Nagatan-aw nga Mapabilhon sa “Balay sa Diyos”

“USA ka butang ang gipangayo ko kang Jehova​—nga pagapangitaon ko, nga makapuyo ako sa balay ni Jehova sa tanang mga adlaw sa akong kinabuhi, aron sa pagtan-aw sa katahom ni Jehova ug sa pagtan-aw nga mapabilhon sa iyang templo.”​—Salmo 27:4.

Ang mapabilhong Haring David nagtan-aw nga malipayon, o mahinangpon, diha sa templo ni Jehova. Sama ba usab ang imong gibati labot sa mga sentro sa matuod nga pagsimba karong adlawa? Ang kapin sa 95 ka puloy-anang Bethel sa mga sanga sa Watch Tower Society maoy lakip sa mga pasilidad nga nalangkit sa pagsimba ni Jehova sa atong panahon.

“Sa magtan-aw ug balik sa akong daghang tuig sa pag-alagad sa Bethel mapuno ako sa lalom nga pasalamat ug dako nga apresasyon, nga nagkadako matag tuig,” miingon si Helga, kinsa nagsugod sa pagtrabaho sa puloy-anan sa Alemanya niadtong 1948. Si Helga maoy usa sa 13,828 ka malipayong mga trabahante sa Bethel sa tibuok-kalibotan kinsa sa 1993 nga tuig sa pag-alagad ‘nakakita sa katahom ni Jehova.’ Unsa gayod ang kahulogan sa ngalang Bethel? Sa unsang paagi ang matag usa sa mga Saksi ni Jehova, nag-alagad man siya sa Diyos sulod sa Bethel o sa gawas, makatan-aw nga mapabilhon niining kahikayana?

Usa ka Ngalan nga Nagkinahanglag Debosyon

Ang “Bethel” mao ang labing haom nga ngalan, sanglit ang Hebreohanong pulong Behth-ʼElʹ nagkahulogang “Balay sa Diyos.” (Genesis 28:19, potnot) Oo, ang Bethel kaamgid sa maayong-pagkaorganisar nga balay, o ‘usa ka panimalay nga gitukod pinaagi sa kaalam,’ uban sa Diyos ug sa iyang kabubut-on nga mao ang sentro sa pagtagad. (Proverbio 24:3) “Kini sama nga nagpuyo diha sa usa ka pamilya. Kami adunay organisado-kaayong adlaw-adlaw nga rotina,” mapabilhong miingon si Herta. Siya nag-alagad sa sama ra nga Bethel nga gialagaran ni Helga sulod sa kapin sa 45 ka tuig. Ang matag membro niining dakong pamilya adunay iyang kaugalingong trabaho ug iyang dapit, nga nagtugot kaniya nga mobatig kalipay ug may kasegurohan. Nahiuyon sa ngalang Bethel, ang maayong kahikayan ug organisasyon nagpaila sa matag departamento. Kini mopalambo sa kalinaw, nga nagpaposible sa epektibong pagsangyaw sa maayong balita, ug naghatag sa mga kongregasyon ug malig-ong katarongan sa paghatag ug labing taas nga pagtamod sa “Balay sa Diyos.”​—1 Corinto 14:33, 40.

Nganong gikinahanglan kining mga pasilidara? Kining magasina, pananglitan, gigama sa imprintahan sa Bethel. Ang pagsangyaw sa mensahe sa Gingharian ug ang pag-apod-apod sa espirituwal nga pagkaon, nga nakita nang daan ni Jesu-Kristo, nagpahimo sa organisasyonal nga mga kahikayan nga sama sa Bethel nga kinahanglanon kaayo​—giabagan sa andam nga mga trabahante ug tinamod kaayo sa tanang mga magsisimba ni Jehova.​—Mateo 24:14, 45.

Buot ka bang mahibalo pag dugang bahin sa rotina sa adlaw sa pagtrabaho dinhi? Sa dapit nga gipuy-an ni Helga ug Herta, usa ka mananoy nga bagting ang molanog sa tanang mga tinukod nga puloy-anan sa 6:30 s.b., bisag daghan sa kapin sa 800 ka regular nga trabahante ang momata ug mas sayo sa pag-andam alang sa adlaw. Sa alas 7:00 s.b., Lunes ngadto sa Sabado, ang pamilya magtigom sa mga komedor alang sa panaghisgot sa teksto sa adlaw, o sa pagsimba sa buntag. Usa ka sustansiyadong pamahaw ang mosunod. Ang matag adlaw sa trabaho magsugod sa alas 8:00 s.b. ug mokabat ug walo ka oras, nga mohunong lang panahon sa paniudto. (Ang pamilya kasagaran motrabaho tunga sa adlaw sa Sabado.) Makosena man, imprintahanan, labhanan, mga opisina, talyer, tahianan sa libro, o bisan haing departamento, daghan kaayo ang trabaho.

Magabii ug sa mga hinapos sa semana, ang mga membro sa pamilya makig-uban sa lokal nga mga kongregasyon diha sa mga tigom ug sa pagsangyaw sa publiko. Daghang igsoon sa Bethel maoy mga ansiano o ministeryal nga mga alagad niining mga kongregasyona. Tinuod nga gipabilhan sa lokal nga mga Saksi kini nga tabang, ang duha ka pundok magkaubang nagtrabaho nga may panaghiusa ingong usa ka lawas, nga nagatahod ug masinabtanon sa usag usa. (Colosas 2:19) Ang matag usa ka trabahante sa Bethel nahibalo nga ang iyang asaynment diha sa “Balay sa Diyos” mauna kay sa ubang mga kalihokan. Hinuon, ang kadasig alang sa pagsangyaw ug pagkalangkit sa kongregasyon, inubanan sa usa ka timbang nga tinamdan, makapalig-on sa espirituwalidad sa trabahante sa Bethel, makadugang sa iyang kalipay, ug maghimo kaniya nga mas mabungahong membro sa pamilya. Pagkahinungdanon niining mga hiyasa dihang magtrabaho diha sa usa ka “balay” kansang ngalan nalangkit sa bug-os-kalag nga debosyon!

Himoang Malamposon ang Pag-alagad sa Bethel

Unsay nakatabang sa dili-maihap nga mga Saksi ni Jehova sa paghimo sa pag-alagad sa Bethel nga malamposon? Ang mga membro sa pamilyang Bethel sa Pransiya nga daghan na kaayog kasinatian mikomento sa mosunod: “Ang gugma alang kang Jehova. Ang pagbaton ug determinasyon sa paglahutay bisag asa kita niya ibutang; pagkamapaubsanon, pagpasakop, ug pagsunod sa pagtultol nga gihatag kanato sa Sosyedad.” (Denise) “Nakamatikod ako kon unsa ka hinungdanon ang pagtahod sa prinsipyo nga gihisgotan ni Pablo sa Roma 12:10: ‘Manguna sa pagpakitag pasidungog sa usag usa.’ Kining tekstoha nagpakita kanato sa bili sa dili pag-insister nga ang atong personal nga mga opinyon dawaton kondili, hinuon, paghatag ug konsiderasyon sa opinyon sa uban. Sa laing pagkasulti, dili maningkamot nga mangibabaw.” (Jean-​Jacques) “Ang atong pagtahod sa pag-alagad sa Bethel madaot kon atong lantawon ang mga butang gikan sa unodnon, tawhanong hunahuna,” miingon si Barbara, “kay mahimong moagak kini kanato sa pagkalimot sa kamatuoran nga si Jehova ang nagadumala sa iyang organisasyon. Ang maong pagtahod mawala kon kita mapandol sa mga dili-kahingpitan sa uban.”

Ang tanan sa Bethel dili-hingpit, busa ang pagpakig-uban nagkinahanglag mainampingong pagpalandong. Maayong limitihan sa mga batan-on o sa mga bag-ohan ang ilang pagpakig-uban sa ilang katalirongan lamang. Kadtong nagapasundayag ug kiling sa pagreklamo o negatibog hunahuna dili makapalig-on nga ikauban sa Bethel o sa kongregasyon. Sa laing bahin, ang pagsundog sa “kaalam nga gikan sa itaas,” nga gibatbat sa Santiago 3:17, mohatag ug mga panalangin. Kini maoy “una sa tanan putli, unya makigdaiton, makataronganon, andam mosunod, puno sa kaluoy ug maayong mga bunga, dili mohimo ug pagpihigpihig, dili salingkapaw.” Ang maong mga hiyas, lakip sa hataas-nga-pag-antos ug kalulot, makita diha sa “Balay sa Diyos,” nga magpahimo sa pagpuyo sa usa didto nga makalilipay ug makapadasig. Bisan ang dili-Saksi nga mga bisita sagad makadayeg sa maayong batasan, pagkamahigalaon, ug malipayong espiritu sa mga trabahante.

Si Anny, kinsa kapin na sa 70 anyos ang edad ug nahimong membro sa pamilyang Bethel sa Alemanya sukad sa 1956, misaysay kon giunsa niya paghupot sa iyang pagkamainandamon sa pag-alagad: “Alang sa akong espirituwal nga kahimsog, nagkugi gayod ako nga makasubay sa mga publikasyon sa Sosyedad, sa regular nga pagtambong sa mga tigom, ug sa regular nga pagpakigbahin sa pagsangyaw. Naningkamot usab ako nga magpabiling mahimsog sa pisikal pinaagi sa pag-ehersisyo kada buntag, pinaagi sa dili-pagsakay sa elibetor sa dakong bahin sa panahon, ug pinaagi sa paglakaw kon mahimo, ilabina diha sa pag-alagad sa kanataran.

Daghang eksperyensiyado sa kinabuhi sa Bethel mouyon kang Anny. Sila dili gayod mohunong sa pagkat-on, dili gayod mohunong sa pagtrabaho. Ang pisikal nga kahimsog nagkinahanglan nga sila adunay igong katulog ug pila ka ehersisyo ug makasaranganon sa pagkaon ug pag-inom. Labing hinungdanon, dili nila pasagdan ang personal nga pag-ampo ug pagtuon sa Bibliya.

Hataas nga Pagtamod sa Balaang Pag-alagad sa Bethel

“Hain ka man nagtrabaho?” mao ang kasagarang ipangutana sa mga membro sa Bethel. Ang gitudlo nga mga trabaho lainlain, apan ang matag usa takos nga hatagag taas nga pagtamod sa tanan. Ngano? Tungod kay ang matag gitudlo nga trabaho​—nagapaandar man sa makina nga nagaimprinta sa espirituwal nga pagkaon, nagalaba, nagaluto ug nagahinlo alang sa pamilya, o nagatrabaho sa opisina​—naglangkob sa balaan nga pag-alagad. Sumala sa gihisgotan sa ibabaw, ang mga Kristohanon walay pagpihig. Hinumdomi nga ang tanang hinungdanong mga buluhaton nga gihimo sa mga saserdote ug mga Levihanon diha sa templo, diha sa mga sawang ug sa mga komedor, tanan gilantaw nga balaan nga pag-alagad kang Jehova. Naglakip kana sa pag-ihaw ug pag-andam sa mga hayop alang sa halad, pagdugang sa lana sa mga lampara, bisan paghinlo ug pagbuhat sa mga kaakohan sa tigbantay. Sa susama, ang matag asaynment sa Bethel maoy usa ka makapatagbaw ug mapuslanong kalihokan “diha sa buluhaton sa Ginoo,” sa ingon maoy usa ka talagsaon nga pribilehiyo.​—1 Corinto 15:58.

Tagda sa lakbit ang usa ka kinaiya nga makasanta sa atong paglantaw nga may pagpabili sa “Balay sa Diyos.” Ang mga Kristohanon sa Bethel ug sa gawas kinahanglang magbantay batok sa pangigi ug pagkasina, nga “makadunot sa bukog.” (Proverbio 14:30) Walay katarongan nga masina ang usa sa mga pribilehiyo sa pag-alagad sa mga trabahante sa Bethel. Dugang pa, walay dapit ang kasina diha sa pamilyang Bethel, nga maoy usa sa mga buhat sa unod. Paghulat nga mapaubsanon​—kana maoy maayong tambag alang sa usa nga daw nakalimtan samtang ang uban gihatagag mas dako nga mga pribilehiyo. Labaw sa tanan, ang mga tawo nga lahi kaayo ug kahimtang sa panalapi suod nga nagkaubang nagpuyo sa Bethel. Pagkamakapahigawad kon lantawon sa usa ang iyang mga kahimtang “kon itandi sa ubang tawo”! Ang pagkahimong tagbaw nga adunay “pagkaon ug sapot” nakatabang sa daghan sa pagpadayong matinumanon sa daghang dekada diha sa “Balay sa Diyos.”​—Galacia 5:20, 26; 6:4; 1 Timoteo 6:8.

Ang mga Saksi ni Jehova ug ang minilyon pang uban nakabatog dakong kaayohan gikan sa walay-suweldo nga mga pag-alagad nga gihimo sa Bethel​—trabaho nga ginahimo nga walay-kahakog tungod sa gugma alang sa Diyos ug sa silingan. Ang mga puloy-anang Bethel ug ang mga imprintahan sa Watch Tower Society, sama sa ubang teokratikanhong mga pasilidad, gisuportahan sa boluntaryong mga amot. (2 Corinto 9:7) Sama kang Haring David ug sa mga prinsipe ug sa mga pangulo sa Israel, kita makapakita sa atong pagtamod ug apresasyon alang sa “Balay sa Diyos” pinaagi sa paghatag ug moral ug pinansiyal nga tabang sa Sosyedad. (1 Cronicas 29:3-7) Atong tan-awon karon kon unsaon nga mahimong posible ang “pagtan-aw sa katahom ni Jehova” diha sa Bethel.

Mga Panalangin Diha sa “Balay sa Diyos”

Kon magtambong ug usa ka asembliya, mabati ba nimo ang dulot nga katagbawan, nga gilibotan ka sa malipayong mga magsisimba ni Jehova? Hunahunaa lang, usa ka trabahante sa Bethel adunay pribilehiyo sa pag-alagad kang Jehova taliwala sa usa ka pundok sa mga igsoon matag adlaw! (Salmo 26:12) Pagkamaayong kalaoman alang sa espirituwal nga pagtubo ang ginatanyag! Usa ka igsoon miingon nga siya nakakat-on sa pagtabang pa sa iyang kaugalingon sa pag-umol sa iyang personalidad sulod sa usa ka tuig diha sa Bethel kay sa iyang nahimo sa tulo ka tuig sa ubang dapit. Ngano? Tungod kay wala pay dapit sukad nga siya nakahigayon sa pagkakita ug sa pagsundog sa pagtuo sa daghan kaayong hamtong nga Kristohanong mga personalidad.​—Proverbio 13:20.

Diha sa Bethel ang usa ka tawo malibotan sa eksperyensiyadong mga magtatambag, pagaingnon pa. Dugang pa, adunay kaayohan ang pagpamati sa maayong pagkaandam nga mga komento nga ginapahayag panahon sa pagsimba sa buntag ug sa Pagtuon sa Watchtower sa pamilyang Bethel ug sa pagpamati sa mga pakigpulong sa mga gabii sa Lunes. Ang mga bag-ong abot makadawat ug instruksiyon diha sa Bethel Entrants’ School ug hatagag asaynment sa pagbasa sa tibuok Bibliya sulod sa unang 12 ka bulan.

Ang mga taho ug mga eksperyensiya sa mga bisita gikan sa ubang mga nasod mohatag ug dugang pagpadasig. Dugang pa, ang mga membro sa Nagamandong Lawas o ang ilang mga hawas nagaduaw sa mga sangang buhatan. “Bisag daghan silag trabaho,” miingon si Helga, “ang mga igsoon makakita gayod kanunay ug panahon alang sa usa ka mahigalaong pulong o pahiyom.” Pagkamakapadasig ang pagtan-aw mismo sa makapalagsik ug makasaranganong batasan sa maong maunongong mga lalaki!

Ilabina diha sa Bethel nga maobserbahan gayod sa usa kon sa unsang paagi nagalihok ang organisasyon sa Diyos ug kon sa unsang paagi ang iyang balaang espiritu nagapukaw sa mainandamong mga kasingkasing ug mga kamot sa paglihok. “Diha sa Bethel bation sa usa nga duol kaayo sa ‘sentro sa kalihokan,’” miingon ang usa ka igsoon, kinsa nag-alagad sa Bethel sa Pransiya sukad pa sa 1949. Siya mipadayon: “Makaingon gayod ako nga alang kanako ang Bethel mao ang matang sa bug-os-panahong pag-alagad nga nagtugot kanako sa paggugol sa labing daghang oras ug kusog sa pag-alagad kang Jehova ug sa pag-alagad sa labing daghang igsoon.” Ug dili ba mao man kana ang atong tinuod nga katuyoan sa kinabuhi​—ang pagbuhat sa kabubut-on sa Diyos? Sa Bethel ang usa “makatanyag ug pagdayeg sa tibuok adlaw.” Pagkadako nga panalangin!​—Salmo 44:8.

Sumala sa atong makita, ang usa nga nagatrabaho sa puloy-anang Bethel makakita sa katahom ni Jehova ug makakaplag ug nagkalainlaing mga panalangin. (Hebreohanon 6:10) Mahimo ba kaha nga ang pag-alagad diha sa “Balay sa Diyos” mapuslanon alang kanimo? Kadtong mga Saksi ni Jehova kinsa sa labing menos 19-anyos ang edad, kinsa adunay maayong espirituwal ug pisikal nga kahimsog, ug kinsa, sama kang Timoteo, may ‘maayog taho sa mga igsoon’ makaaplay sa pag-alagad sa Bethel. (Buhat 16:2) Gihimo sa daghan ang pag-alagad sa Bethel nga ilang buluhaton sa kinabuhi, sama niadtong gikutlo sa ibabaw. Alang kanila ang lalom nga pangandoy sa salmista​—sa ‘pagpuyo diha sa balay ni Jehova sa tanang mga adlaw sa iyang kinabuhi’​—nahimong tinuod.

Ang mga Saksi ni Jehova adunay dakong pagtahod sa nagasakripisyo-sa-kaugalingon nga espiritu nga gipakita sa ilang mga igsoong lalaki ug babaye sa Bethel, kinsa nagatuman sa ilang mga tinudlong-buluhaton nga mainandamon ug malipayon. Nagaalagad man kita kang Jehova sa Bethel o sa laing dapit, ang matag usa kanato adunay maayong katarongan nga mobati sama kang Haring David​—sa pagtan-aw nga mapabilhon, o mahinangpon, sa “Balay sa Diyos.”

[Hulagway sa panid 31]

Kining maong mga Kristohanon malipayon sa balaang pag-alagad diha sa Bethel sa Alemanya sa daghang dekada