Pagtanyag sa Maayong Balita—Pinaagig Pakigsultihanay sa mga Tawo
1 Ang panaghisgot o pakigsultihanay maoy “pagbayloay sa mga pagbati, mga napanid-an, mga opinyon, o mga ideya.” Apan unsaon mo man sa pagsugod ug panaghisgot bahin sa Bibliya uban sa mga tawo nga supak o okupado sa ilang kaugalingong mga kalihokan? Si Jesus misuknag mga pangutana aron ilangkit ang mga tigpaminaw.—Juan 4:9-15, 41, 42.
2 Kita gayod mag-ampo sa Diyos aron tabangan kita sa pagkaplag sa mabuot-kasingkasing nga mga tawo ug mabuksan ang dalan alang kanato sa pagpakigsulti kanila. Ang pagpamatuod mahimong sayon kon atong isipon ang kada tagbalay ingong malaomang alagad ni Jehova. Nan atong ikapaabot ang kamatuoran diha sa mainit, tim-os nga paagi nga magpadani sa mga interesado.
GAMITA ANG ATONG NABATONAN
3 Ang basahong Nangatarongan nagatanyag ug daghan maayo kaayong mga pasiuna sa mga panid 9-15. Kadaghanan niini aduna ing epektibong paggamit sa mga pangutana. Sa dihang motubag ang tagbalay sa usa ka pangutana, paminaw nga matinahoron ug tagda ang iyang opinyon sa dihang motubag ka.—Col. 4:6.
4 Siyempre, sa mosukna ka ug pangutana, wala ka mahibalo kon unsa ang tubag sa tagbalay. Mao nga andam ka sa pagpasibo sa imong panaghisgot. Sulaying magpadayon ang panagsultihanay pinaagig pagdugang ug dugang impormasyon gikan sa Bibliya nga nagalangkit sa iyang intereses ug sa pagpangutana ug dugang mga pangutana.
PANGANDAM NGA ABANTE
5 Pilia ang mga pasiuna diha sa basahong Nangatarongan nga mahimong labing epektibo diha sa linaing teritoryo. Ipahiangay ang usa niining mga pasiunaha ngadto sa kinabag-ohang Ulohan nga Mahisgotan. Sugdi ang mga butang nga magpainteres sa tagbalay, sa mubo ibutyag ang suliran, dayon ihatag ang sulbad sa Bibliya. Sa dihang mokomento siya, ayawg tamaya ang iyang ginasulti. Pangita ug mga puntos nga kauyonan ug komentohi kini. Ipunting diha sa mga butang positibo sama sa mga panalangin sa Gingharian ingong sulbad sa Bibliya sa mga gumonhap sa tawo.
6 Kon makita mong di-makataronganon ang usa ka tawo, ayawg pamugos nga dawaton niya ang imong gisulti. Hinunoa motiklop uban ang mahigalaong komento, nga nagabiyang bukas ang dalan alang sa sunod nga higayon sa pagpakigsulti kaniya.—Prov. 12:8, 18.
7 Ang ubang mga tawo mas mahiligon sa pagpakighisgot sa dihang sa impormal nga paagi mahibalag mo sila. Ayaw pagduhaduha nga sugdan ang panaghisgot sa mga tawo nga mahibalag mo sa dalan o nagapahayahay sa ilang tugkaran. Sa sugdan mo ang panaghisgot, sulaying himoon kanang maayong kasinatian alang sa tagbalay. Nga magadepende ra kanimo, mobiya sa tawo uban ang mas mauyonong tinamdan ngadto sa Diyos, sa iyang Pulong, ug sa iyang mga alagad. Niining paagiha ang tagbalay basin mahimong mas madawaton sa sunod higayon nga moduaw ang usa ka Saksi.