Tagamtama ang mga Kaayohan sa Basahong Nangatarongan
1 Pagkadakong buluhaton ang gisugo ni Jehova nga buhaton sa iyang dedikadong katawhan niining kataposang mga adlaw! (Mat. 24:14; 28:19, 20) Pagkamapasalamaton ta sa manulondaanong tabang sa pagmantala sa maayong balita!—Pin. 14:6, 7.
2 Nagakinahanglan ug tiunay nga panlimbasog aron aboton ang mga kasingkasing sa katawhan sa “matag nasod ug tribo ug pinulongan.” Pinaagi sa iyang yutan-ong organisasyon, si Jehova mitagana sa gikinahanglang tabang sa pagbuhat niini. Ang usa sa maong tagana mao ang basahong Nangatarongan Pinasukad sa Kasulatan, nga nasudlan sa daghang impormasyon bahin sa 76 ka ulohan nga magamit sa mga panaghisgot uban sa katawhan gikan sa tanang kahimtang sa kinabuhi.
3 Sa walay duhaduha ang pagtagad niining basahona diha sa Teokratikanhong Ministeryong Tunghaan nakabenepisyo kanimo sa espirituwal. Pero nagapanlimbasog ka ba sa paggamit niining impormasyona diha sa imong ministeryo? Ikaw ba nagauswag sa imong katakos sa pagpangatarongan sa mga tawo? Gikataho nga daghang magmamantala wala magagamit sa basahong Nangatarongan, ug ang uban wala magdala niini diha sa ilang ministeryo. Nganong ingon man niini? Hayan tungod kay sila wala masinati sa hinungdanong mga bahin sa maong libro. Daghan nga migamit sa librong Nangatarongan nakakaplag nga nagatagana kinig mga tubag sa daghang pangutana nga ginasukna sa mga tawo.
4 Ang usa sa mga bahin niini mao ang indise sugod sa panid 439. Wala kini magtala sa matag bahin sa kada ulohan, apan mitaganag daghang reperensiya nga imong makaplagang makaayo sa dihang masagubang ang pipila ka situwasyon.
5 Pananglitan, mahimong atong mahibalag ang mga tawo nga manghimaraot sa Bibliya. Mahimong mangutana sila, “Diin man si Cain mikuhag iyang asawa?” Bisan tuod dili mo kini makita ubos sa “Lintunganayng mga Ulohan” sa sinugdanan sa libro, kon imong tan-awon ubos sa “Cain” diha sa indise, imong makaplagan ang tubag sa panid 353 (pp. 301-2 sa Ingles). O adunay moingon nga ang usa ka Diyos sa gugma dili molaglag sa mga daotan. Kon imong tan-awon ubos sa “Gugma” diha sa indise, ikaw dad-on ngadto sa mga panid 54-55 (p. 48 sa Ingles), diin makaplagan mo ang pagpangatarongan uban sa maong tawo.
6 Ang laing makatabang nga bahin, nga makaplagan sa panid 445, mao ang “Mga Kasulatang Sagad Sayop nga Gipadapat.” Ang usa ka tagbalay hayan mosulay sa paggamit sa usa ka teksto sa Bibliya sa pagsuportar sa bakak nga pagtulon-an. Mahimong iyang isitar ang 1 Tesalonica 4:13-18 aron isuportar sa iyang pagtuo nga ang uban moadto sa langit nga dili mamatay dinhi sa yuta. Ang reperensiya gipunting sa panid 347 (p. 312 sa Ingles) para sa panaghisgot niining mga bersikuloha. Kon adunay moergo nga ang yuta sunogon, ginamit ang 2 Pedro 3:7, ang nagapatin-aw nga impormasyon mahimong makaplagan sa mga panid 435 ug 94 (pp. 113 ug 436 sa Ingles). Busa kon ikaw hangyoon sa pagpatin-aw sa usa ka teksto, tan-awa kon kana nalista ba niining bahina sa maong libro.
7 Ang batan-on ug tigulang makabenepisyo gikan niining basahona. Sinatia ang 41 ka pasiuna sa mga panid 9-15 ug ang 47 ka tubag sa mga pagsupak sa mga panid 15-24, ug sulaying gamiton kini diha sa ministeryo. Oo, padayong gamiton ta ang usa sa labing bililhong mga instrumento, ang basahong Nangatarongan.