyos, sa pag-ugmad ug espirituwal nga mga hiyas nga ilang gikinahanglan sa ilang asaynment ug sa pagpauswag sa ilang mga kahanas aron magamit silag maayo ni Jehova ug sa iyang organisasyon.

● Ang pag-alagad sa Bethel naglakip sa pagsilbi isip boluntaryo diha sa usa sa mga pasilidad sa branch office sa mga Saksi ni Jehova. Ang ubang mga membro sa pamilyang Bethel direktang nalangkit sa paggamag mga literatura sa Bibliya. Ang uban gihatagag mga asaynment nga nagsuportar niana, sama sa pagmentinar sa mga bilding ug mga kahimanan o sa pag-atiman sa panglawas sa pamilyang Bethel. Ang tanang asaynment maoy sagradong mga pribilehiyo sa pag-alagad kang Jehova. Dugang pa, silang anaa sa Bethel nalipay sa pagkahibalo nga bisan kon unsay ilang trabaho, kini makahatag ug kaayohan sa ilang daghang kaigsoonan sa tibuok kalibotan.

Usahay ang mga igsoon nga may espesyal nga mga abilidad dapiton sa pag-alagad sa Bethel. Apan, ang kadaghanan bansayon sa ila nang pag-abot. Silang anaa sa Bethel wala mag-alagad aron makasapi apan tagbaw na sa mga gitaganang pagkaon, puy-anan, ug kasarangang kantidad nga salapi alang sa personal nga galastohan. Usa ka batan-ong membro sa pamilyang Bethel naghubit sa iyang pag-alagad niining paagiha: “Pagkanindot! Dili sayon ang rutina, apan pagkadaghang panalangin ang akong nadawat sa pag-alagad dinhi.”

● Ang pagboluntaryo sa konstruksiyon maoy pagpakig-ambit sa pagtukod sa mga pasilidad sa branch office ug sa mga Kingdom Hall. Ang mga construction servant, nga maoy pagtawag kanila, motabang sa maong pagpanukod. Usa kini ka dagway sa sagradong pag-alagad, sama sa buluhaton niadtong nagtukod sa templo ni Solomon. (1 Hari 8:13-18) Ang mga kahikayan sa pag-atiman sa mga construction servant sama ra usab sa pamilyang Bethel. Pagkadako sa pribilehiyo niining mga igsoong lalaki ug babaye nga nag-alagad niining buluhatona alang sa kadayeganan ni Jehova!

Alagara si Jehova nga Bug-os Kalag

Ang pag-alagad kang Jehova mao ang labing maayong paagi sa paggamit sa imong kinabuhi. Nganong dili nimo himoong tumong ang pag-alagad sa Diyos sa bug-os-panahon? Hisgoti ang bug-os-panahong pag-alagad uban sa imong mga ginikanan, mga ansiyano, ug sa circuit overseer. Kon ikaw interesado sa pag-alagad sa Bethel o sa pagtungha sa School for Kingdom Evangelizers, tambong sa mga miting alang sa kuwalipikadong mga aplikante nga himoon panahon sa mga regional convention.

Tinuod, dili tanan mahimong kuwalipikado o makaalagad nga bug-os-panahon. Usahay tungod sa mga sakit, panalapi, ug mga obligasyon sa pamilya limitado ang imong mahimo. Bisan pa niana, ang tanang nagpahinungod nga mga Kristohanon angayng motuman sa sugo sa Bibliya: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Buot ni Jehova nga buhaton nimo ang kinamaayohan sumala sa imong mga sirkumstansiya. Busa bisan unsay imong kahimtang, himoang sentro sa imong kinabuhi ang pag-alagad kang Jehova. Paghimog mga tumong sa pag-alagad sa Diyos nga maarangan nimo sa pagkab-ot. Oo, “hinumdomi ang imong Maglalalang samtang batan-on ka pa”​—ug sa pagbuhat niana ikaw mapanalanginan hangtod sa kahangtoran!

Gawas kon ipaila, ang mga kinutlo sa Kasulatan maoy gikan sa Bag-ong Kalibotang Hubad sa Balaang Kasulatan.