Pagtanyag sa Maayong Balita—Uban ang Paglainlain sa Buluhatong Pamalaybalay
1 Dili ba ang kalalangan ni Jehova dagaya sa pagkalainlain? (Sal. 104:24) Aduna usab ing daghang bahin sa maayong balita nga iyang gisugo kanato sa pagwali. Ikaw ba nagagamit ug paglainlain sa imong pagsangyaw aron aboton ang daghang mga tawo kutob sa mahimo?
SA ADLAW SA MAGASIN
2 Ang Sosyedad nagadasig sa tanan nga moambit sa buluhatong magasin sa matag Sabado. Inay kay gamiton ang Ulohan nga Mahisgotan, ang usa ka 30- ngadto sa 60-segundo nga presentasyon nga nagapasiugda lamang ug usa ka artikulo maoy angay. Kon ang tagbalay may mga pangutana ug magpakitag talagsaong interes, dili kinahanglan nga mobating magdali gayod kita ngadto sa sunod nga pultahan.
3 Dili kay kulang ang paglainlain diha sa atong mga magasing Watchtower ug Awake! Sagad ang mga igsoon nga magdumala sa unang bahin sa Tigom sa Pag-alagad makapresentar man ug mga puntong igsusulti gikan sa kinabag-ohang mga magasin. Paminaw gayod; isulat ang mga sugyot nga magamit mo. Kon ang usa ka presentasyon ipasundayag, matikdi kana, praktisa kana, ug dayon gamita kana diha sa kanataran sa Sabado. Kon pordoy o way-gana ang sanong, pagpili ug laing artikulo nga ikatanyag. Ang kada gula adunay ubay-ubay nga mga ulohan nga makadani sa mga tawo nga may lainlaing interes. Mahimong suhito sa paghisgot sa tanang artikulo aron ikaw makapahiangay sa imong presentasyon ngadto sa mga tagbalay nga imong mahibalag.
LAINLAINA ANG IMONG PASIUNA
4 Maayo nga lainlainon ang imong paagi diha sa mga ganghaan. Nasulayan mo na bang sugdan ang imong presentasyon pinaagig pagtanyag sa usa ka tract o ‘handbill’ aron makasugod ug panaghisgot?
5 Walay duhaduha nga aduna pay ubang mga pasiuna diha sa basahong Nangatarongan nga wala pa nimo masulayi. Pananglitan, ang mga panid 10-11 nagsugyot sa mga introduksiyon nga gipasukad sa karong mga hitabo. Himoa ang imong kaugalingon nga nasayod kanunay sa mga balita nga mahimong magamit. Nakobrehan na bag maayo ang inyong teritoryo? Kon mao, hayan maayo nga lainlainon ang imong mga pasiuna, nga nagagamit nianang anaa sa panid 15 sa librong Nangatarongan. Usab sulaying gamiton ang pipila sa mga sugyot nga anaa sa Hulyo 15, 1988 nga Watchtower, mga panid 15-20. Gamita ang pipila sa mga pangutana sa panid 19, parapo 16, nga paneguroong pasultihon ang tagbalay sa iyang panghunahuna.
6 Ang mga tawo sa atong teritoryo nagasumikad sa lainlaing mga kagikan. Gikinahanglan tang lainlainon ang atong paagi sa pagbutad sa tanan nga magpatalinghog. (1 Cor. 9:19-23) Ang paggamit sa paglainlain makabulig kanato sa ‘pagluwas sa atong kaugalingon ug silang magapatalinghog kanato.’—1 Tim. 4:16.