Imo Bang Gigamit ang Librong Nangatarongan?
1. Sa unsang paagi si apostol Pablo ug si Jesus nagtudlo sa uban?
1 Si apostol Pablo naningkamot sa ‘pagpangatarongan gikan sa mga Kasulatan.’ (Buh. 17:2, 3; 18:19) Sa pagbuhat niana, iyang gisundog si Jesus, kinsa kanunayng nagkutlo sa Kasulatan ug naggamit ug mga ilustrasyon sa pagtabang sa iyang mga mamiminaw nga masabtan ang kabubut-on sa Diyos. (Mat. 12:1-12) Ang librong Nangatarongan Pinasukad sa Kasulatan gidisenyo aron tabangan kita sa pagbuhat usab niana.
2. Unsaon nato paggamit ang librong Nangatarongan sa pag-andam ug epektibong mga introduksiyon?
2 Pag-andam ug Epektibong mga Introduksiyon: Ang librong Nangatarongan Pinasukad sa Kasulatan naundan ug makapukaw-sa-interes nga mga introduksiyon diha sa panid 9-15. Ang paggamit ug lainlaing introduksiyon, ilabina kon kanunay ninyong kobrehan ang teritoryo, makadugang sa imong mga pamaagi sa pagsangyaw ug makatabang usab nga mahimo kang mapailin-ilinon ug epektibo sa pagsugod ug mga panaghisgot. Ang mga introduksiyon mahimong basahon gikan sa libro sa dihang magsangyaw pinaagig telepono o makigsulti diha sa intercom sa guwardiyado kaayo nga mga bilding.
3. Unsay makaplagan diha sa panid 15-24 sa librong Nangatarongan nga makatabang sa atong pagsangyaw?
3 Pagbuntog sa mga Tigsumpo sa Panaghisgot: Nganong dili dahomon daan ang mga tigsumpo sa panaghisgot nga lagmit motungha sa teritoryo ug mogahin ug pipila ka minuto sa pagrepaso sa panid 15-20 alang sa mga sugyot kon unsaon kana pagtubag sa dili pa mosangyaw? Aduna bay pipila ka tagbalay nga lagmit Budhista, Hindu, Hudiyo, o Muslim? Kon mao, ang impormasyon sa panid 21-24 makatabang gayod.
4. Unsaon nato paggamit ang librong Nangatarongan sa dihang adunay mangutana bahin sa usa ka kontrobersiyal nga tema?
4 Pagtubag sa mga Pangutana: Makatabang usab kanato ang librong Nangatarongan sa dihang adunay mangutana bahin sa usa ka kontrobersiyal nga tema. Mahimo nimong sultihan ang tawo nga duna kay gustong ipakita kaniya nga makapainteres nga punto bahin sa maong tema diha sa librong Nangatarongan. Sanglit ang mga tema gilista man sumala sa pagkahan-ay sa alpabeto, paklia ang pangunang ulohan nga gihunahuna nimong naghisgot sa impormasyon nga imong gikinahanglan. Unya tan-awa dayon ang mga pangutana nga tatawng pagkasulat. Kon dili dayon nimo makaplagan ang imong gipangita, paklia ang indise sa ulahing bahin sa libro. Sa dihang imo na kanang makaplagan, basaha kana gikan sa publikasyon. Kon naghisgot ka ug partikular nga teksto, makatabang kanimo ang impormasyon diha sa panid 445 ubos sa ulohan nga “Mga Kasulatang Sagad Sayop nga Gipadapat.”
5. Sa unsang paagi pa magamit ang librong Nangatarongan?
5 Kon sa Unsang Paagi pa Kini Magamit: Ang uban magdala ug librong Nangatarongan diha sa ilang trabahoan o sa tunghaan aron matabangan sila sa pagtubag sa mga pangutana nga sama sa, ‘Nganong dili man mo magsaulog ug mga piyesta opisyal?’ Nakita sa mga batan-on nga ang impormasyon diha sa mga ulohang “Ebolusyon” ug “Paglalang” makatabang gayod sa pag-andam ug mga report sa eskuylahan. Moduaw ka ba sa usa ka masakiton o namatyan ug minahal sa kinabuhi? Ang impormasyon ubos sa ulohang “Pagpalig-on” makatabang kanimo sa paghatag ug Kasulatanhong paghupay. Ang librong Nangatarongan naundan usab ug mapuslanong impormasyon alang niadtong mangandam ug mga pakigpulong ug magdumalag mga tigom sa dayon nang pagsangyaw.
6. Unsay atong tumong sa dihang kita mosangyaw?
6 Sa dihang kita mosangyaw, ang atong tumong dili mao ang pagdaog sa mga argumento; ni basta pagpasa lamang ug impormasyon. Gusto natong mangatarongan sa mahanasong paagi gamit ang Kasulatan. Kon gamiton nato pag-ayo ang librong Nangatarongan, atong gipakita nga kanunay natong gihatagag pagtagad ang atong pagpanudlo.—1 Tim. 4:16.