Makaboluntaryo Ka Ba?

¹ Nahitabo ang usa ka talagsaong hitabo sa tuig 778 W.K.P. Diha sa panan-awon, ang manalagnang Isaias nakakita kang “Jehova, nga naglingkod sa usa ka trono nga hataas ug tinuboy.” Dayon nadungog ni Isaias ang mga serapin nga nagdapit sa pagtagad alang sa himaya ni Jehova, nga nag-ingon: “Balaan, balaan, balaan si Jehova sa mga panon.” Pagkamakalilisang gayod kadto! Nianang hitaboa, si Jehova nagpatunghag mahagitong pangutana: “Kinsa ang akong ipadala, ug kinsa ang moadto alang kanamo?” Walay gihatag nga katin-awan kon bahin sa matang sa asaynment o kon kaha ang tawo nga moboluntaryo makabatog kaayohan gikan niana. Apan, sa way-pagpanuko, si Isaias misanong: “Ania ako! Ipadala ako.”​—Isa. 6:​1, 3, 8.

² Kining espiritu sa kahinangop nga mobuhat bisan unsay ipabuhat ni Jehova magpaila sa iyang katawhan. (Sal. 110:3) Ug karong adlawa ang usa ka pagdapit gipalanog alang kanilang makaboluntaryo. Andam ka ba sa pagsanong uban ang mahinangpong espiritu, nga susama nianang kang Isaias?

³ Adunay nagpadayong panginahanglan alang sa mga igsoong lalaki sa pag-alagad sa Bethel. Nagkinahanglan kini nga sila magbaton ug mainitong tinguha sa pag-una sa intereses sa Gingharian ug magmahinangpon sa pagbuhat bisan unsay ipabuhat sa pagpaluyo sa tibuok-kalibotang buluhaton sa pagsangyaw. (Mat. 6:33) Sa pagkatinuod, ang pag-alagad ingong membro sa pamilyang Bethel maghatag sa usa ug linaing kahigayonan sa pag-alagad kang Jehova diha sa tibuok-kalag nga paagi. Sa unsang paagi?

⁴ Ang Trabaho sa Bethel: Hunahunaa ang tanang regular nga ginahimo diha sa tulo ka hugpong sa mga tinukod sa Bethel nga nahimutang sa Tinipong Bansa, sa Brooklyn, Patterson, ug Wallkill, New York. Ang 5,682 ka igsoong lalaki ug babaye nga naglangkob sa pamilyang Bethel niining tulo ka dapit ang nakapribilehiyo nga nalangkit gayod sa paggamag mga Bibliya ug literatura sa Bibliya aron magamit diha sa tibuok-kalibotang nataran ug sa personal nga pagtuon. (Mat. 24:45) Pananglitan, niining miaging tuig sa pag-alagad, 24,364,670 ka libro, 39,813,464 ka bokleta ug brosyur, 270,258,000 ka magasin, ug 1,271,041 ka audiocassette ang gigama ug gipadala ingong resulta sa hiniusang paningkamot sa pamilyang Bethel sa Tinipong Bansa. Dinhi sa Pilipinas, ang 360 ka membro sa pamilyang Bethel sa Quezon City dili lamang nakig-ambit sa paggamag kapin sa 10,000,000 ka magasin sulod sa miaging tuig sa pag-alagad, kondili ang tem sa kapin sa 60 diha sa translation department naghubad sa mga libro ug mga brosyur ngadto sa pito ka pinulongan aron kini makomposo ug mapadala ngadto sa sanga sa Hapon alang sa pag-imprenta. Sa tibuok kalibotan adunay kapin sa 1,900 ka maghuhubad ug ang literatura gipatik diha sa kapin sa 300 ka pinulongan. Daghang mahinangpong mga boluntaryo ang gikinahanglan aron mag-imprenta ug magpadala sa literatura, maghinlo, magmentinar, maghikay sa pagkaon, mamalit, mag-atiman sa maayong panglawas, ug daghan pang ubang kalihokan sa Bethel.

⁵ Ang pagpalampos niining tanang trabaho maghatag ug dako kaayo apan makapatagbaw sa espirituwal nga buluhaton. Tungod sa pagkahibalo nga ang tibuok natong kalig-on ug kusog gigamit sa pagpaluyo sa pagsangyaw ug pagtudlo nga kalihokan moresulta ug dakong kalipay. Ang pag-alagad sa Bethel motabang kanato nga masinati sa organisasyon ni Jehova diha sa mas dako gayong pagkatino. Gipahinumdoman kita nga ang salmista nagdasig sa mga Israelinhon nga mas pa gayong sination ang yutan-ong sentro sa teokratikanhong pagmando sa ilang adlaw.​—Sal. 48:​12, 13.

⁶ Mga Panalangin sa Pag-alagad sa Bethel: Unsay gibati niadtong nag-alagad sa Bethel bahin sa ilang mga pribilehiyo sa pag-alagad? Matikdi ang mosunod nga mga komento gikan sa batan-on ug tigulang nga mga membro sa pamilyang Bethel. Usa ka membro sa pamilyang Bethel kinsa tulo ka tuig nga nakapahimulos sa pag-alagad sa Bethel mikomento: “Ang pagkaanaa sa Bethel nakapalig-on sa akong relasyon kang Jehova. Samtang nagkadugay ang akong pag-alagad dinhi ug mas daghan ang akong nakat-onan bahin sa palakaw sa Bethel, mas pa nga nagtudlo kini kanako bahin sa personalidad ni Jehova. Ang pag-alagad sa Bethel nakapahingangha usab kanako sa pagkakita nga si Jehova naggamit sa mga tawo​—tanang matang sa tawo. Ug dili kinahanglang mahingpit ka aron madawat niya.”

⁷ Usa ka batan-ong igsoong lalaki nahinumdom: “Nahinumdom ako nga naghunahuna sa akong kaugalingon, ‘Pagkaanindot unya nga makasulod sa bag-ong kalibotan ug sultihan ang nabanhawng matinumanong mga tawo sa karaan nga ako nag-alagad sa daghang tuig sa Bethel, inay nga maningkamot nga mahimong adunahan sa kalibotan.’”

⁸ Usa ka batan-ong igsoong lalaki namalandong bahin sa pagbansay nga iyang nadawat: “Ang pagkat-on bahin sa akong kaugalingon ug kon unsay akong gikinahanglang pauswagon ug dayon pag-ugmad nianang mga hiyasa nahimong dakong panalangin. Akong gibati nga karon ako mas makaarang sa pag-alagad kang Jehova. Akong nakaplagan nga ako mas mapailobon, nakabaton ug dugang pagpugong sa kaugalingon, ug nakapasundayag ug dugang paghigugma.”

⁹ Usa ka igsoong babaye naghunahuna bahin sa iyang mga panalangin nga nadawat hangtod sa pagkakaron: “Ang espirituwal nga mga programa dinhi dugang nagtudlo kanako bahin kang Jehova ug kon sa unsang paagi ako makasundog kaniya nga mas maayo pa sa panghunahuna, pagbati, ug lihok. Ug tungod kay ang pagbansay nagapadayon, kini maoy padayong panalangin.”

¹⁰ Usa ka igsoong lalaki nga naggugol ug kinatibuk-ang 59 ka tuig sa bug-os-panahong pag-alagad nga ministeryo, nga kapin sa 43 nianang mga tuiga ang gigugol diha sa Bethel, miingon: “Ang Bethel dili samag usa ka monasteryo, ingon sa paghunahuna tingali sa pipila. Daghan ang among nahimo tungod sa among naeskedyul nga paagi sa pagkinabuhi. . . . Walay adlaw nga ako miabot sa pagtrabaho ug wala malipay sa akong gibuhat. Ngano? Tungod kay sa dihang maghago kita nga tibuok-kalag alang kang Jehova, kita may katagbawan tungod sa pagkahibalo nga ‘atong nabuhat ang angay natong pagabuhaton.’”​—Luc. 17:10.

¹¹ Laing igsoong lalaki, nga nag-alagad na sa Bethel sa 62 ka tuig, miingon: “Ako lig-ong nagtuo nga ang Bethel mao ang labing maayong dapit dinhi sa yuta una pa moabot ang yutan-ong Paraiso. Wala gayod ako magbasol nga akong gihimong tibuok-kinabuhing karera ang bug-os-panahong pag-alagad. Pagkadakong kalipay kadto nga nakasaksi ug nakaambit sa dakong pag-uswag sa yutan-ong organisasyon ni Jehova! Maoy akong determinasyon, uban sa tabang ni Jehova, nga ipadayon ang paghimo sa Bethel nga akong pinuy-anan ug tibuok-kalag nga magkugi ako sa pagpauswag sa intereses sa Gingharian.”

¹² Kini nga mga membro sa pamilyang Bethel naghisgot sa pipila lamang sa daghang panalangin nga mahimo nimong matagamtam kon makaboluntaryo ka sa pag-alagad sa Bethel. Apan sama gayod sa pagdawat sa bisan unsang pribilehiyo sa pag-alagad, kinahanglang unang makab-ot mo ang mga kuwalipikasyon. Unsa ang pipila sa mga kinahanglanon aron makaalagad ingong membro sa pamilyang Bethel?

¹³ Mga Kinahanglanon sa Pag-alagad sa Bethel: Ang pangunang mga kinahanglanon alang niadtong moaplay sa pag-alagad sa Bethel gipakita diha sa giduyog nga kahon. Dugang pa, hinungdanon nga sila mahinangop nga motrabahong makugihon, dili “mahigugmaon sa kalipayan.” (2 Tim. 3:4; 1 Cor. 13:11) Ang mga membro sa pamilyang Bethel kinahanglang espirituwal nga mga lalaki ug babaye kinsa nakaugmad ug maayong personal nga mga batasan sa pagtuon ug nakabansay sa ilang mga gahom sa pagsabot aron sa “pag-ila sa maayo ug sa daotan.” (Heb. 5:14) Ang ilang Kristohanong pagkahamtong angayng napasundayag na diha sa tanang bahin sa kinabuhi, lakip ang ilang panapot, pamostura, ug pagpili sa musika ug kalingawan. Ang mahinangpon-sa-kasingkasing nga mga membro sa pamilyang Bethel mag-alagad bisan asa sila tingali gikinahanglan. Ang batan-ong mga membro sagad nga hatagan ug mga asaynment nga naglangkit sa hagong trabaho, lakip ang pag-imprenta, pag-andam ug pagpadala sa literatura, paggalam, pag-atiman sa balay, paghinlo, paglaba, ug paghikay sa pagkaon. (Prov. 20:29) Apan, dili sama sa sekular nga trabaho ang matag asaynment magdalag dakong katagbawan tungod kay kini maoy sagradong pag-alagad nga maghatag ug himaya kang Jehova.​—Col. 3:23.

¹⁴ Usa ka tuig ang kinamub-ang pag-estar alang kanilang gidapit sa pag-alagad sa Bethel. Magpaarang kini kanila nga mabansay aron mahimong mabungahong mga trabahante. Ang paglaom mao nga sila makahimo sa Bethel nga ilang pinuy-anan. Ang gugma kang Jehova ang nagpalihok sa mga membro sa pamilyang Bethel nga unahon ang buluhaton sa Gingharian kay sa personal nga intereses, nga magpahimuot kang Jehova.​—Mat. 16:24.

¹⁵ Presenteng mga Panginahanglan: Tungod sa matang sa trabaho nga ginahimo diha sa Bethel sa Pilipinas, ang atong presenteng panginahanglan mao gayod ang ulitawong mga igsoon. Gipalabi kadtong mga regular payunir, sanglit anaa na sila sa bug-os-panahong buluhaton. Usahay adunay mga panginahanglan sa dalagang mga igsoon ug mga magtiayon gikan sa 19 ngadto sa 35 anyos ang panuigon kinsa aduna tingali ing pipila ka kahanas nga gikinahanglan sa Bethel. Dugang pa, ang pipila ka igsoong lalaki ug babaye nga hayan mokapin nag diyutay sa 35 ug adunay linaing mga kahanas ug pagkabansay nga magamit sa Bethel gidasig nga moaplay. Pananglitan, kini naglakip sa mga doktor, inhenyero, rehistradong mga nars, o mga mekaniko, sa pagngalan sa pipila ka pananglitan. Apan, wala kami magdasig sa mga indibiduwal nga mokuhag linaing edukasyon o pagbansay nga anaa sa hunahuna nga kini magpadako sa ilang purohan nga matawag sa Bethel. Kadtong nakabaton na ug linaing pagbansay, hayan sa wala pa makadangat sa kamatuoran, mahimong mosulat ug usa ka detalyadong résumé ug ipataban kini sa Bethel Information Sheet sa dihang kini ipadala.

¹⁶ Kon buot nimong moalagad sa Bethel, mahimo kang mohangyo ug Bethel Information Sheet gikan sa sangang buhatan. Kini kinahanglang pil-apan ug ihatag ngadto sa komite sa pag-alagad sa kongregasyon aron ipadala sa sangang buhatan. Kon adunay panginahanglan alang sa tabang sa Bethel, ang pagpili himoon gikan sa mga Information Sheet nga nakapayl ug usa ka Bethel Application ang ipadala niadtong mahimong mohaom sa panginahanglan. Kon wala ka pa dapita human sa usa o duha ka tuig, maayong mosulat pag-usab ug bag-ohon ang imong aplikasyon aron among mahibaloan nga ikaw anaa pa sa kahimtang nga makaboluntaryo sa Bethel. Dili tanan ang mahimong tawagon sa Bethel, busa kon ikaw wala tawaga, nan ipadayon ang imong payunir nga pag-alagad diha sa imong asaynment, nga nagasalig nga si Jehova nasayod kon asa ka magmalamposon sa labing ikaayo.

¹⁷ Ang pag-alagad kang Jehova nga duyog sa suod nga panag-ubanay sa dugay nang mga alagad ni Jehova maoy talagsaong pribilehiyo niadtong nagtrabaho sa Bethel. Gipabilhan sa Nagamandong Lawas ang espiritu sa pagsakripisyo sa kaugalingon sa tanan nga nagboluntaryo sa pag-alagad sa mga panginahanglan sa atong tibuok-kalibotang panag-igsoonay.​— Filip. 2:​20-​22; 2 Tim. 4:11.

¹⁸ Mga Batan-on​—Andama ang Inyong Kaugalingon Karon sa Pag-alagad sa Bethel: Ang pagpangandam sa pag-alagad sa Bethel magsugod nga sayo kaayo sa dili pa moabot ang labing kubos nga kinahanglanong edad nga 19 anyos. Unsay buhaton sa mga batan-on sa pag-andam sa ilang kaugalingon sa pag-alagad sa Bethel? Si Jesus miingon: “Kinsa kaninyo nga buot magtukod ug torre nga dili una molingkod ug kuwentahon ang gasto?” (Luc. 14:28) Sanglit ang pagpangandam ug pagplano hinungdanon sa kalamposan sa bisan unsang proyekto sa pagtukod, pagkahinungdanon gayod nga ang mga batan-on maghatag ug mainampingong pagtagad kon sa unsang paagi ilang tukoron ang ilang umaabot diha sa pag-alagad kang Jehova! Ang lig-ong pundasyon kinahanglang ipahiluna nga sayo sa kinabuhi aron ilang makab-ot ang espirituwal nga mga tumong. Ingong usa ka batan-on, unsa ka maayo ang imong pagpahiluna sa imong pundasyon? Kon buot nimong moalagad sa Bethel, ikaw makabatog kaayohan pinaagi sa mainampingong pagkonsiderar sa mosunod.

¹⁹ ‘Hatagig Luna’ Kining Linaing Pribilehiyo sa Pag-alagad: Ingon sa natala sa Mateo 19:​12, gidasig ni Jesus ang iyang mga tinun-an sa ‘paghatag ug luna’ alang sa dalan sa pagkatagsaanon. Ngano? Dili tungod sa personal nga mga hinungdan, kondili “tungod sa gingharian sa mga langit.” Sa susama si Pablo nagdasig sa maong kurso diha sa “makanunayong pag-alagad sa Ginoo nga walay pagkalinga.” (1 Cor. 7:32-35) Ugaling lang, nasayloan sa pipila ang pribilehiyo sa pag-alagad ingong di-minyong mga lalaki sa Bethel tungod sa pagminyo sa sayong pangedaron. Buot namong dasigon ang batan-ong mga igsoong lalaki sa paggamit sa ilang mga kusog sa pagpangagpas sa bug-os-panahong ministeryo samtang sila wala pay pamilyahanong mga responsabilidad. Dayon, kon human sa usa ka yugto sa panahon sila makahukom sa pagminyo, sila mahimong mas maayo kaayong mga bana tungod kay nakabaton na ug dugang kasinatian sa kinabuhi ug sa Kristohanong ministeryo. Human makaalagad sa ubay-ubay nga mga tuig sa Bethel, ang pipila naminyo ug nakapadayon sa pag-alagad didto ingong magtiayon. Kon sila sa ulahi adunay ubang mga pribilehiyo, sama sa nagapanawng buluhaton o misyonaryong pag-alagad, tinong dili nila basolan ang panahon nga ilang gigahin sa paghatag ug luna sa pag-alagad sa Bethel.

²⁰ Ayaw Pagpalinga sa Materyal nga mga Pangagpas: Makaayong mosukna ang matag batan-on: ‘Ang ako bang tumong human makagraduwar sa hayskul mao ang pagpangagpas sa bug-os-panahong sekular nga karera o ang pag-alagad ba kang Jehova nga bug-os panahon?’ Ibutang ta, ang pagpangagpas sa ikaduhang kurso magkinahanglag mga pagsakripisyo. Apan mao man usab ang pagpangagpas sa sekular nga karera! Sa kataposan, unsang kursoha ang aduna gayod ing dumalayon ug mapuslanong resulta? Si Jesus naghatag ug tin-awng tubag. Sumala sa Mateo 6:19-21, siya miingon: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat. Kay kon hain gani ang imong bahandi, atua usab didto ang imong kasingkasing.” Hinaot ang atong mga kasingkasing dili gayod moagak kanato sa pagpangagpas sa kalibotanong karera o materyal nga mga butang kondili ang tibuok-kalag nga pag-alagad kang Jehova. Ang tanan kanato kinahanglang moila nga ang bugtong bililhong tumong nga takos pangagpason mao ang maayong relasyon uban kang Jehova, aron malipay nato ang iyang kasingkasing. (Prov. 27:11) Pinaagi sa pag-una kang Jehova sa atong kinabuhi samtang batan-on pa, atong gipakita kon unsay atong mga prinsipyo ug kon unsa ka hinungdanon ang Gingharian alang kanato. Hinumdomi, “ang panalangin ni Jehova​​—mao kana ang makapadato, ug dili niya kana dugangan ug kasakit.” (Prov. 10:22) Ang mga batan-on adunay ekselenteng kahigayonan nga ipakita kon unsa ang hilig sa ilang mga kasingkasing pinaagi sa paghatag ug balik nianang bililhong butang ngadto kang Jehova tungod sa tanan nga iyang gihatag kanila. Ang pag-alagad sa Bethel nagtagana nianang talagsaong kahigayonan alang niadtong makakab-ot sa mga kuwalipikasyon. Ang usa ka tikang ngadto niini mao ang pagsugod diha sa payunir nga pag-alagad.

²¹ Kadtong Nag-alagad sa Bethel Kinahanglang Hinlo sa Moral: Ang salmista misukna: “Unsaon paghinlo sa usa ka batan-ong lalaki sa iyang alagianan?” Siya mitubag: “Pinaagi sa pagpadayon sa pagbantay subay sa pulong [ni Jehova].” (Sal. 119:9) Kana maglakip sa paglikay sa bisan unsang butang maylabot sa moral nga kadunotan sa sistema sa mga butang ni Satanas. Ang pornograpiya sa Internet, di-hustong panggawi uban sa kaatbang nga sekso, makadaot nga musika, makauulawng kalingawan, ug pag-inom ug alkoholikong mga ilimnon sa menor de edad maoy pipila lamang sa mga lit-ag nga gigamit ni Satanas sa pagpugong sa atong mga batan-on gikan sa pagkab-ot sa espirituwal nga mga tumong. Ang lig-ong determinasyon gikinahanglan aron masuklan kini nga mga taktika. Ingong batan-on, kon ikaw nakakaplag sa imong kaugalingon nga nalangkit sa bisan hain niining mga butanga, pakigsulti sa mga ansiyano sa imong kongregasyon ug sulbara kini nga mga gumonhap una pa moaplay sa pag-alagad sa Bethel. Ang pagbaton ug hinlong tanlag hinungdanon sa pag-alagad kang Jehova nga bug-os.​—1 Tim. 1:5.

²² Pagpakighigala sa Uban: Ang usa ka hinungdanong kinahanglanon sa pagpalampos sa pag-alagad sa Bethel mao ang pagpakighigala sa uban. Ang pamilyang Bethel sa Pilipinas gilangkoban sa ginatos ka igsoong lalaki ug babaye gikan sa tanang hut-ong sa kinabuhi. Bisan tuod kining nagkadaiyang mga personalidad nakadugang sa espirituwal nga katahom sa Bethel, usahay kini makamugna usab ug mga suliran. Kon imong gikonsiderar ang pag-alagad sa Bethel, makaayong pangutan-on ang imong kaugalingon: ‘Ako ba daling masilo sa dihang ang uban di moduyog sa akong opinyon? Ang uban ba nakakaplag kanako nga mahigalaon gayod?’ Kon gikinahanglan nimong mouswag nianang mga bahina, sugdi karon ang pag-ugmad sa maong butang. Ang pagbuhat nimo sa ingon motabang kanimo nga mas daling makapasibo sa pagpuyo ug pagtrabaho uban sa mga membro sa pamilyang Bethel.

²³ Pagkugig maayo nga mahimong espirituwal nga tawo pinaagi sa pag-ugmad ug suod nga relasyon uban kang Jehova. Ugmara ang maayong programa sa personal nga pagtuon, nga maglakip sa pagbasa sa Bibliya sa adlaw-adlaw. Magmaaktibo sa pagpakig-ambit sa maayong balita sa uban. Pinaagi sa pagbuhat niining mga butanga, imong mapadayag ang imong espirituwal nga pag-uswag. (1 Tim. 4:15) Pagkatalagsaong mga kalaoman ang naghulat niadtong nangandam na karon alang sa karera diha sa bug-os-panahong pag-alagad!

²⁴ Mga Ginikanan, Bansaya ang Inyong mga Anak: Unsay mahimo sa mga ginikanan sa pagdasig sa mga batan-on nga pangagpason ang bug-os-panahong ministeryo? Si Jesus miingon: “Ang matag usa nga hingpit nga natudloan mahisama sa iyang magtutudlo.” (Luc. 6:40) Ang estudyante nga nabansay sa bug-os natural lamang nga magpasundayag ug maayong mga hiyas sa iyang dedikadong magtutudlo. Kining prinsipyoha kinahanglang kanunayng ibutang sa hunahuna sa Kristohanong mga ginikanan samtang sila nagapanikaysikay sa pagbansay sa ilang mga anak nga “maoy [ilang] tumong ang diyosnong pagkamahinalaron.” (1 Tim. 4:7) Sanglit ang mga anak makiling sa pagpabanaag sa tinamdan sa ilang mga ginikanan bahin sa espirituwal nga butang, makaayong suknaon sa mga ginikanan ang ilang kaugalingon: ‘Gipabilhan ba namo sa personal ang buluhaton nga ginahimo sa Bethel aron palamboon ang intereses sa matuod nga pagsimba kang Jehova? Giila ba namo ang panalangin ni Jehova diha sa kahikayan sa Bethel? Gituohan ba namo nga ang kinabuhi sa pag-alagad kang Jehova mao ang labing maayong karera nga mahimong pilion sa among mga anak? Gidasig ba namo ang bug-os-panahong pag-alagad pinaagi sa pulong ug panig-ingnan?’ Ang ato mismong kinasingkasing nga pagpabili sa pag-alagad sa Bethel ug ang buluhaton nga ginahimo didto motabang kanato sa pagsilsil ug susamang pagpabili diha sa atong mga anak.

²⁵ Si Elkana ug Ana adunay lalom nga pagpabili sa matuod nga pagsimba. Nagpakita sila ug takos-tagdon nga panig-ingnan alang sa Kristohanong mga ginikanan karon. Sa karaang Israel, ang mga Israelinhong lalaki lamang ang gibaoran nga “moatubang sa nawong sa matuod nga Ginoo, si Jehova” makatulo sa usa ka tuig diha sa tabernakulo. Bisan pa niana, si Elkana mibiyaheg mga 30 kilometros, lagmit gayod nga nagbaktas, uban sa tibuok niyang pamilya “matag tuig” aron sa paghalad diha niining sentro sa pagsimba kang Jehova. (Ex. 23:17; 1 Sam. 1:​3, 4, 9, 19; 2:19) Tataw nga buot niining maong ulo sa pamilya nga ang iyang tibuok pamilya makaduyog sa iyang personal nga kabalaka alang sa espirituwal nga mga butang.

²⁶ Si Ana adunay samang interes sa iyang bana bahin sa matuod nga pagsimba. Dulot niyang gibati ang iyang obligasyon sa pag-amot alang sa pagpaluyo sa matuod nga pagsimba diha sa tabernakulo. Nanaad si Ana nga kon hatagan siya ni Jehova ug anak, iyang ihatag siya alang sa pag-alagad sa tabernakulo. (1 Sam. 1:11) Ang Moisesnong Kasugoan nagtugot sa bana sa katungod nga magpaimbalido sa di-angay nga panaad sa iyang asawa. (Num. 30:​6-8) Apan, dayag nga giuyonan ni Elkana ang panaad ni Ana, nga nagpakita nga iyang gipaluyohan usab ang maong kapahayagan sa matuod nga pagsimba!​—1 Sam. 1:​22, 23.

²⁷ Naapektohan ba ang ilang anak nga si Samuel sa mapuslanong paagi tungod sa gipakitang pagpabili ug maayong espiritu sa iyang mga ginikanan? Oo, naapektohan gayod. Samtang bata pa, si Samuel mahinangpon ug matinumanong nag-atiman sa iyang natudlong mga buluhaton ug gibansay alang sa dugang gipabilhang mga pribilehiyo sa pag-alagad sa Diyos. Ang interes nga gipakita ni Elkana ug Ana sa pag-alagad ni Samuel sa tabernakulo wala matapos human nga iyang gidawat ang iyang mga buluhaton didto. Sila padayong miduaw kaniya nga regular aron motanyag ug pagdasig ug pagpaluyo samtang siya nangagpas sa bug-os-panahong pag-alagad.​—1 Sam. 2:​18, 19.

²⁸ Pagkatalagsaong panig-ingnan ang gipakita ni Elkana ug Ana alang sa Kristohanong mga ginikanan karon! Sa dihang ang atong mga anak makadungog ug kinasingkasing nga kapahayagan sa pagpabili alang sa pribilehiyo sa pag-alagad sa Bethel ug makita ang espiritu sa pagsakripisyo sa kaugalingon nga atong gipasundayag sa pagpadako sa intereses sa Gingharian, sila usab makaugmad ug kasingkasing nga makiling sa pag-alagad sa uban. Daghang ginikanan ang malamposong nakasilsil niining maayong hilig diha sa ilang mga anak. Usa ka siyete anyos misulat: “Sa pagdako ko, buot kong mopuyo sa Bethel, ug adunay pipila ka butang nga buot kong buhaton didto. (1) Pagmakenilya sa mga magasing Bantayanang Torre ug Pagmata!, (2) pagtrabaho sa inyong art section, (3) pagpilo ug mga nilabhan. Bisan unsang trabaho ang mabatonan. Dili ako mamili.” Pagkamakapadasig gayod nga makita ang maong mahinangpong espiritu nga maugmad diha sa kasingkasing sa atong mga anak!

²⁹ Mga batan-on, hinumdomi nga “ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Padayong pangagpasa ang espirituwal nga mga tumong, lakip ang linaing pribilehiyo sa pag-alagad sa Bethel. Mga ginikanan, sundoga ang panig-ingnan sa matinumanong mga tawo sa kakaraanan kinsa nagdasig sa ilang mga anak nga ugmaron ang diyosnong debosyon. (2 Ped. 3:11) Ug hinaot kitang tanan mohimo sa atong bahin sa pagtabang sa atong batan-ong mga igsoong lalaki ug babaye sa pag-alagad sa atong Dakong Maglalalang kutob sa maarangan gayod, kay kini ‘naghupot ug saad sa kinabuhi karon ug sa umaabot.’​—1 Tim. 4:8; Eccl. 12:1.

[Kahon sa panid 4]

Pangunang mga Kinahanglanon sa Pag-alagad sa Bethel

● Bawtismado labing menos usa ka tuig

● Espirituwal nga tawo nga may lalom nga gugma kang Jehova ug sa iyang organisasyon

● Anaa sa maayong espirituwal, mental, emosyonal, ug pisikal nga kahimsog

● Labing maayo kon nag-alagad ingong payunir

● Lungsoranon o legal nga permanenteng molupyo sa Pilipinas

● 19-​35 anyos ang edad