Pagtanyag sa Maayong Balita—Pinaagig Bug-os nga Paggamit sa Basahong Nangatarongan
1 “Kon nadala ko pa lang ang akong basahong Nangatarongan!” Misantop ba sa imong hunahuna kining puntoha samtang naninguha kang tubagon ang usa ka Kasulatanhong pangutana nga nasugamak diha sa ministeryo sa kanataran o samtang sa di pormal nga paagi nagsangyaw ka sa trabahoan o eskuwelahan? Kadtong sinati sa basahong Nangatarongan ug nagadala niana nakakaplag nga sila makasalig niana alang sa tabang sa hustong panahon. Komosta man ikaw?
2 Sukad ang basahong Nangatarongan giluwatan niadtong 1985, hapit ang kada gula sa Atong Ministeryo sa Gingharian mitaganag ekselenteng mga sugyot kon unsaon sa paggamit niana. Dihay mga pasundayag nga nagpakita sa paagi nga mahimong gamiton kana sa mga ginikanan sa pagtabang sa ilang mga pamilya sa pag-andam alang sa pag-alagad, usa ka ansiyano sa pagbulig sa usa ka batan-on nga nadaldal sa kalibotan, ug mas malig-ong mga magmamantala nga nagatabang niadtong nagakinahanglan ug pagpalig-on. Ang ubang mga artikulo mihatag ug mapuslanong mga sugyot kon unsaon sa paggamit niana diha sa matag bahin sa atong ministeryo.
ATO BA KINING GIGAMIT SA BUG-OS?
3 Sa paggamit sa librong Nangatarongan nga epektibo, kinahanglang masinati una kita sa mga sulod niana. Dayon kita makapanlimbasog sa paggamit sa mga sugyot niana. Nasulayan mo na bang ipahiangay ang usa ka sinugyot nga pasiuna ngadto sa karong Ulohan nga Mahisgotan? Kon gamiton mo ang ikaduhang sugyot ubos sa “Gingharian” sa panid 12 ug sa mubo puntingon ang Pinadayag 21:3-5, nan sa makataronganon imong ikapatungha ang ulohan sa atong Topiko, “Kinsa ang Atong Simbahon?”
4 Sa paggamit sa materyal gikan sa seksiyon sa “Mga Tigsumpo sa Panaghisgot,” atong mabuntog ang unang mga pagsupak. Pananglitan, kon ang usa ka tawo moingon “Dili ako interesado,” mahimong gamiton mo ang ikaupat nga sugyot sa panid 16, puntingon ang Pinadayag 14:7, ug dayon ipasiugda nga kining kasulatana nagpukaw kanimo sa panginahanglan sa pag-ila ug pagsimba sa matuod nga Diyos. Sulayi kana. Ang uban adunay maayong kalamposan nga migamit sa mga pulong sama niini.
5 Sa pagkamatuod, daghan ang mga panalangin nga magsumikad sa paggamit sa basahong Nangatarongan. Kon gahinan ta ug panahon sa pag-andam sa lunhawng mga paagi ug mga pasiuna nga mosaler ngadto sa tinong tigpaminaw, kita mahimong mas madasigon sa paggula sa kanataran, bisan diha sa teritoryo nga siging gikobrehan. Nganong dili mogahin ug panahon nga gikinahanglan sa pagsubli sa pipila sa miaging mga artikulo nga naghatag ug mga sugyot kon sa unsang paagi ang basahong Nangatarongan magamit sa epektibong paagi?—km 4/87 p. 4; km 1/88 p. 4.
6 Hinaot si Jehova magapanalangin sa imong bug-os nga mga panikaysikay samtang nagapaninguha ka sa paghisgot ngadto sa uban sa “kahibulongang mga butang sa Diyos”! (Buh. 2:11) Nan sila makaduyog sa pag-ingon ngadto kang Jehova, sama sa gibuhat sa salmistang si David: “Pagkabililhon sa imong mga hunahuna alang kanako!”—Sal. 139:17.