Pagtanyag sa Maayong Balita—Gamitang Epektibong mga Pasiuna
1 Dakong kaayohan ang malampos sa atong ministeryo kon nangandam ug epektibong mga pasiuna. Kon sa sinugdan dili ta mabutad ang atensiyon sa tagbalay, hayan dili ta mahaling ang igong interes aron angayng duawon pag-usab uban sa tumong sa pagsugod ug pagtuon sa Bibliya. Sa unsang paagi atong mahimong mas epektibo ang atong mga introduksiyon?
KATUYOAN SA MGA PASIUNA
2 Sa pagsugod, kinahanglang tin-aw sa atong hunahuna ang katuyoan sa mga introduksiyon. Nag-ingon ang Giya sa Tunghaan: “Ang introduksiyon . . . magapukaw sa interes sa ulohan. Kini kinahanglan makakabig sa pagtagad sa imong mamiminaw ug magaandam nila nga mohatag ug dakong pagtagad sa mosunod.” Midugang ang maong libro: “Ang usa sa labing maayong mga paagi sa pagpukaw sa interes . . . mao ang paglangkit sa imong mamiminaw.” (Tan-awang panid 113, par. 1, 2.) Sa unsang paagi mabuhat mo kini diha sa imong ministeryo?
3 Ang mga pasiuna nga makaplagan sa mga panid 9-15 sa basahong Nangatarongan giandam uban sa mga puntos nga gihisgotan sa itaas. Analisaha kini. Matikdi kon sa unsang paagi kini makakabig sa interes ug mopatagad sa mga tagbalay ngadto sa mga ulohan nga ginahisgotan. Nag-ingon ang usa ka sister nga sa paggamit sa lainlaing mga pasiuna, ang iyang pag-alagad sa kanataran mas nga nakalipay ug siya labaw nga nagmahunahunaon sa pagpakigsulti sa mga tawo. Maylabot sa mga sugyot diha sa basahong Nangatarongan, siya miingon: “Kini gayod mosaler.”
4 Unsang mga pasiuna ang nakaplagan mong epektibo uban sa karong Ulohan nga Mahisgotan? Imo bang nasulayan na kanang nalista ubos sa “Bibliya/Diyos” sa panid 10 sa basahong Nangatarongan? Ang usa niini nga mahimong magamit mao ang mosunod: “Nalipay akong ania ka ra sa balay. Ako nagapaambit sa akong mga silingan ug makapalig-ong punto gikan sa Bibliya. Nahibulong ka ba gayod kon unsay magpahimo sa relihiyon nga adunay tinuod nga bili uban sa Diyos?” Ang laing pasiuna mahimong: “Kami nagadasig sa mga tawo sa pagbasa sa ilang Bibliya. Ang mga tubag nga gihatag niini sa importanteng mga suliran sagad nagapatingala sa katawhan. Pananglitan, matikdi kon sa unsang paagi ang 2 Timoteo 3:1, 2, ug 2Tim 3:5 nagapakita kon nganong dili dawaton sa Diyos ang pipila ka pagsimba nga ginabuhat sa relihiyosong mga tawo.”
5 Hayan palabihon mong gamiton ang ubang mga pasiuna nga dugang pa nianang anaa sa basahong Nangatarongan. Apan, makaplagan mong labing maayo ang pagsunod sa panig-ingnan sa mga pasiuna nga anaa sa librong Nangatarongan. Kini nagapresentar ug mga isyu nga nakapabalaka sa mga tawo. Kini magpalangkit sa tagbalay diha sa panaghisgot. Kini mubo ra ug laktod sa punto. Mao nga adunay dakong benepisyo nga susihon pag-ayo ang mga pasiuna nga anaa sa basahong Nangatarongan bisan tuod may mga panahon nga ang imong teritoryo nagakinahanglan ug mga introduksiyon nga wala diha sa libro.
6 Sa laing bahin, ang uban mibasa sa angay nga mga pasiuna diretso gikan sa ilang librong Nangatarongan sa dihang nakigsulti sa mga tawo, ilabina niadtong daw puliki. Kini nagpaarang kanila nga larino ug laktod sa punto, ug sa pagkabig sa pagtagad sa tagbalay. Sagad sila gidapit nga mosulod (modayon) aron ipadayon ang panaghisgot.
7 Gusto tang hinumdoman nga importante kaayo ang atong pasiunang mga pulong diha sa ministeryo sa kanataran. Ang pagkaepektibo niini dako gayod ang mahimo. Sama kang Salomon, kita usab kinahanglang bug-os nga magsusi alang sa makalipayng mga pulong samtang magaandam kita sa paggamit ug epektibong mga pasiuna diha sa atong buluhatong pamalaybalay. Ang basahong Nangatarongan moabag kanato niining maong pagsusi.—Eccl. 12:9, 10.